Дауд 23:1-39 CHE2012 - Bible AI

¹ХӀорш ду Даудан тӀаьххьара дешнаш: «Иштта олу Юшайн кӀант волчу Дауда, иштта олу Дала вазвина волчу стага. Якъубан Дала паччахь хила къобалвинарг а, Исраилан халкъан хаза назманаш олург а ву иза.

²Везачу Элан са а ду суна чохь, Цуьнан дош а ду сан метта тӀехь.

³Исраилан халкъан Дала дийцинера, Исраилан халкъан Тархо соьга аьллера: „Нийсонца нахана тӀехь олалла дийриг, Делах а кхоьруш, олалла дийриг,

⁴малх хьалаболучу Ӏуьйренан нур санна, марха йоцучу Ӏуьйренан нур санна, лаьттара сийна буц хьалайолуьйтуш йолу догӀа сецча хуьлу серло санна ю“.

⁵Сан тӀаьхьенца вац ткъа Дела? Дала соьца массо а ханна болу барт бина, цуьнан чӀагӀо йохор а яц, хийцалур а яц. Суна мел гӀо деш дерг а, суна мел лууш дерг а, хуьлуьйтур дац ткъа Цо?

⁶Ткъа Ӏеса нах хир бу, дӀакхуссуш долу кӀохцалш санна, цхьаммо а куьйгаца схьаоьцуш доцу.

⁷Царах дӀахьакхавала лууш волчо, шен кара эчиг я гоьмукъан дечиг схьаоьцу. И кӀохцалш шаьш долччохь цо дагадо».

⁸ХӀорш ю Даудан майрачу тӀемалойн цӀерш: тахьикманхо волу Яшуб-Бушбат, иза майрачу кхаанна юкъахь коьртаниг хилла. Цо, шен гоьмукъ бархӀ бӀе стагана дуьхьал а баьккхина, уьш цхьана тӀамехь эшийна.

⁹Оцу кхаанна юкъара шолгӀаниг ахьохьахо волчу Додин кӀант ЭлиӀазар хилла. ПӀелаштамхойх бийла а буьйлуш, цаьрга тӀаме тӀекхойкхучу хенахь Даудаца цхьаьна хиллачарах цхьаъ вара иза. ПӀелаштамхой цигахь тӀом бан дагахь арабевлла хилла, амма исраилхой юхабевлла.

¹⁰ЭлиӀазар хилла цигахь, пӀелаштамхошна дуьхьал а ваьлла, тӀом беш. Цо, шен куьг, кӀад а делла, туьрана тӀелатталц, уьш байина. Везачу Эло боккха толам белла исраилхошна цу дийнахь. ЭлиӀазар толам баьккхина ваьллачул тӀаьхьа, тӀемалой тӀегулбелла цунна. Царна беллачу нахана тӀера бедарш схьагулъяр бен кхин дан хӀума ца диснера.

¹¹КхоалгӀаниг хилла ХӀарар-гӀалара волу АгӀин кӀант Шама. Лахьи цӀе йолчу меттигехь, хьозийн кхоьш дӀайийначу кха тӀехь, тӀом бан схьагулбелла пӀелаштамхой. Цигара исраилхойн эскар пӀелаштамхойх дедда дӀадахана.

¹²Амма Шамас, цу кха юккъехь дӀа а хӀоьттина, пӀелаштамхой эша а бина, и меттиг кӀелхьаръяьккхина. Везачу Эло цу дийнахь Исраилан халкъана боккха толам белла.

¹³Ялта схьагулдечу цхьана дийнахь, пӀелаштамхой шайн меттаматтаца репахойн тогӀи чохь лаьтташ а болуш, ткъе итт баьччанех волу кхо стаг Дауд волчу веана Ӏадулам олучу хьеха чу.

¹⁴Дауд цу хенахь чӀагӀйинчу меттехь вара, ткъа пӀелаштамхойх цхьа эскаран тоба Байтлахам-гӀалахь хилла.

¹⁵Хьагвелла волчу Дауда аьлла: «Байтлахам-гӀалин кевнера гӀу чуьра мала хи хьан дахьар дара те суна?»

