Лака 3:1-38 CHE2012 - Bible AI

¹Тибар паччахь волу пхийтталгӀа шо долчу хенахь, Понти Пулат ЯхӀуд-махкахь мехкан куьйгалхо волуш, ХӀарод Галилайхь куьйгалхо волуш, цуьнан ваша Пилап и санна Итурейхь а, Трахонехь а куьйгалхо волуш, ткъа Лусан Абали цӀе йолчу меттигехь куьйгалхо волуш,

²динан коьрта дай бара Ӏанна а, Кайба а. Оцу шарахь яьссачу арахь Закрин кӀанте Яхьъяга Делера хаам хилира.

³Цул тӀаьхьа Яхьъя Йордан-хин бердаш тӀехь болчу махкахула вогӀура. Цо кхайкхам бора нахе: «Далла тӀе а дерзий, шаьш хих чекхдахийта, Деле шайн къиношна гечдайтархьама», — бохуш.

⁴Цуьнан хьехамех лаьцна ЕшаӀ-ЯхӀу-пайхамаро яздина:

⁴«Яьссачу аренгахь кхойкхучун аз хезаш ду: „Везачу Элана некъ кечбе! Нисде Цунна хьалха некъан тачанаш!

⁵ХӀора тогӀи хьалаюзур ю, хӀора лам а, гу а охьахедар бу. Харц некъаш нислур ду, доьхнарш шарлур ду.

⁶Массарна а гур ду Дала адамаш кӀелхьардахар!“»

⁷Хих чекхбахийта баьхкинчу нахе Яхьъяс бохура: «Шу лаьхьанан кӀорнел а чӀогӀа зуламе адамаш ма ду! Хьан бина шуьга, тӀедогӀучу къематан дийнах кӀелхьардовла деза аьлла, хаам?

⁸Шу Далла тӀедирзина делахь, шайн дахарехь иза гайта. „Тхан да ИбрахӀим ву“, — алий, тоам ма бе. Ас боху шуьга, Делан таро ю оцу Ӏохкучу тӀулгех а ИбрахӀимна тӀаьхье ян.

⁹Орамашна тӀехула диг хьалаайина ду: хӀора шена тӀе пайден болу стом ца латтош долу дитт, хада а дой, цӀера юккъе кхуссу».

¹⁰«Ткъа хӀун де оха?» — бохуш хоьттура наха.

¹¹Яхьъяс жоп лора: «Шен ши коч йолчо цхьа а йоцучунна цхьаъ дӀало, шен яа хӀума йолчо изза де».

¹²Ял йоккхуш берш а богӀура шаьш хих чекхбахийта. «Устаз! — хоьттура цара, — оха хӀун дан деза?»

¹³«Нахера совнаха ял ма яккха», — бохура цо цаьрга.

¹⁴ТӀемалоша хаьттира цуьнга: «Оха хӀун дан деза?» Яхьъяс жоп делира: «Нуьцкъах нахера хӀуманаш схьа ма яха, бехке воцург бехке ма ве, шайн алапах тоам бе».

¹⁵Адам цхьана хӀумане сатуьйсуш Ӏара, массеран дагахь дара: «Дала леррина Къобалвинарг вуй теша Яхьъя?»

¹⁶Яхьъяс бохура цаьрга массаьрга а: «Ас шу хих чекхдоху, амма сол нуьцкъалниг вогӀур ву шуна, со Цуьнан мачийн бахтарш дӀадаста а хьакъ вац. Цо Делан Синах дузор а ду, цӀерца а дахчор ду шу.

¹⁷Цуьнан карахь кӀа ору баьхьа бу, хьаьттахь долу кӀа, цӀан а дина, цӀа чу схьагулдархьама. Ткъа кегаш цкъа а дӀайовш йоцучу цӀера юкъахь ягор ю Цо».

¹⁸Оцу дешнашца а, кхин дуккха а кхидолчу тӀедожоршца а халкъе хазачу кхоах лаьцна хаамаш бора Яхьъяс.

¹⁹Цу хенахь Яхьъяс бехке вира махкана тӀехь куьйгалла деш волу ХӀарод, шен вешин зуда ХӀародад ялийна аьлла а, кхин а цуьнгара даьлла зуламаш бахьанехь а.

²⁰ХӀарода шегара девллачу зуламашна тӀе кхин цхьаъ а туьйхира: цо Яхьъя чувоьллира.

²¹Схьавеанарг массо а хих чекхвоккхуш, Ӏийса а ваьккхира. Иза доӀа дан хӀоьттира — стигал еллаелира.

²²Ӏийсана тӀе Делан Са доьссира кхокханан суьртехь. Стигалара аз хезира: «Хьо ву Сан хьоме КӀант! Хьоьца бу Сан лаам!»

²³Ӏийсан ткъе итт шо гергга дара, Иза Делах лаьцна хьехамаш бан волавелча. Иза, массарна ма-моттара, Юсупан кӀант вара, ткъа Юсуп Ӏелин кӀант вара,

²⁴Ӏела Маттатан вара, Маттат Левин вара, Леви Мелхин, Мелхи Яннайн, Яннай Юсупан,

²⁵Юсуп Маттит-ЯхӀун, Маттит-ЯхӀу Амосан, Амос Нахьуман, Нахьум Элсин, Элси НагӀайн,

²⁶НагӀай Махьатан, Махьат Маттит-ЯхӀун, Маттит-ЯхӀу ШамӀин, ШамӀа Юсахан, Юсах Йовдин,

²⁷Йовди Йохьанан, Йохьан Решан, Реша Зурбабелан, Зурбабел Шалтаалан, Шалтаал Неран,

²⁸Нера Мелхин, Мелхи Адин, Ади Къосаман, Къосам Ӏелмадин, Ӏелмади Ӏаьран,

²⁹Ӏаьр ЮшаӀан, ЮшаӀ ЭлиӀазаран, ЭлиӀазар Йораман, Йорам Маттатан, Маттат Левин,

³⁰Леви ШимӀин, ШимӀа ЯхӀудан, ЯхӀуд Юсупан, Юсуп Йонаман, Йонам Элъякъиман,

³¹Элъякъим Мелин, Мели Минадин, Минади Маттетан, Маттет Натин, Ната Даудан,

³²Дауд Юшаян, Юшай Ӏабадин, Ӏабади БоӀазан, БоӀаз Салманан, Салман Нахьшонан,

³³Нахьшон Ӏамминадабан, Ӏамминадаб Адманан, Адман Раман, Рам Хьацранин, Хьацрани Парасан, Парас ЯхӀудан,

³⁴ЯхӀуд Якъубан, Якъуб Исхьакхан, Исхьакх ИбрахӀиман, ИбрахӀим ТӀахьиран, ТӀахьир Нахьиран,

³⁵Нахьир СерагӀан, СерагӀ Рахьун, Рахьу ПалагӀан, ПалагӀ Ӏебаран, Ӏебар Селахьан,

³⁶Селахь Къаиман, Къаим Арпахшадан, Арпахшад Шимин, Шима Нохьин, Нохьа ЛемакӀан,

³⁷ЛемакӀ Матушалахьан, Матушалахь ХӀанохан, ХӀанох Ярадан, Ярад Махьаллалан, Махьаллал Къаиман,

³⁸Къаим Эношан, Энош ШатӀин, ШатӀа Адаман, ткъа Адам — Делан кӀант вара.