Забур 64:1-14 CHE2012 - Bible AI

¹ [74] Эшарш локхучу тобанан куьйгалхочуьнга: Даудан назма. Йиш.

²Цийон-ломахь Хьуна хастам бан хьакъ ма ду, Дела, Хьуна дина нигаташ кхочушдина хир ма ду.

³Тхан доӀанаш Хьуна дӀахеза. Муьлхха а адам Хьуна тӀе догӀу.

⁴Къилахь долчу гӀуллакхаша гӀелвина со, ткъа Ахь тхан зуламашна гечдо.

⁵Декъала ву Ахь хаьржинарг, Хьайн керташкахь Ӏайта Хьайна тӀеозийнарг! Тхо Ӏаьбна хир ду Хьан цӀийнан диканах, Хьо Ӏаш йолчу меттиган еза хиларх дузур ду тхо.

⁵

⁶Тхо кӀелхьардохург волу Дела, Хьо жоп луш ву тхуна ларамах дузуьйтуш долчу паргӀатдахаран гӀуллакхаш дарца. Лаьттан массо а маьӀӀехь болчеран а, генарчу хӀордашца болчеран а сатуьйсийла а Хьо ву.

⁷Хьайн ницкъаца Ахь лаьмнаш дӀахӀиттадо, Хьайн гӀодаюккъехь гӀора а Ахь латтадо.

⁸ХӀордийн а, церан тулгӀенийн гӀовгӀа а, халкъийн карзахдалар а дӀасацош верг а Хьо ву.

⁹Лаьттан йистошкахь бехаш берш Хьан тамашийнчу билгалонашка ларамах буьзна бу. Малхбалехь а, малхбузехь а бехаш болчаьрга Хьайна хастамаш бойту Ахьа.

⁹

¹⁰Ахь латта Ӏалаш а до, цунна хи а латтадо, иза токхе а хуьлуьйту Ахь, тӀехъюьзна йолу хин Ӏовраш а луш. Ахь адамашна ялта кхуьуьйту, Айхьа латта оцу гӀуллакхна кхоьллина дела.

¹¹Ахь лаьттан хершнаш хих а дузу, гӀорзанаш дӀа а шарйо, догӀанан тӀадамашца латта кӀад а до, цу тӀехь мел яьлла хӀума декъал а йо.

¹²Ахь шарна а, коьрта тӀе таж санна, беркат кховдадо, Хьан лараш а токхонах юьзна ю.

¹³Ахь яьссачу аренашкахь дежийлаш а ло, гунаш хазахетарх а дузу.

¹⁴Сийначу дежийлашкахь жаш ду дежаш. ТогӀешкахь ялта ду кхуьуш, даккхийдерца эшарш а лоькхуш.