ХӀушаӀ 7:1-16 CHE2012 - Bible AI

¹Аса Исраил-махкана дарба лелийча, Эпрайман халкъан къинош а, Шамран-гӀалин зуламаш а гучудовлу. ХӀунда аьлча цара харцонаш лелайо. Къуй а бу лелаш. Талорхой а бу гӀалин урамашкахь талораш деш.

²Царна дага а ца догӀу Суна церан зуламаш дерриг а дагахь хилар. Шаьш динчу зуламаша хӀинца го бина царна. Церан къинош Суна хьалха ду.

²

³Цара шайн зуламечу гӀуллакхашца паччахьан самукъадоккху, ткъа шайн мекарлонашца паччахьан гонах болчарна там бо.

⁴Уьш массо а ямартлонех буьзна а, тешаме боцуш а бу. Церан дералла, цӀиййинчу пешан цӀе санна, дуккха а ханна юьсу, хьакхийна бод севсачу хенахь бепиг доттучо пеш йогучуьра сацаяхь а.

⁵Вайн паччахьан дезачу дийнахь чагӀар а муьйлий, элий бехий дӀахӀуьтту, ткъа паччахьо Дела емалвечу нахе куьйгаш дӀакхийдадо.

⁶Питанаш а деш, цунна тӀекхочу уьш. Церан дегнаш пеш санна догу, церан дералла сахиллалц сийсаш йогу, ткъа Ӏуьйранна иза цӀеяьлла алу санна хуьлу.

⁷Уьш массо а оьгӀазаллех кхехкаш бу. Цара шайн куьйгалхой дӀакхоллу. Церан массо а паччахьаш тӀекӀел охьаэгна, ткъа цхьа а стаг Соьга гӀо доьхуш ца кхойкху».

⁸«Эпрайман халкъ вукху къаьмнех дӀаэделла. Иза буьйда дисинчу баьпках тера ду.

⁹Хийрачу къаьмнех болчу наха цуьнан ницкъ дӀаоьцу, ткъа цунна иза ца хаало. Къежделла Эпрайман халкъ, амма иза ца кхета.

⁹

¹⁰Массо а и бохамаш адамашна тӀебаьхкина, хӀетте а шайн Везачу Далла тӀе ца доьрзу уьш, адамаша Цуьнга гӀо а ца доьху. Иштта Исраилан халкъан куралло а цунна дуьхьал тоьшалла до.

¹⁰

¹¹Эпрайман халкъ кхокханах тарделла, иза сонта а, кхетам боцуш а ма ду! Цуьнан халкъо Мисар-махке гӀо доьху, Ашур-махка гӀо деха а доьду иза.

¹²Уьш тӀехбоьлхучу новкъахь Аса царна тӀе Сайн бой тосур ю. Стигалара олхазарш санна, Аса уьш охьабохкур бу. Церан гуламе бечу хааме хьаьжжина уьш нисбийр бу Аса [8]».

¹³«Къа ду церан, Суна уьш генабевлла дела. Уьш бохийна хир бу, шаьш Суна дуьхьалбевлла дела. Аса уьш кӀелхьарбохур бара, ткъа цара Суна харцдерг дуьйцура.

¹⁴Уьш цкъа а доггах ца кхойкху Соьга, амма шайн меттанашкахь боьлхуш бу. Шайн догӀмашкахь шаьш хеда а деш, Соьга доьху цара шайна кӀа а, чагӀар а далар. Ткъа и дарца Сох дӀабирзина уьш.

¹⁴

¹⁵Уьш Нисбийриг а, царна ницкъ Лург а Со велахь а, Суна дуьхьал зуламаш дан дагалецира цара.

¹⁶Суна тӀеберзаран метта, гӀийлачу харцдалла тӀебоьрзу уьш. Шен пхарца гӀокхана тӀе ца кхочу тешам боцу секхаӀад санна бу уьш. Церан элий туьро хӀаллакбийр бу, шайн кӀоршаме мотт бахьана долуш. ТӀаккха Мисаран халкъ доьлур ду царах».