Ярми-ЯхӀу 22:1-30 CHE2012 - Bible AI

¹Везачу Эло иштта боху: «ЯхӀудхойн паччахьан цӀа а гӀой, цигахь хӀара дешнаш дӀаала:

²„Дауд-паччахьан тӀаьхьенах волу яхӀудхойн паччахь, ладогӀа Везачу Элера болчу хааме — ахь а, хьан тхьамданаша а, хӀокху кевнехула дӀасалелаш долчу хьан халкъо а ладогӀа!

³Иштта боху Везачу Эло: ‘Бакъдерг а, нийсо а лелае, гӀело йинарг гӀело еш волчух ларве, тӀевеаначу стагана гӀело ма е, иза дӀа а ма тетта, бай а, бисина Ӏаш болу зударий а ларбе, бехк боцучун цӀий а ма Ӏанаде хӀокху меттехь.

⁴Шайга аьлларг деш шу хилахь, Дауд-паччахьан тӀаьхьенах болу паччахьаш хӀокху паччахьан цӀенойн кевнехула чуоьхур бу. Уьш шайн тхьамданашца цхьаьна, гӀудалкхашна а, говрашна а тӀе а хийшина, кхузахула чубогӀур бу.

⁵Амма хӀокху дешнашка аша ла ца догӀахь, Аса Сайх дуй боу, — боху Везачу Эло, — хӀара цӀа Аса дассор ма ду’“».

⁶ЯхӀудхойн паччахьан цӀийнах лаьцна Везачу Эло иштта боху: «ГалӀад-мохк я Ливанун-лам санна хаза хьо Суна хетахь а, шен гӀаланашкахь цкъа а адам дехаш йоцу яьсса аре санна йийр ю Аса хьох.

⁷Аса шуна шу хӀаллакден берш бохур бу шуна дуьхьал, хӀораннан а карахь герз а долуш. Ткъа цара хьан уггар дика долу баганан дитташ, схьа а дохуш, цӀерга кхуьссур ду.

⁸Кхечу къаьмнех дуккха а наха, шаьш хӀокху гӀалина уллохула тӀехдуьйлучу хенахь, вовшашка хоьттур ду: „ХӀунда дина те Везачу Эло хӀокху тайпана гӀуллакх хӀокху йоккхачу гӀалина?“

⁹Царна жоп луш, эр ду: „Иза дина, шайн Везачу Дала бина барт дӀа а теттина, кхечу деланашна Ӏибадат а деш, царна Ӏамал а еш, уьш лелла дела“».

⁹

¹⁰Веллачу паччахьах белхар а ма хӀиттаде, иза дӀакхалхарх тийжарш а ма хӀиттаде. ХӀетте а, даггара тийжа цуьнан кӀантана, хӀинца йийсаре дӀавуьгуш волчу, иза кхин цкъа а цӀа ца верзарна а, ша вина мохк цунна кхин ца гарна а.

¹¹Везачу Эло яхӀудхойн паччахь волчу Юши-ЯхӀун кӀантах Шалумах [10] (шен да волчу Юши-ЯхӀул тӀаьхьа паччахь а хилла иза, кху меттера йийсаре дӀавигна а ву) лаьцна иштта боху: «Иза цкъа а кху метте юхавоьрзур вац.

¹²Иза мисархоша ша дӀавигначу меттехь лийр а ву, цунна хӀара мохк кхин гур а бац».

¹²

¹³Декъаза ву шен паччахьан цӀенош хьарамлонца дийриг, цӀенойн лакхара чоьнаш харцонца йийриг, шен махкахошка маьхза къахьоьгуьйтург, цара бинчу балхана алапа ца лург.

¹⁴Цо боху: «Аса сайна доккха цӀа дийр ду, шена чохь паргӀат чоьнаш а йолуш». Цо даккхий кораш а доху, пенаш баганан дечигца кечдо, царна цӀен басар а хьокху.

