Markus 8:1-38 AFR1953 - Bible AI

¹In dié dae toe daar 'n baie groot menigte was en hulle niks gehad het om te eet nie, het Jesus sy dissipels na Hom geroep en vir hulle gesê:

²Ek voel innig jammer vir die skare, omdat hulle al drie dae by My bly en niks het om te eet nie.

³En as Ek hulle honger huis toe stuur, sal hulle op die pad beswyk, want sommige van hulle kom van ver.

⁴En sy dissipels antwoord Hom: Waarvandaan sal 'n mens hulle hier in die woestyn kan versadig met brood?

⁵Toe vra Hy hulle: Hoeveel brode het julle? En hulle sê: Sewe.

⁶En Hy gee aan die skare bevel om op die grond te gaan sit; daarop neem Hy die sewe brode, en nadat Hy gedank het, breek Hy dit en gee dit aan sy dissipels om dit voor te sit; en hulle sit dit aan die skare voor.

⁷Hulle het ook 'n paar vissies gehad; en nadat Hy gedank het, sê Hy dat hulle dit ook moet voorsit.

⁸En hulle het geëet en versadig geword en die oorskot van die brokstukke opgetel, sewe mandjies vol.

⁹En die wat geëet het, was omtrent vier duisend. En Hy het hulle weggestuur.

¹⁰En dadelik het Hy met sy dissipels in die skuit geklim en in die streke van Dalmanúta gekom.

¹¹En die Fariseërs het uitgegaan en met Hom begin redetwis en van Hom 'n teken uit die hemel gevra om Hom te versoek.

¹²Toe sug Hy swaar in sy gees en sê: Waarom begeer hierdie geslag 'n teken? Voorwaar Ek sê vir julle, aan hierdie geslag sal sekerlik geen teken gegee word nie.

¹³En Hy het hulle verlaat en weer in die skuit geklim en na die oorkant gegaan.

¹⁴En hulle het vergeet om brode saam te neem, en het net een brood by hulle in die skuit gehad.

¹⁵En Hy het hulle beveel en gesê: Pas op, wees op julle hoede vir die suurdeeg van die Fariseërs en die suurdeeg van Herodes.

¹⁶Toe redeneer hulle onder mekaar en sê: Dit is omdat ons geen brode het nie.

¹⁷En Jesus merk dit en sê vir hulle: Waarom redeneer julle dat julle geen brode het nie? Begryp julle nie en verstaan julle nie? Het julle nog jul verharde hart?

¹⁸Het julle oë en sien julle nie? En het julle ore en hoor julle nie?

¹⁹En onthou julle nie toe Ek die vyf brode vir die vyf duisend gebreek het, hoeveel mandjies vol brokstukke julle opgetel het nie? Hulle sê vir Hom: Twaalf.

²⁰En die sewe vir die vier duisend--hoeveel mandjies vol brokstukke het julle opgetel? En hulle sê: Sewe.

²¹Toe sê Hy vir hulle: Hoe verstaan julle dan nie!

²²En Hy het in Betsáida gekom, en hulle het 'n blinde man na Hom gebring en Hom gesmeek om hom aan te raak.

²³Hy neem toe die blinde by die hand en lei hom uit buitekant die dorp; en nadat Hy in sy oë gespuug en hom die hande opgelê het, vra Hy hom of hy iets sien.

²⁴En hy kyk op en sê: Ek sien die mense, want ek sien hulle soos bome rondloop.

²⁵Daarna lê Hy weer die hande op sy oë en laat hom opkyk, en hy is herstel en het almal van ver af duidelik gesien.

²⁶En Hy het hom na sy huis gestuur en gesê: Moenie in die dorp gaan of dit aan iemand in die dorp vertel nie.

²⁷En Jesus en sy dissipels het uitgegaan na die dorpe van Cesaréa-Filíppi; en op die pad vra Hy sy dissipels en sê vir hulle: Wie sê die mense is Ek?

²⁸En hulle antwoord: Johannes die Doper, en ander: Elía, en ander: Een van die profete.

²⁹En Hy sê vir hulle: Maar julle, wie sê julle is Ek? En Petrus antwoord en sê vir Hom: U is die Christus.

³⁰En Hy het hulle streng beveel om niemand van Hom te vertel nie.

³¹Toe het Hy hulle begin leer dat die Seun van die mens baie moet ly en verwerp word deur die ouderlinge en owerpriesters en skrifgeleerdes en gedood word en ná drie dae opstaan.

³²En hierdie woord het Hy ronduit gespreek. En Petrus het Hom opsy geneem en Hom begin bestraf.

³³Maar Hy het Hom omgedraai, en terwyl Hy sy dissipels aankyk, het Hy Petrus bestraf en gesê: Gaan weg agter My, Satan! Want jy bedink nie die dinge van God nie, maar dié van die mense.

³⁴En toe Hy die skare saam met sy dissipels na Hom geroep het, sê Hy vir hulle: Wie agter My aan wil kom, moet homself verloën en sy kruis opneem en My volg.

³⁵Want elkeen wat sy lewe wil red, sal dit verloor; maar elkeen wat sy lewe om My ontwil en om die evangelie ontwil verloor, hy sal dit red.

³⁶Want wat sal dit 'n mens baat as hy die hele wêreld win en aan sy siel skade ly?

³⁷Of wat sal 'n mens gee as losprys vir sy siel?

³⁸Want elkeen wat hom vir My en my woorde skaam in hierdie owerspelige en sondige geslag, vir hom sal die Seun van die mens Hom ook skaam wanneer Hy kom in die heerlikheid van sy Vader met die heilige engele.