1एक दिन एलीसा अगमजानी ह अगमजानीमन के दल के एक मनखे ला बलाईस अऊ ओला कहिस, “अपन कनिहां ला बांध ले, अऊ हांथ म जैतून तेल के ये कुप्पी लेके रामोत-गिलाद जा।
2जब तेंह उहां हबरबे, त निमसी के पोता, यहोसापात के बेटा येहू के पता लगाबे अऊ ओकर करा जाबे। ओला ओकर संगवारीमन ले अलग एक ठन भीतर के कमरा म ले जाबे।
3तब ये कुप्पी ला लेके येकर तेल ला ओकर मुड़ म ढार देबे अऊ ये घोसना करबे, ‘यहोवा ह ये कहत हे: मेंह, तोला इसरायल के राजा के रूप म अभिसेक करत हंव।’ तब कपाट खोलके भाग जाबे; देरी झन करबे!”
4तब ओ जवान अगमजानी ह रामोत-गिलाद गीस।
5जब ओह उहां हबरिस, त देखिस कि सेना के अधिकारीमन एक संग बईठे रहंय, तब ओह कहिस, “हे सेनापति, मोर करा तोर बर एक संदेस हवय।”
6तब येहू ह उठके घर के भीतर गीस। अऊ अगमजानी ह येहू के मुड़ म तेल ला ढारके ये घोसना करिस, “यहोवा, इसरायल के परमेसर ह ये कहत हे: ‘मेंह यहोवा के मनखे इसरायलीमन ऊपर राजा होय बर तोर अभिसेक करत हंव।
7तोला अपन मालिक अहाब के घराना के नास करना हे, जेकर ले ईजेबेल के दुवारा बहाय गे मोर सेवक अगमजानीमन के खून अऊ यहोवा के जम्मो सेवकमन के खून के बदला ह पूरा होवय।
8अहाब के पूरा घराना ह नास हो जाही। मेंह इसरायल म अहाब के घराना के छोटे-बड़े हर एक पुरूस ला मार डारहूं—चाहे ओह गुलाम होवय या सुतंतर मनखे।+ 9:8 हर एक सासन करइया या अगुवा*
9मेंह अहाब के घराना ला नबात के बेटा यरोबाम के घराना सहीं अऊ अहियाह के बेटा बासा के घराना सहीं कर दूहूं।
10जहां तक ईजेबेल के बात ए, यिजरेल के भुइयां म कुकुरमन ओला खा जाहीं, अऊ ओला माटी देवइया कोनो नइं होहीं।’ ” तब ओ अगमजानी ह कपाट ला खोलके भाग गीस।
11जब येहू ह कमरा ले निकलके अपन संगी अधिकारीमन करा गीस, त ओमा के एक झन ह ओकर ले पुछिस, “सब ठीक-ठाक तो हवय? ओ पगला ह काबर तोर करा आय रिहिस?”
12ओमन कहिन, “येह सच नो हय; हमन ला सच बता।”
13तब ओमन तुरते अपन ऊपर पहिरे कपड़ा ला उतारिन अऊ ओकर खाल्हे सीढ़ी म बिछा दीन। तब ओमन तुरही फूंकके चिचियाके कहिन, “येहू ह राजा ए!”
14निमसी के पोता, यहोसापात के बेटा येहू ह योराम के बिरूध सडयंत्र करिस। (योराम अऊ जम्मो इसरायलीमन अराम के राजा हजाएल ले रामोत-गिलाद के रकछा करत रिहिन;
15पर राजा योराम+ 9:15 इबरानी म यहोराम* ह अपन घाव के ईलाज करवाय बर यिजरेल लहुंट गे रिहिस; अराम के राजा हजाएल ले लड़ई करत बेरा ओला अरामीमन घायल कर दे रिहिन।) तब येहू ह कहिस, “यदि तुमन मोला राजा बनाय के ईछा करत हव, त फेर कोनो ला सहर ले बाहिर झन जावन दव ताकि ये खबर यिजरेल तक झन पहुंच सकय।”
16तब येहू ह अपन रथ म चढ़के यिजरेल गीस, काबरकि योराम ह उहां अराम करत रिहिस अऊ यहूदा के राजा अहजयाह ह योराम ला देखे बर उहां गे रिहिस।
17जब यिजरेल के गुम्मट ऊपर खड़े पहरेदार ह येहू के सैनिक दल ला आवत देखिस, त ओह चिचियाके कहिस, “मोला एक सैनिक दल आवत दिखत हे।”
18तब एक घुड़सवार ह येहू ले भेंट करे बर गीस, अऊ ओकर ले कहिस, “राजा ह पुछत हवय, ‘का तुमन सांति के ईछा से आवत हव?’ ”
19तब राजा ह एक-दूसर घुड़सवार ला पठोईस। जब ओह ओमन करा गीस, त ओह कहिस, “राजा ह पुछत हवय: ‘का तुमन सांति के ईछा से आवत हव?’ ”
20तब पहरेदार ह कहिस, “ओह ओमन करा हबर गे हवय, पर ओह घलो लहुंटके नइं आवत हे। रथ ला चलानेवाला ह निमसी के बेटा येहू के सहीं लगत हे—ओह एक पागल के सहीं रथ ला दऊड़ाथे।”
21योराम ह हुकूम दीस, “जल्दी से मोर रथ ला तियार करव।” अऊ जब रथ ह तियार हो गीस, तब इसरायल के राजा योराम अऊ यहूदा के राजा अहजयाह, दूनों अपन-अपन रथ म चघके येहू ले भेंट करे बर गीन। ओमन जाके यिजरेली नाबोत के भुइयां म ओकर ले भेंट करिन।
22येहू ला देखके योराम ह पुछिस, “हे येहू, का तेंह सांति के ईछा से आय हस?”
