1Ewe Samol mi Lapalap a kapas ngeni ai samol ewe king, “Kopwe mot lepelifichi tori üpwe anomu chon oputom pwe repwe lenien puun pecheöm.” + 110.1 Mat 22.44; Mark 12.36; Luk 20.42-43; Föf 2.34-35; 1.Kor 15.25; Ef 1.20-22; Kol 3.1; Ipr 1.13; 8.1; 10.12-13
2Ewe Samol mi Lapalap epwe alapala manen om nemenem lon wisom wisen king seni Sion. A apasa, “Kopwe nemenem won chon oputom.”
3Lon ränin om kopwe maun ngeni chon oputom noum aramas repwe etuk fän püsin letiper o üföüf ekewe üf mi pin. Usun amurenipwin mi nom lesosorusich, iei usun noum kewe alüal repwe feito reöm.
4Ewe Samol mi Lapalap a pwon fän akapel, nge esap siwili an ekiek, “En eman souasor tori feilfeilachök lon kotun Melkisetek.” + 110.4 Ipr 5.6; 6.20; 7.17,21
5Ewe Samol a nom lepelifichum. I epwe akufu ekewe king lon ewe rän a lingeringer.
6Epwe eäni kapwüng won chon ekewe mwü. Epwe aura ewe lenien maun ren somä o akufu ekewe king won unusen fanüfan.
7Ewe king epwe ün seni ewe öüwö mi nom ünükün ewe al, epwe pöchökülela ren o sopwela le win.