1 Ar-ari 2:1-46 RIPV1996 - Bible AI

¹Idi dandani matayen ni David, inayabanna ni Solomon nga anakna ket intedna dagiti maudi a bilinna:

²“Asidegen ti innak panaginana. Bumilegka ket ipakitam a malalakika.

³Aramidem dagiti pagrebbengam iti APO a Diosmo. Tungpalem amin a linteg ken bilinna a kas nailanad iti Linteg ni Moises tapno agballigika iti amin nga aramidmo iti uray sadino a papanam.

⁴No aramidem daytoy, tungpalento ti APO ti karina idi imbagana kaniak nga agturayto dagiti kaputotak iti Israel no la ket naannadda nga agtulnog kadagiti bilinko iti amin a puso ken kararuada.

⁵“Addaⓒ pay sabali nga ibilinko. Malagipmo ti inaramid kaniak ni Joab? Pinatayna dagiti dua a kapitan ti armada ti Israel—ni Abner nga anak ni Ner ken ni Amasa nga anak ni Jeter. Ammom a pinatayna ida iti tiempo ti talna a kas panagibalesna kadagiti panagpapatayda idi tiempo ti gubat. Pinatayna dagiti awan basolna;[2] ita, siak ti agikaro iti inaramidna ket agsagabaak.[3]

⁶Ammomon ti aramidem. Masapul a nadawel ti ipapatayna.

⁷“Ngemⓓ kaasiam koma dagiti annak ni Barsillai a taga-Galaad. Aywanam ida. Ngamin, naimbagda kaniak idi itartarayak daydi kabsatmo nga Absalom.

⁸“Dakesⓔ ti inaramid kaniak ni Simei nga anak ni Gera a taga-Bahurim iti sakup ti Benjamin. Inlunodnak iti daydi nga aldaw nga ipapanko idiay Mahanaim ngem idi masabatnak iti Karayan Jordan, insapatak kenkuana a diak papapatay.

⁹Nupay kasta, dusaem a dusaen. Ammom ti aramidem ket masapul a papapataymo.”

¹⁰Natay ni David ket naitabon iti Siudad ni David.

¹¹Uppatⓕ a pulo a tawen a nagari iti Israel. Pito a tawen a nagturay idiay Hebron ken 33 a tawen idiay Jerusalem.

¹²Nagariⓖ ni Solomon a sukat ni amana a David, ket natalged ti panagturayna iti pagarian.

¹³Napan ni Adoniha nga anak ni Haggit ken ni Batseba nga ina ni Solomon. “Nasayaat kadi ti panggepmo nga immay?” sinaludsod ni Batseba. “Wen,” insungbat ni Adoniha

¹⁴sana innayon, “Adda koma dawatek kenka.”

¹⁴“Ania dayta?” sinaludsod ni Batseba.

¹⁵Kinuna ni Adoniha, “Ammom a siak koma ti nagari kas ninamnama ti amin iti Israel. Ngem sabali ti naaramid ta ni kabsatko ti nagari ta isu ti pagayatan ti APO.

¹⁶Ita, adda kiddawek kenka ket dinak koma paayen.”

¹⁶“Ania ti kiddawem?” sinaludsod ni Batseba.

¹⁷Kinunaⓗ ni Adoniha, “Ipakpakaasim ken ni Ari Solomon nga itedna nga asawak ni Abisag a Sunamita. Ammok a dinaka paayen.”

¹⁸“Ala wen,” insungbat ni Batseba. “Bay-am ta siak ti makisao iti ari.”

¹⁹Napan ni Batseba ken ni Ari Solomon tapno ibagana ti dawat ni Adoniha. Timmakder ti ari a nangkablaaw ken ni Batseba ket nagtamed ken ni inana. Nagtugaw iti tronona sa nagpaala iti pagtugawan ni inana. Nagtugaw ni Batseba iti makannawanna.

²⁰Kinuna ni Batseba, “Adda la bassit kiddawek kenka. Dinak koma paayen.”

²⁰“Ania ti kiddawenyo?” sinaludsodna. “Dikayo mabalin a paayen.”

²¹Kinuna ni Batseba, “Itedmo koma ni Abisag nga asawaen ni kabsatmo nga Adoniha.”

²²“Apay a kiddawem kaniak nga itedko ni Abisag ken ni Adoniha?” sinaludsod ti ari. “Kasla metten kiniddawmo nga itedko met kenkuana ti trono. Total, isu ti inauna a kabsatko ket kaduana pay ni Abiatar a padi ken ni Joab!”[4]

²³Kalpasanna, insapata ni Solomon, “Gapu ta kiniddaw ni Adoniha daytoy, ti biagna ti pagbayadna. Patayennak ti Dios no diak aramiden daytoy!

²⁴Natalged ti panangisaad ti APO kaniak iti trono ni David nga amak. Tinungpalna ti karina ket intedna ti pagarian kaniak ken kadagiti kaputotak. Isapatak iti imatang ti sibibiag nga APO a mapapatay ni Adoniha ita met la nga aldaw!”

