ЕшаӀ-ЯхӀу 25:1-12 CHE2012 - Bible AI

¹Веза Эла! Хьо сан Дела ву. Аса вазвийр ву Хьо, Хьан цӀе хастайийр ю, Ахьа тамашийна гӀуллакхаш дина дела. Тоххара дуьйна Ахьа бина сацамаш, Ахьа ма-аллара, иштта кхочушбира.

²Ахьа гӀаланах тӀулгийн оьла йина, чӀагӀйинчу гӀаланах саьлнаш йина, хийрачу къоман гӀопах гӀала йоцург йина. И гӀала цкъа а юхаметтахӀоттийна хир яц.

³Цундела нуьцкъалчу халкъо Хьо лорур ву, буьрсачу къаьмнийн гӀала Хьох кхоьрур ю.

⁴Мискачунна Хьо волчохь дӀалечкъийла хилла, холчохь волчу гӀийлачунна Хьо кӀелхьарвала меттиг хилла. Мох хьоькхучу хенахь Хьо бун санна хилла, йовхо еанчу хенахь Хьо ӀиндагӀ санна хилла, хӀунда аьлча буьрсачу нехан садеӀар пенна дуьхьал хьоькхучу махах тера ду, хи доцучу меттехь йолчу йовхонах тера ду.

⁵Хийрачу нехан чуьрабийлар сацийна Ахьа. Мархин ӀиндагӀо йовхо дӀаяккхар санна, буьрсачу нехан баккхийбер дӀадаьккхина Ахьа.

⁶Массо а ницкъийн Везачу Эло Цийон-лам тӀехь массо а халкъан той хӀоттор ду. Цу тойнехь жижиг а, чагӀар а хир ду. Жижиг токхе хир ду, ткъа чагӀар шира а, цӀена а хир ду.

⁷Дерриге а халкъашна тӀетесна йолу шаршу а, массо а къаьмнаш дӀахьулдина долу кирхьа а дохийна дӀадоккхур ду Цо цу лам тӀехь.

⁸Ӏожалла гуттаренна а дӀакхоллур ю Цо. Хьалдолчу Эло массеран а яххьаш тӀера бӀаьрхиш дӀадохур ду. Дерриге а дуьнен тӀехь Шен халкъ емалдар дӀадоккхур ду Цо. Иштта боху Везачу Эло.

⁹Цу дийнахь эр ду: «ХӀара ву вайн Дела! Цунах яра вайн дегайовхо, Цо вай кӀелхьардехи! Иза Веза Эла ву. Цунах яра вайн дегайовхо, хазахетарца даккхийдер вай Цо кӀелхьардахарна!»

¹⁰Везачу Элан куьг Цийон-лома тӀехь ду, амма Муабин къам ша Ӏаш долчу меттехь хьоьшур ду, кхеллин ор чохь ча хьашар санна.

¹¹Нека дечо санна, цо куьйгаш тийсахь а, Дала цуьнан дозалла дар лахдийр ду цуьнан куьйгийн мекараллица цхьаьна.

¹²Цуьнан лекхачу пенийн чӀагӀо лаьтта а йожийна, чена юккъе охьайожор ю Везачу Эло.