Устаз 8:1-17 CHE2012 - Bible AI

¹Мила кхета массо а хӀуманан маьӀнах? Хьан кхетор ву иза массо а хӀуманах? Адаман хьекъалалло цуьнан юьхь а къагайо, цуьнан къиза амат а кӀаддо.

²Дала паччахьна дийр ду аьлларг бахьана долуш, боху ас: паччахьо мел бохург ларделахь.

³Хьайн паччахьах дӀакъаста сих а ма ло, цунна дуьхьалбевллачарах дӀа а ма кхета, хӀунда аьлча паччахьан шена луъург дан йиш ю.

⁴Цу тӀе, паччахьан дош уггаре а нуьцкъала ду, цундела хьан эр дара цуьнга: «Ахьа хӀун леладо?»

⁴

⁵Паччахьан омра кхочушдийриг цунна дуьхьалбевллачаьрца лелар вац. Хьекъале волчун дагахь лаьттар ю шен хан а, шен кхел а.

⁶ХӀора гӀуллакхан а ю шен хан а, шен кхел а, амма адамаша дуккха а хала баланаш хьега беза.

⁷Хиндолчух лаьцна хуург вац. Хьан эр дара хиндерг хӀун ду?

⁸Цхьаьнгга а шен синан Ӏаьнарна тӀехь олалла далур дац. Цхьаннан а карахь дац шен валаран де. Цхьа а дӀахоьцур вац тӀом бечуьра. Зуламхо ша дечу зуламаша кӀелхьарвоккхур вац.

⁹И дерриг а суна гира, стигална кӀел кхочушдо гӀуллакхаш талла сайн дог ас къобалдича. Цхьана адамо вукхунна тӀехь олалла до, ткъа иза бахьана долуш цу шиммо а бала хьоьгу.

¹⁰ХӀетахь гора суна зуламхошна дӀахӀиттош долу тезеташ. Уьш, езачу меттера схьа а оьций, дӀабухкура. Ткъа цара зуламаш динчу гӀаларчу бахархоша церан сий дора [2]. Иза а кхетам тӀе ца кхуьу хӀума ду.

¹¹Зуламна сихха таӀзар ца даро адамийн дегнаш зуламаш дарехьа дерзадо.

¹²Къинош летош волчо бӀозза къа латадешшехь, иза дуккха а ваха тарло. Амма суна хаьа, Делах кхоьручунна дика хир дуйла, иза Цунна хьалха вегош лела дела.

¹³Ткъа зуламаш лелочунна Делера дика а хир дац, иза, ӀиндагӀ санна, дукха а вехар вац, Делах ца кхоьруш ша лела дела.

¹⁴Кхин а ду лаьттахь хуьлуш цхьа кхетам тӀе ца кхуьу хӀума. Бакъахьарчу адамашна зуламхошна тӀе дан деза вон тӀедогӀу. Ткъа зуламхошна бакъахьарчарна хила дезарг хуьлу. Аса ма-аллара: «Иза а кхетам тӀе ца кхуьу хӀума ду!»

¹⁵Амма аса сайн хьехам бо, адаме шен дахарх самукъадаккха аьлла. Стигална кӀел адамна уггаре а диканиг яар-малар а, шен дахарх самукъадалар а ду. Дала шена стигална кӀел деллачу дахарехь, ша бечу балха тӀехь цу гӀуллакхаша иза новкъа воккхур ву.

¹⁶Хьекъалалла довза а, кху дуьненахь адамаша дечу гӀуллакхашка хьажа а ас сайн дог къобалдича, дийнаххьий, буьйсанний наб яйнера сан.

¹⁷ТӀаккха берриг Делан белхаш сайна гича, суна хиира, Дала стигална кӀел мел дечу хӀуманна адам тӀекхиалур доцийла. Хаа мел гӀертарх а, хуур дац цунна иза. Нагахь цхьана хьекъалалла долчу стага шена хаьа бохуш хилча а, цуьнан а йиш яцара иза дерриг а ма-дарра хаа.