23तब योराम ह मुड़िस अऊ भागत-भागत अहजयाह ला चिचियाके कहिस, “हे अहजयाह, धोखा होय हवय!”
24तब येहू ह अपन धनुस ला तानिस अऊ योराम के कंधा के बीच निसाना लेके तीर चलाईस। तीर ह योराम के हिरदय ला छेद दीस अऊ ओह अपन रथ म गिर गीस।
25तब येहू ह अपन रथ के अधिकारी बिदकर ले कहिस, “ओला उठा अऊ यिजरेली नाबोत के खेत म ओला फटिक दे। सुरता कर कि जब तें अऊ में एक संग ओकर ददा अहाब के पाछू-पाछू रथ चलावत रहेंन, तब यहोवा ह ओकर बिरूध ये अगमबानी करे रिहिस:
26‘कल नाबोत अऊ ओकर बेटामन के जऊन खून होईस, ओला मेंह देखे हंव, अऊ यहोवा ह घोसना करत हे कि खचित मेंह भुइयां के ये जगह म तोर ले बदला लूहूं, यहोवा ह घोसना करत हे।’+ 9:26 देखव 1 राजा 21:19* त अब यहोवा के ओ बचन के मुताबिक ओला उठा अऊ ओ भुइयां के ओ जगह म फटिक दे।”
27जब यहूदा के राजा अहजयाह ह ये सब ला देखिस, त ओह बेत-हग्गान नगर के रसता ले भागिस।+ 9:27 या बारी के घर के रसता ले भागिस* येहू ह ये चिचियावत ओकर पीछा करिस, “ओला घलो मार डारव!” त ओमन ओला ओकर रथ म यिबलाम के लकठा म गूर के चढ़ईवाले रसता म घायल कर दीन, पर ओह बचके मगिद्दो तक निकल गीस अऊ उहां मर गीस।
28तब अहजयाह के सेवकमन रथ म ही ओला यरूसलेम ले गीन अऊ दाऊद के नगर म ओकर पुरखामन के संग ओला ओकर कबर म माटी दीन।
29(अहाब के बेटा योराम के राज के गियारहवां साल म अहजयाह ह यहूदा के राजा बने रिहिस।)
30तब येहू ह यिजरेल म आईस। जब ईजेबेल येकर बारे म सुनिस, त अपन आंखी म काजर आंजिस, अपन बाल बनाईस अऊ खिड़की म ले देखन लगिस।
31जब येहू ह दुवार के भीतर आईस, त ईजेबेल ह पुछिस, “हे अपन मालिक के घात करइया जिमरी, का तें सांति के ईछा से आय हस?”
32तब ओह ऊपर खिड़की कोति देखिस अऊ पुछिस, “मोर कोति कोन हवय? कोन?” दू या तीन खोजामन खाल्हे ओकर कोति देखिन।
33तब येहू ह कहिस, “ओला उहां ले फेंक दव!” तब ओमन ओला उहां ले खाल्हे फेंक दीन, अऊ ओकर लहू के कुछू छींटा ह दीवार अऊ घोड़ामन ऊपर पड़िस जब ओमन ओला गोड़ खाल्हे कुचर डारिन।
34तब येहू ह महल भीतर जाके खाईस अऊ पीईस अऊ कहिस, “जावव, ओ सरापित माईलोगन ला देखव, अऊ ओला माटी दे दव, काबरकि ओह एक राजा के बेटी रिहिस।”
35पर जब मनखेमन ओला माटी दे बर बाहिर निकलिन, त ओमन ला ओकर खोपड़ी, ओकर पांव अऊ ओकर हांथमन के छोंड़ अऊ कुछू नइं मिलिस।
36ओमन वापिस जाके येहू ला ये बात बताईन, त येहू ह कहिस, “येह यहोवा के ओ बचन अय, जेला ओह अपन सेवक तिसबी एलियाह के जरिये कहे रिहिस: ईजेबेल के मांस ला यिजरेल के भुइयां म कुकुरमन खाहीं।+ 9:36 देखव 1 राजा 21:23*