1 Ar-ari 19:1-21 RIPV1996 - Bible AI

¹Imbaga ni Ari Ahab ken ni asawana a Jezebel ti amin nga inaramid ni Elias ken ti panangpapatayna kadagiti amin a profeta ni didiosen a Baal.

²Pinaibaga ni Jezebel ken ni Elias: “Uray patayendak dagiti didiosen no diak aramiden kenka iti kastoy nga oras inton bigat ti kas iti inaramidmo kadagiti profeta.”

³Nagbuteng ni Elias ket naglibas tapno maispal ti biagna. Intugotna ti adipenna ket napan idiay Beerseba iti sakup ti Juda. Imbatina ti adipenna sadiay.

⁴Nagmalmalemⓞ a nagna ni Elias a nagturong iti let-ang. Nagsardeng ket nagtugaw iti sirok ti maysa a kayo. Tinarigagayanna ti matay ket inkararagna, “Saanakon a makaibtur, O APO. Alaemon ti biagko; nasaysayaat laengen a matayak!”

⁵Nagidda iti sirok ti kayo ket nakaturog. Pagammoan, sinagid ti maysa nga anghel a nagkuna kenkuana, “Agriingka ta manganka.”

⁶Inwaras ni Elias ti panagkitana. Iti asideg ti ulona, nakitana ti maysa a tinapay ken sangakaramba a danum. Nangan ken imminum ni Elias sa nagidda manen.

⁷Nagsubli ti anghel ni Yahweh ket riniingna manen. Kinunana, “Bumangonka ket manganka tapno adda pamigsam nga agdaliasat.”

⁸Bimmangon ni Elias. Nangan ken imminum. Ket pinapigsa ti taraon iti pannagnana iti 40 nga aldaw agingga a dimmanon iti Horeb,[37] ti nasagradoan a bantay.

⁹Sadiay, simrek ni Elias iti maysa a rukib tapno umian.

⁹Pagammoan, nagsao kenkuana ni Yahweh, “Elias, ania ti ar-aramidem ditoy?”

¹⁰Insungbatⓟ ni Elias, “O APO a Dios a Mannakabalin-amin, kanayon a siksika laeng ti pagserserbiak. Ngem winaswas dagiti Israelita ti katulaganda kenka, rinebbada dagiti altarmo ken pinapatayda dagiti amin a profetam. Sisiakon ti nabati—ket kayatdak pay a patayen!”

¹¹“Rummuarka ket agtakderka iti sangoanak iti tapaw ti bantay,” kinuna ni Yahweh kenkuana. Limmabas ni Yahweh ket nangyeg iti napigsa nga angin a namagrenggat kadagiti turod ken nangburburak kadagiti batbato—ngem awan ni Yahweh iti angin. Nagsardeng ti angin ket nagginggined—ngem awan ni Yahweh iti ginggined.

¹²Kalpasan ti ginggined, adda apuy—ngem awan ni Yahweh iti apuy. Ket kalpasan ti apuy, adda bassit a timek.

¹³Idi mangngeg ni Elias ti timek, inabbonganna ti rupana iti kagayna. Rimmuar ket nagtakder iti pagserkan ti rukib. Adda timek a nagkuna kenkuana, “Elias, ania ti ar-aramidem ditoy?”

¹⁴Insungbatna, “O APO a Mannakabalin-amin a Dios, kanayon a siksika laeng ti pagserserbiak. Ngem winaswas dagiti Israelita ti katulaganda kenka, rinebbada dagiti altarmo ket pinapatayda dagiti amin a profetam. Sisiakon ti nabati—ket kayatdak pay a patayen.”

¹⁵Kinunaⓠ ni Yahweh, “Agsublika ket inka iti let-ang iti asideg ti Damasco. Inton dumtengka iti siudad, ikonsagrarmo ni Hazael nga ari ti Siria.

¹⁶Ikonsagrarmoⓡ met ni Jehu nga anak ni Nimsi nga ari ti Israel ken ni Eliseo nga anak ni Safat a taga-Abel Mehola a mangsukat kenka a profeta.

¹⁷No adda makalisi iti kampilan ni Hazael, patayento ni Jehu. Ket no adda met makalisi ken ni Jehu, patayento ni Eliseo.

¹⁸Nupayⓢ kasta, saanko a patayen ti 7,000 a tattao iti Israel—dagiti amin a napudno kaniak ken saan a nagdaydayaw ken ni Baal wenno nangagep iti imahenna.”

¹⁹Pimmanaw ni Elias ket nasarakanna ni Eliseo nga agar-arado. Sangapulo ket dua a paris a naisangol a baka ti pagar-aradona ket iturturongna ti maudi a paris. Inikkat ni Elias ti kagayna ket inkabilna ken ni Eliseo.

²⁰Pinanawan ni Eliseo dagiti bakana sana kinamakam ni Elias ket kinunana kenkuana, “Innak man pay agpakada kadagiti nagannak kaniak ket kalpasanna sumurotakto kenka.”

²⁰“Ala, agsublika ngarud. Saanka a lapdan!”[38] insungbat ni Elias.

²¹Napan ni Eliseo iti yan dagiti naisangol a bakana. Pinartina dagiti baka sana linuto ti karneda; inaramatna dagiti sangol a pagsungrod. Impakanna kadagiti tattao ti linutona. Kalpasanna, sinurotna ni Elias ket nagbalin a katulonganna.