Маттай 1:1-25 CHE2012 - Bible AI

¹ХӀара ду шуна Дала леррина къобалвинчу Ӏийсан схьаваларх лаьцна долу дӀаяздинарг. Иза Даудах схьаваьлла, ткъа Дауд ИбрахӀиман тӀаьхьенах хилла.

²ИбрахӀим Исхьакхан да хилла, Исхьакх — Якъубан да, Якъуб — ЯхӀудан а, цуьнан вежарийн а да,

³ЯхӀуд — Парасан а, Зерахьан а да, ткъа церан нана Тамара хилла. Парас Хьацранин да хилла, Хьацрани — Раман да.

⁴Рам Ӏамминадабан да хилла, Ӏамминадаб — Нахьшонан да, Нахьшон — Салманан да,

⁵Салман — БоӀазан да. БоӀазан нана Рахьаб хилла. БоӀаз Ӏабадин да хилла. Ӏабадин нана Рути хилла. Ӏабади Юшайн да хилла,

⁶Юшай — Даудан да хилла. Дауд Сулим-паччахьан да хилла, цуьнан нана хьалха УръяхӀугахь марехь хилла.

⁷Сулим-паччахь РахьбуӀаман да хилла, РахьбуӀам — Аби-ЯхӀун да, Аби-ЯхӀу — Асин да,

⁸Аса — ЯхӀушаптин да, ЯхӀушапти — Йораман да, Йорам — Ӏузи-ЯхӀун да,

⁹Ӏузи-ЯхӀу — Йовтаман да, Йовтам — Ахьазан да, Ахьаз — Хьузакх-ЯхӀун да,

¹⁰Хьузакх-ЯхӀу — Маннашан да, Маннаш — Аминан да, Амин — Юши-ЯхӀун да,

¹¹Юши-ЯхӀу — Яхун-ЯхӀун а, цуьнан вежарийн а да хилла. Цу хенахь дерриг а Исраилан къам Бавел-махка дӀадигна хилла.

¹²Бавел-махкара цӀа баьхкинчу хенахь Яхун-ЯхӀу Шалтаалан да хилла, Шалтаал Зурбабелан да хилла,

¹³Зурбабел — Авадин да хилла, Авади — Элъякъиман да, Элъякъим — Узаран да,

¹⁴Узар — ЦӀадукъин да, ЦӀадукъа — Ахьмин да, Ахьма — Аладин да,

¹⁵Алади — ЭлиӀазаран да, ЭлиӀазар — МатӀанин да, МатӀани — Якъубан да,

¹⁶Якъуб — Мареман майра волчу Юсупан да. Марема Ӏийса вина, Дала леррина Къобалвинарг аьлла, цӀе йоккхуш волу.

¹⁷ИбрахӀимна тӀера Даудана тӀе кхаччалц ейтта тӀаьхье хилла, Даудана тӀера Бавеле йийсаре бахийтталц — ейтта тӀаьхье хилла, ткъа иштта ейтта тӀаьхье кхиъна Бавелера юхабалийначул тӀаьхьа Ӏийса дуьнен чу валлалц.

¹⁸Цуьнан дуьнен чу валар иштта хилира: Ӏийсан нана Марем Юсупна ехна хилла. Амма иза маре яхале гучудаьлла Марем Делан Синах доьзалхочух хилар.

¹⁹Цуьнан хин волу майра Юсуп чӀогӀа оьзда стаг хилла. Цо шайна юкъахь хьахаделла долу захало, нахала а ца доккхуш, дохо сацам бина хилла.

²⁰Цо цу гӀуллакхах лаьцна ойла ечу хенахь, цунна гӀенах Везачу Элан малик дуьхьалтесира. Малико элира:

²⁰«Даудан кӀант Юсуп, Марем хьайна дӀайига ма кхера, хӀунда аьлча цуьнан кийрахь долу бер Делан Синах схьадаьлла ду.

²¹Цо кӀант вийр ву. Цуьнан цӀе Ӏийса [1] тиллалахь, хӀунда аьлча Цо Шен къам къинойх кӀелхьардоккхур ду».

²²И шадерг а хилла, Везачу Эло Шен пайхамарехула аьлларг кхочуш хилийтархьама. Делан Йозанна тӀера дешнаш иштта дара:

²³«ЙоӀстага, берах а хилла, КӀант вийр ву, Цуьнан цӀе Ӏимануал туьллур ю. Иза „Тхоьца Дела ву!“ — бохург ду».

²⁴Юсуп самаваьлча, цо, Везачу Элан малико ма-хьеххара, Марем шена маре схьаялийра.

²⁵Амма бер дина яллалц, цо цунах куьг ца туьйхира. Юсупа цу кӀентан цӀе Ӏийса тиллира.