2-е Карынфянаў 6:1-18 BBS2002 - Bible AI

¹А мы, як памочнікі ў працы, просім вас, каб мілата Божая ня марна была прынята вамі.

²Бо сказана: "у часіну спрыяльную пачуў Я цябе, і ў дзень выратаваньня дапамог табе". Вось цяпер часіна спрыяльная, вось, цяпер дзень выратаваньня.

³Мы нікому ні ў чым не даём спатыкацца, каб не выстаўляць на глум служэньне,

⁴а ва ўсім выяўляем сябе, як слуг Божых, у вялікай цярплівасьці, у бедах, у гаротах, ва ўцісках,

⁵пад ударамі, у вязьніцах, у выгнаньнях, на працы, у чуваньнях, у пастах,

⁶у чысьціні, у добрай разумнасьці, у вялікадушнасьці, у даброці, у Духу Сьвятым, у шчырай любові,

⁷у слове ісьціны, у моцы Божай, са зброяю праўды ў правай і ў левай руцэ,

⁸у славе і няславе, пры ганьбе і хвале: нас лічаць ашуканцамі, але мы верныя;

⁹мы невядомыя, але нас пазнаюць; нас лічаць нябожчыкамі, але вось, мы жывыя; мы карѓныя, але мы не паміраем;

¹⁰нас засмучаюць, а мы заўсёды радуемся; мы гаротнікі, але многіх багацім; мы нічога ня маем, але ўсім валодаем.

¹¹Вусны нашыя адкрытыя вам, Карынфяне, сэрца нашае расшырана.

¹²Вам ня цесна ў нас; а ў сэрцах вашых цесна.

¹³Такою ж роўнаю мераю - кажу вам, як дзецям, - зрабеце і вашае сэрца шырокім!

¹⁴Ня ўгінайцеся пад чужое ярмо зь нявернымі. Бо што супольнага ў праведнасьці зь беззаконьнем? што супольнага ў сьвятла зь цемраю?

¹⁵Якая згода паміж Хрыстом і Вэліярам? Альбо якая саўдзельнасьць у верніка зь няверным?

¹⁶Якая агульнасьць храма Божага зь ідаламі? Бо вы храм Бога Жывога, як сказаў Бог: "усялюся ў іх і буду хадзіць у іх; і буду іхнім Богам, і яны будуць Маім народам".

¹⁷І таму выйдзіце зь іхнага асяродзьдзя і аддзялецеся, - кажа Гасподзь, - і не дакранайцеся да нячыстага, і Я прыму вас

¹⁸і буду вам за Айца, і вы будзеце Маімі сынамі і дочкамі, кажа Гасподзь Усеўладны".