¹⁵Кхечарал айхьа баганан диттах дико чоьнаш кечйича, хьо паччахь хир ву моьтту хир ду хьуна? Хьан ден, кхечеран санна, даар-малар дара, амма цо нийсо а, бакъдерг а лелайора, ткъа цундела цуьнан аьтто хуьлура.

¹⁶Къен а, миска а волчун гӀуллакх цо нийсонца къастадора. Цундела иза дика вехаш вара. Иза дац те Со вовзар? — боху Везачу Эло. —

¹⁷Амма хьан бӀаьргаш а, дог а харцахьа хьайна са яккха а, бехк боцучеран цӀий Ӏано а, нахана гӀело а, ницкъ бан а бен тӀедерзийна дац.

¹⁸Цундела Везачу Эло яхӀудхойн паччахь волчу Юши-ЯхӀун кӀантах ЯхӀу-Якхамах лаьцна иштта боху: «Цхьаммо а, цунна тийжаш, эр дац: „Маржа-яӀ сан ваша! Маржа-яӀ сан йиша!“ Цхьаммо а, цунна тийжаш, эр дац: „Маржа-яӀ сан олахо! Маржа-яӀ сан паччахь!“

¹⁹Хьо, вир дӀа-ма-йоллара, дӀавуллур ву, хьан дакъа, Ярушалайман кевнал ара а даьккхина, охьакхуссур ду».

²⁰«Ливанунан лаьмнаш тӀе а валий, мохь тоха! Башан-махкахь мохь а бетта, Ярушалайман халкъ, Ӏабариман лаьмнаш тӀера хьан аз а айде. хӀунда аьлча массо а хьан бартхой эшийна бу.

²¹Хьо сашортехь бехачу хенахь, Ас хьоьга дӀахьедира, амма ахьа ладугӀур дац элира. Хьо къона долчу хенахь дуьйна а ахьа ла ца дугӀура Аса бохучуьнга.

²²Хьан массо а баьчча мохо дӀахьур ву, ткъа хьан бартхой йийсаре буьгур бу. ТӀаккха хьо юьхьӀаьржачу хӀуттур ву, айхьа мел лелийна зуламаш бахьана долуш.

²³Ливанунерчу дечигах йинчу гӀалахь вехаш волу хьо, баганан диттан дечигах динчу цӀеношкахь Ӏаш волу хьо, ма узарш дийр ду ахь, хьайна бохам тӀебеача, берах хьийзо зудчун лазарш санна хир бу иза!»

²⁴«Дийна волчу Сох чӀагӀо йо Аса, — боху Везачу Эло, — яхӀудхойн паччахь волу ЯхӀу-Якхаман кӀант ЯхӀу-Яхин, хьо Сан аьтту куьйган пӀелгара мухӀар хилча а, Аса хьо цу тӀера схьа а ваьккхина,

²⁵хьан са лоьхуш болчеран кара а дӀалур ву, иштта хьо кхоьруш волчу бавелхойн паччахьан Набухди-Нецаран а, хашадхойн кара а дӀалур ву.

²⁶Аса хьо а, хьо вина йолу хьан нана а шу дуьнен чу девлла доцучу хийрачу махка кхуьссур ду, цигахь шу лийр ду.

²⁷Хьуна хьайн махка юхаверза луур ду, амма хьо цига юхавоьрзур вац».

²⁸ЯхӀу-Яхин цӀе йолу хӀара стаг йохийна кхаба санна я цхьанна а ца оьшу кхаба санна ву те? ХӀунда лаьллина те иза шен доьзалца царна бевзаш а боцучу хийрачу махка дӀа?

²⁹Ва ЯхӀудан латта! Аса хьоьга чӀогӀа доьху, Везачу Элера болчу хӀокху хааме ладогӀа!

³⁰Иштта боху Везачу Эло: «ДӀаязде цу стагах лаьцна, тӀаьхье йоцуш волчу стагах санна, шен дахарехь аьтто кхин хир боцучух санна, хӀунда аьлча цуьнан тӀаьхьенах цхьаммо а, Дауд-паччахьан цӀийнах ша хиларна, ЯхӀуд-махкахь паччахьалла дийр ду».