भजन-संहिता 51:1-19 CGOCV2024 - Bible AI

1हे परमेसर, अपन बड़े मया के मुताबिक मोर ऊपर दया कर; अपन बड़े करूना के मुताबिक मोर अपराधमन ला मिटा दे।

2मोर जम्मो अधरम ला धो डार अऊ मोर पाप ले मोला सुध कर।

3काबरकि मेंह अपन अपराध ला जानत हंव, अऊ मोर पाप ह हमेसा मोर आघू म रहिथे।

4मेंह तोर, सिरिप तोर बिरूध म पाप करे हवंव अऊ ओहीच काम करे हवंव, जऊन ह तोर नजर म पाप ए; एकरसेति तेंह अपन फैसला म सही अस अऊ जब नियाय करथस, त सही नियाय करथस।

5खचित, मेंह जनम ले पापी अंव, जब मोर दाई ह मोला गरभ म धरिस, तब ले मेंह पापी अंव।

6तभो ले तेंह हिरदय के सच्चई ले खुस होथस; तेंह मोला ओ गुपत जगह म बुद्धि सिखाय।

7जूफा+ 51:7 जूफा ह एक छोटे पऊधा ए, जेकर उपयोग पानी छिंचे या खून छिंचे या मनखे ला संस्कारिक रूप म सुध करे म होथे पऊधा ले मोला साफ कर, अऊ मेंह साफ हो जाहूं; मोला धो, अऊ मेंह बरफ ले घलो जादा सफेद हो जाहूं।

8मोला आनंद अऊ खुसी सबद सुनन दे; जऊन हाड़ामन ला तेंह कुचर दे हस, ओमन आनंद मनावंय।

9मोर पापमन ले तेंह अपन मुहूं ला छुपा ले अऊ मोर जम्मो अपराध ला मिटा दे।

10हे परमेसर, मोर म एक सुध हिरदय बना, अऊ मोर भीतर म नवां किसम ले एक अटल आतमा स्थापित कर।

11मोला अपन आघू ले झन निकाल या अपन पबितर आतमा ला मोर ले अलग झन कर।

12अपन करे गय उद्धार के आनंद ले मोला फेर भर दे मोला संभाले बर तोर बात माने के एक आतमा दे।

13तब मेंह अपराधीमन ला तोर हुकूम के सिकछा दूहूं, ताकि पापीमन तोर करा लहुंट आवंय।

14हे परमेसर, मोला खून बहाय के अपराध ले छुड़ा ले, तेंह परमेसर मोर उद्धारकर्ता अस, अऊ मेंह तोर धरमीपन के गीत गाहूं।

15हे परभू, मोर मुहूं ला खोल, अऊ मोर मुहूं ह तोर महिमा करही।

16तेंह बलिदान चघाय ले खुस नइं होवस, नइं तो मेंह येला लानतेंव; होम-बलिदान म तोला खुसी नइं होवय।

17टूटे मन ह परमेसर बर योग्य बलिदान ए; एक टूटे अऊ पछतापी मन हे परमेसर, तेंह येला तुछ नइं समझस।

18सियोन के उन्नति करे म, यरूसलेम सहर के दीवारमन के बनाय जाय म तोला खुसी मिलय।

19तब तेंह धरमी के बलिदान ले खुस होबे, याने कि पूरा होम-बलिदान चघाय ले खुस होबे; तब तोर बेदी म बईलामन ला चघाय जाही।

cle>