¹⁶ТӀаккха майра кхо тӀемало, пӀелаштамхойн меттаматтехула чекх а ваьлла, Байтлахаман кевнехь йолчу гӀу чуьра хи а эцна, иза Даудана а дахьаш, схьавеара. Амма Даудана и хи мала ца лиира. Цо и хи, сагӀина а лерина, Везачу Элана хьалха лаьтта охьадоьттира.

¹⁷Дауда элира: «Веза Эла, ца малало-кх соьга и хи. И хи дан бахана болчу, шайн синош ца кхоийначу кху къонахийн цӀий санна дац иза?» Цундела ца лиира Даудана и хи мала.

¹⁷Иштта хьуьнаре гӀуллакхаш дора цу майрачу кхаа тӀемалочо.

¹⁸Йоабан ваша, Царуятан кӀант волу Абушай, цу ткъе итт тӀемалочун коьртехь вара. Цо шен гоьмукъца кхо бӀе стаг вийнера, цундела цу кхааммо лоруш вара иза.

¹⁹Цу кхаа турпалхочун чул а чӀогӀа цӀе яхана вара иза, церан хьаькам хилла дӀахӀоьттина а вара, амма иза церан могӀаре вогӀуш вацара.

²⁰ЯхӀу-ЯдаӀан кӀант БенъяхӀу а майра стаг хилла. Иза ша Къабциал-юьртара вара. Цо шегара даккхий хьуьнарш гайтинера. Цуьнан карах валар хиллера муабахойн гӀараваьллачу шина баьччанан [24]. Иштта ло догӀучу дийнахь, ор чу а ваьлла, лом дийнера цо.

²¹Кхин а цхьа чӀогӀа лекха волу мисархо хилла цо вийна. Мисархочун карахь гоьмукъ хилла, ткъа хӀара карахь гӀаж а йолуш, дуьхьалваьлла цунна. БенъяхӀус, мисархочуьнгара гоьмукъ схьа а баьккхина, цуьнан шен гоьмукъ а тоьхна, иза вийна.

²²И тайпа хьуьнаре гӀуллакхаш дина хилла ЯхӀу-ЯдаӀан кӀанта БенъяхӀус. Цундела иза, важа кхо турпалхо санна, гӀараваьлла вевзаш вара.

²³Иза ткъе иттаннал чӀогӀа цӀе яххана вара, амма вукху кхаанца нислуш вацара. Дауда шен хана юкъахь коьртаниг вина дӀахӀоттийра БенъяхӀу.

²⁴Коьрта ткъе итт тӀемалочунна юкъабогӀуш бара: Йоабан ваша ӀасахӀал, Байтлахам-гӀалара Додин кӀант Элхьанан,

²⁵хьародхой болу Шама а, Эликха а,

²⁶палтихо волу Хьелац, такхоӀхо волчу Ӏакхешан кӀант Ӏира,

²⁷Ӏанатотхо Абу-Ӏезар, хьушатхо Мубани,

²⁸ахьохьахо Цалмун, натӀупатхо Махьран,

²⁹натӀупатхо волчу БаӀнин кӀант Хьалид, бен-яманхойн ГебаӀ-гӀалара Ребин кӀант Ита,

³⁰пӀарӀатунхо БенъяхӀу, ГаӀашан тогӀешкара ХӀиди,

³¹Ӏарбатхо волу Абу-Ӏалбан, бархьумхо волу Ӏазмават,

³²шаӀалбанхо Элияхьба, Яшанан кӀентий, ЯхӀуната,

³³хӀарархо ШамаӀ, хӀарархо волчу Шараран кӀант Ахьиам,

³⁴маӀхахочун Ахьасбин кӀант Эли-Пулат, гилохо волчу Ахьи-Тупалан кӀант ЭлиӀам,

³⁵кармалхо Хьецари, арбахо волу ПаӀра,

³⁶Цобарчу Натин кӀант ИгӀал, гадахо волу Бани,

³⁷Ӏамминхо волу Цалакх, Царуятан кӀентан Йоабан герзлелорхо волу бератхо Нахьрай,

³⁸итархо волу Ӏира, итархо волу ГӀараб,

³⁹хьетахо волу УръяхӀу. Уьш массо а ткъе вуьрхӀитта стаг вара.