Цапни-ЯхӀу 3:1-20 CHE2012 - Bible AI

¹Декъаза ю боьха а, сийсазъяьлла а, гӀело еш йолу а гӀала!

²Делан озе ла ца дугӀу цо, ша нисъяйтар тӀе ца оьцу. Иза Везачу Элана тӀе ца тевжа, шен Далла юххе ца гӀерта.

³Цуьнан баьччанаш — цунна юккъехь гӀигӀ деш долу лоьмаш санна бу. Цуьнан кхелахой — сарахь арайовлу берзалой санна бу, цхьа а даьӀахк сахуьлунга ца йолуьйтуш йолу.

⁴Цуьнан пайхамарш ларамаза а, ямарта а бу. Цуьнан динан дайша дезаниг сийсаздоккху, товрат-хьехам шайна пайда болчу агӀор хуьйцу цара.

⁵Веза Эла оцу гӀалина юккъехь ву, Иза нийса ву, харцдерг Цо ца до. ХӀора Ӏуьйранна, хийцамаш а ца беш, нийсонца лела Иза, амма харцо ечарна эхь бохург хӀун ду ца хаьа.

⁶Везачу Эло боху: «Ас халкъаш хӀаллакдина, церан чӀагӀонаш йохийна ю. Ас церан урамаш дассийна, хӀинца цхьа а ца лела церан урамашкахула. Церан гӀаланаш хӀаллакйина, цхьа а адам дац, бахархой а бац.

⁷Ас гӀалане бехира: „Соьга ларамах юьзна хилалалахь, Ас хьо нисъяр тӀеэцалахь!“ Иза иштта леллехь, цуьнан Ӏаш йолу меттиг йохийна хир яцара, цунна мел лерина таӀзар Ас дийр дацара. Амма цунна хӀетте а дерриг а шен гӀуллакхашна тӀехь телхина мел дерг дан лаьара.

⁸Иштта, хьежа Соьга, — боху Везачу Эло, — царна дуьхьал тоьшалла дан [4] Со гӀоттур волчу дийне хьежа. Ас билгалдаьккхина халкъаш тӀегулдар а, пачхьалкхаш тӀегулъяр а, Сайн оьгӀазалла царна тӀе Ӏанорхьама а, Сайн чӀогӀа дералла царна тӀе хьажорхьама а. Сан эмгараллин цӀаро дерриг а латта дӀакхоллур ду.

⁹ТӀаккха Ас юха а халкъашна цӀена мотт лур бу, массо а Везачу Эле кхайкхийтархьама а, белшах белш а тоьхна, Цунна гӀуллакх дайтархьама а.

¹⁰Хуша-мехкан хишна дехьа йолчу меттигашкара а Соьга доӀа дечара, Ас дӀасадаржийначу халкъо, Суна совгӀаташ дахьар ду.

¹¹Оцу дийнахь, Сан халкъ, Суна дуьхьал айхьа мел лелийначу гӀуллакхех хьуна эхь хета кхин оьшур дац, хӀунда аьлча оцу хенахь хьуна юкъара шайн кураллех сакъералуш берш Ас дӀабохур бу. Сан безачу лам тӀехь кхин дозаллаш дийр дац ахь.

¹²Амма шуна юкъахь Ас къарделла а, эсала долу а халкъ дуьтур ду, Везачу Эле сатуьйсуш долу.

¹³Исраилан халкъах бисинчара харцонаш лелор яц. Цара харцдерг а дуьйцур дац, церан багара мекара дерг а дер дац. Дежаш а, дуьйшуш а долу уьстагӀий санна, уьш бехаш хир бу, цхьаммо уьш кхерор а боцуш».

¹³

¹⁴Хазахетарца йиш локхуш хила, Цийонан йоӀ! [5] Доккхаде, Исраилан халкъ! Самукъане а хила, даггара сакъералуш а хила Ярушалайм-гӀалин йоӀ!

¹⁵Везачу Эло таӀзар шуна тӀера дӀадерзийна, шун мостагӀа а эккхийна! Исраилхойн паччахь волу Веза Эла шуна юкъахь ву — шайна бохамаш барх шу кхин кхера ца деза.

¹⁶Цу дийнахь Ярушалайме иштта эр ду: «Ма кхера, ва Цийон! Хьайн куьйгаш гӀел ма далийта!

¹⁷Шун Веза Дела шуна юкъахь ву, Иза шу кӀелхьардоху тӀемало ву. Шух сакъералуш воккхавер ву Иза, Шен безамца шу карладохур ду Цо [6], шух воккха а веш, йиш локхур ю Цо».

¹⁸Везачу Эло боху: «Билгалдаьхна долу деза денош даздан ца ларийна халахетачарах лаьцна аьлча, царах хӀонс хиллехь а, уьш сийсазбинехь а, Ас уьш юха схьагулбийр бу.

¹⁹Хьуна гӀело мел йиначарна таӀзар дийр ду Ас оцу хенахь. АстагӀа леларш кӀелхьарбохур бу, дӀасабаржийнарш тӀегулбийр бу. Ас уьш лоруьйтур бу, гӀарабохур бу уьш сийсазбохучу хӀокху дерриге а лаьтта тӀехь.

²⁰Оцу хенахь Ас шу схьа а далор ду, оццу дийнахь схьа а гулдийр ду. Ас шу гӀарадохур а ду, лоруьйтур а ду лаьтта тӀера массо а халкъашна юкъахь, Ас шун бӀаьргашна хьалха шун аьтто юхаметтахӀоттийначу хенахь», — боху Везачу Эло.