²⁵Binilin ni Ari Solomon ni Benaias. Rimmuar ni Benaias ket pinatayna ni Adoniha.

²⁶Kinunaⓘ ni Ari Solomon ken ni Abiatar a padi, “Agawidka idiay ilim nga Anatot. Rumbeng a matayka, ngem dikan papapatay gapu ta inay-aywanam ti Lakasa ti Tulag ti APO idi panawen ni David nga amak ken gapu ta nakipagrigrigatka kenkuana iti amin a nagpasaranna.”

²⁷Itiⓙ kasta, inikkat ni Solomon ni Abiatar a kas padi ni Yahweh. Natungpal ngarud ti sao ni Yahweh idiay Silo maipapan ken ni Eli a padi ken dagiti kaputotanna.

²⁸Idi nadamag ni Joab ti napasamak, nagkamang iti Tolda ti Dios ket kimpet kadagiti sinan-sara iti nagsusulian ti altar. (Inayonanna ni Adoniha ngem dina kinanunongan ni Absalom.)

²⁹Idi maammoan ni Solomon a naglemmeng ni Joab iti nasagradoan a Tolda ket adda iti altar, nangibaon iti mapan mangsaludsod kenkuana no apay a nagkamang sadiay. Imbaga ni Joab a nagkamang ken ni Yahweh agsipud ta mabuteng ken ni Solomon. Ngarud, binaon ni Solomon ni Benaias a mapanna patayen ni Joab.

³⁰Napan ni Benaias iti nasagradoan a Tolda ket kinunana ken ni Joab, “Imbilin ti ari a rummuarka.” Nagsubli ni Benaias iti ari ket impakaammona ti imbaga ni Joab.

³⁰“Diak kayat,” insungbat ni Joab. “Matayak ditoy.”

³¹“Aramidem ti pagayatanna,” insungbat ni Solomon. “Patayem samo itabon. Iti kasta, saanen a siak ken ti familiak ti agikaro iti panangpatayna kadagiti tattao nga awan basolna.

³²Dusaen ti APO ni Joab gapu kadagitoy nga inaramidna a dina impakaammo ken ni amak a David. Pinatayna ti dua a lallaki a naim-imbag ngem isu: ni Abner a kapitan ti armada ti Israel ken ni Amasa a kapitan ti armada ti Juda.

³³Agdissuor ken ni Joab ken kadagiti kaputotanna ti agnanayon a pannakadusada gapu kadagitoy nga inaramidna. Ngem kanayon a pagballigien ti APO dagiti kaputotan ni David nga agtugaw iti tronona.”

³⁴Napan ngarud ni Benaias iti nasagradoan a Tolda ket pinatayna ni Joab. Naitabon ni Joab iti balayna iti away.

³⁵Kas sukat ni Joab, insaad ti ari ni Benaias a kapitan ti armada. Insaadna met ni Zadok a padi iti lugar ni Abiatar.

³⁶Pinaayaban ti ari ni Simei ket kinunana kenkuana, “Agpatakderka iti balaymo ditoy Jerusalem. Agnaedka ditoy ket dika pumampanaw iti siudad.

³⁷No pumanawka ket mapanka iti labes ti Waig ti Kidron, awan duadua a matayka ket sikanto met la ti akimbasol.”

³⁸“Aramidek ti ibagam, Natan-ok nga Ari,” insungbat ni Simei. Nabayag a nagnaed ni Simei idiay Jerusalem.

³⁹Ngem kalpasan ti tallo a tawen, dua kadagiti tagabuna ti nagtalaw ket nagkamangda ken ni Aquis nga ari ti Gat ken anak ni Maaca. Idi madamag ni Simei nga addada idiay Gat,

⁴⁰sinilyaanna ti asnona ket napan ken ni Ari Aquis tapno sapulenna dagiti tagabuna. Nasarakanna ida ket inyawidna ida.

⁴¹Idi nadamag ni Solomon ti inaramid ni Simei,

⁴²pinaayabanna ket kinunana kenkuana, “Pinagkarika idi a dika pumampanaw ditoy Jerusalem. Binallaaganka a no rummuarka iti siudad, awan duadua ti pannakapapataymo. Dimo met aya imbaga a tungpalem daytoy?

⁴³Apay ngarud a dimo tinungpal ti karim ket sinalungasingmo ti bilinko?

⁴⁴Ammom ti amin a kinadakes nga inaramidmo iti daydi amak a David. Dusaennaka ti APO iti daytoy.

⁴⁵Ngem bendisionannak ti APO ket ipasdekna a sitatalged iti agnanayon ti pagarian ni David.”

⁴⁶Binilin ti ari ni Benaias. Rimmuar ni Benaias ket napanna pinatay ni Simei. Naan-anayen ti kinatalged ti panangituray ni Solomon iti pagarian.