1Mürin, Hiop a pälüeni,
2“Ika ai kewe riaföü repwe kilo, nge ai kewe feiengau meinisin repwe aükük,
3ellet repwe fokun chou seni pien aroset.
4Pun wokun Ewe mi Unusen Manaman föün esefich ra fotolong loi,
5Ifa usun, eman aas mi mwacho a wörüwör lupwen a mongö fetil,
6Nge ifa usun, aramas ra tongeni mongö mine a nepatapat, nge esap wor salt lon?
7Üsap fokun mochen mongö ena sokun mongö,
8Amwo Kot epwe ngeniei mine üa tüngor,
9Amwo Kot epwe niei, amwo epwe aitiewu pöün o ärieila.
10Ei epwe afisätä ai chip,
11Met sokun pöchökül üa eäni pwe epwe wor ai apilükülük?
12Ifa usun, ai pöchökül a usun chök pöchökülen ekewe fau, ika inisi a usun chök piras?
13Ellet, esap fokun wor ai tufich,
14Eman mi apilükingau chienan kewe repwe kirikiröch ngeni,
15Nge chiechiei kewe ra alichipüngüei usun chök ekewe öüwö mi pumong,
16usun chök ekewe öüwö mi urela ren ais me sno,
17nge lupwen fansoun pwichikar ra pwasala
18Ekewe chon sai ir chon amömö ra malechela seni aler,
19Ekewe chon sai ir chon amömö seni Tema me Sepa ra kütta ekewe öüwö mi pumong,
20nge lupwen ra tori ekewe öüwö, ra lichipüng o apilükingau.
21Iei usumi ngeniei.
22Ifa usun, üa tüngor ngenikemi pwe oupwe ngeniei eu lifang,
23Ifa usun, üa pwal tüngor ngenikemi pwe oupwe angasaeila seni ekewe chon oputaei,
24Oupwe asukuulaei, nge ngang üpwe fanafanala o aüseling,
25Kapas wenechar a fokun manaman.
26Ifa usun, oua ekiekin apwüngü mine üa apasa?
27Ämi oua fen tongeni üttüt won eman mi mäsen,
28Nge iei ouse mochen oupwe nenengeniei, pun ngang üsap chofana ngenikemi.
29Üa tüngor ngenikemi pwe oupwe ekieksefäl, ousap föri och mi pwüngingau.