Забур 143:1-15 CHE2012 - Bible AI

¹ [177] Даудан назма. Декъала ву Веза Эла, Иза сан тарх ю. Цо тӀамана кечвина со, сан куьйгаш лата Ӏамийна.

²Суна тешаме Верг, сан ГӀап, сан къайлаволу Меттиг, со КӀелхьарвоккхург, сан турс — сан Цунах дегайовхо ю. Цо сан куьйга кӀел даладо сан халкъ.

²

³Веза Эла! Мила ву стаг, Ахь цуьнан гӀайгӀа бан, адамийн кӀант тергал хӀунда во Ахьа?

⁴Адам хьоькхучу махах тера ду, цуьнан дахар а дацлуш долу ӀиндагӀ ду.

⁴

⁵Веза Эла! Хьайн стигалш дӀаса а таттий, чувоссахьа. Лаьмнех хьакхалохьа, тӀаккха цара кӀур тосур бу.

⁶Стелахаьштиг тохий, мостагӀий дӀасакхиссахьа, Хьайн пхерчий а тохий, лахкахьа уьш.

⁷Лакхара Хьайн куьг а кховдадай, буьрсачу хих а, хийрачу махкара болчу нехан карара а кӀелхьарваккхахьа со.

⁸Церан баганаша даьссаниг дуьйцу, стаг Ӏехош ду церан куьйгаш.

⁹Дела! Итт мерз болчу пондар тӀехь керла йиш локхур ю ас Хьуна,

¹⁰паччахьашна толам лучу Хьуна, Хьайн лай Дауд дерачу туьрах кӀелхьарвоккхучу Хьуна.

¹¹Хийрачу махкара болчу нехан карара кӀелхьарваккхахьа со. Церан баганаша даьссаниг дуьйцу, стаг Ӏехош ду церан куьйгаш.

¹²Ондачу диттех тера хуьлда вайн кӀентий, паччахьан цӀа чохь кечдинчу бӀогӀамех тера хуьлда вайн мехкарий.

¹³Ялта Ӏалашдеш йолу чоьнаш мел долчу беркатах юьзна хуьлда вайн, дежийлашкахь эзарнаш уьстагӀий дебийла вайн.

¹⁴Хьийкъина хуьлда вайн стерчий. Тхуна тӀелатар ма хуьлда, цхьа а йийсаре а ма вуьгийла. Вайн урамашкахь белхар ма хуьлда.

¹⁵Ирс долуш ду и дерриг а долу халкъ. Ирс долуш ду Веза Эла Дела волу халкъ.