1 Ar-ari 7:1-51 RIPV1996 - Bible AI

¹Nangaramid met ni Solomon iti palasio a pagnaedanna ket 13 a tawen sa nalpas.

²Kastoy ti rukod ti Salas a maawagan iti Bakir ti Libano: 150 a kadapan ti kaatiddogna, 75 a kadapan ti kaakabana ken 45 a kadapan ti kangatona. Adda tallo[9] a binnatog nga adigi a sedro ket naiparabaw kadagitoy dagiti awanan a sedro. Sangapulo ket lima nga adigi iti tunggal binnatog. Sedro met ti bobeda ket dumanon kadagiti kuarto a pagidulinan a naisaad kadagiti adigi.

⁴Iti agsumbangir a diding, adda tallo a batog a tawa iti tallo a tukad.

⁵Rektanggulo ti bastidor dagiti tawa[10] ken ridaw. Dagiti tallo a binnatog a tawa iti maysa a bakud agsisinnangoda kadagiti adda iti bangir a diding.

⁶Pitopulo ket lima a kadapan ti kaatiddog ti salas a maawagan iti Salas dagiti Adigi ket 45 a kadapan ti kaakabana. Adda nalinongan a beranda a naisaad kadagiti adigi.

⁷Nakalupkopan iti sedro ti Salas ti Trono, manipud datar agingga kadagiti pasag.[11] Maaw-awagan pay daytoy a kuarto iti Salas a Pangukoman a pangrisutan ni Solomon kadagiti maidatag a kaso.

⁸Naaramidⓣ ti pagtaengan ni Solomon iti sabali a paraangan iti likudan ti Salas a Pangukoman. Umasping kadagiti dadduma a patakder. Kasta ti binangonna a pagnaedan ti asawana nga anak ti Faraon nga ari ti Egipto.

⁹Naaramid amin dagitoy a patakder, manipud kadagiti fondasion agingga kadagiti sagumaymayda, kadagiti bato a naisagana iti pagtikapan iti bato. Natikapan dagitoy a bato kas mayannurot iti rukodda ket naragadi ti akin-uneg ken akinruar a bangirda.

¹⁰Naaramid dagiti fondasion iti dadakkel a bato a naisagana iti pagtikapan iti bato; adda dagiti bato a 15 a kadapan ket adda met dagiti agrukod iti 12 a kadapan.

¹¹Naparabawan dagiti fondasion iti batbato ken kayo a sedro.

¹²Nadidingan ti paraangan ti palasio, ti akin-uneg a paraangan ti Templo, ken ti kuarto iti pagserkan ti Templo. Naaramid dagiti diding kadagiti sedro ken batbato. Naibaet ti katuon a sedro iti tunggal tallo a katuon a batbato.

¹³Pinaayaban ni Ari Solomon ti maysa a tao nga agnagan iti Hiram nga agnaed iti siudad ti Tiro. Nalaing nga agpanday kadagiti alikamen a bronse.

¹⁴Taga-Tiro ni amana a mammanday met iti bronse idi sibibiag pay. Nagtaud iti tribu ti Neftali ti ina ni Hiram. Masirib ken adun ti padas ni Hiram a kas mammanday. Inawatna ti awis ni Ari Solomon tapno ipanguloanna ti amin a trabaho iti bronse.

¹⁵Nangsukog ni Hiram iti dua nga adigi a bronse a 27 a kadapan ti katayag ti tunggal maysa ket 18 a kadapan ti rukodna iti aglawlaw.[12] Inkabilna dagitoy iti pagserkan ti Templo.

¹⁶Nangaramid met iti dua a bronse a paratok a maisaad iti tuktok ti adigi. Agtayag ti tunggal maysa iti 7 1/2 a kadapan.

¹⁷Naarkosan ti tuktok ti tunggal adigi iti aglilinnaga a kawar[13]

¹⁸ket dua nga intar ti sinan-granada a bronse.

¹⁹Kasla sabong ti lirio ti sukog dagiti paratok. Innem a kadapan ti katayagda

²⁰ken naiparabawda iti nagtimbukel a paset iti ngatoen dagiti aglilinnaga a kawar. Adda dua nga intar ti sinan-granada iti lawlaw ti tunggal[14] paratok, sagsangagasut a granada iti kada intar.

²¹Impatakder ni Hiram dagiti dua a bronse nga adigi iti sango ti pagserkan ti Templo. Napanaganan iti Jakin[15] ti akin-abagatan nga adigi ket Boaz[16] met ti akin-amianan.

²²Naisaad dagiti sinan-lirio a paratok iti rabaw dagiti adigi.

²²Nalpas ti pannakaaramid dagiti adigi.

²³Nanglunag ni Hiram iti bronse ket nangaramid iti nagtimbukel a tangke. Pito ket kagudua a kadapan ti kaunegna, 15 a kadapan ti ngarabna ket 45 a kadapan iti aglawlawna.

²⁴Nalikmut ti akinruar a ngarab iti dua nga intar a sabsabong a bronse nga 45 a kadapan iti tunggal intar a nasukog a sangsangkamaysa iti tangke.

²⁵Naisaad ti tangke kadagiti bukot ti 12 a sinan-baka a bronse. Sumango iti ruar dagitoy a sinan-baka ket saggatlo ti sumango iti daya, laud, abagatan ken amianan.

²⁶Tallo a pulgada ti kapuskol ti tangke. Kasla ngarab ti kopa ti sukog ti ngarabna ket kasla agukrad a sabong. Malaon ti tangke ti agarup 10,000 a galon a danum.

²⁷Nangaramid met ni Hiram iti sangapulo a bronse a kariton. Innem a kadapan ti kaatiddog ti tunggal maysa: innem a kadapan ti kaakabada ken 4 1/2 a kadapan ti katayagda.

²⁸Naaramid dagitoy kadagiti kuadrado a tapi a naimontar kadagiti bastidor.

²⁹Adda imahen dagiti leon, baka ken kerubim kadagiti tapi. Kadagiti bastidor, iti ngatoen ken iti babaen dagiti sinan-leon ken sinan-baka, adda dagiti agkawkawikaw a ladawan.

³⁰Adda uppat a bronse a pilid ken bronse nga ehe ti tunggal kariton. Kadagiti uppat a suli, adda dagiti bronse a pagbatayan ti palanggana; naarkosan dagitoy kadagiti imahen a nagkawikaw.

³¹Adda nagtimbukel a bastidor a mamagkamang kadagiti pagbatayan ti palanggana. Agdawadaw daytoy iti 18 a pulgada manipud iti rabaw ti kariton ket umuneg iti pito a pulgada. Nakitikitan ti aglawlawna.

³²Agtayag iti 25 a pulgada ti tunggal pilid; addada iti babaen dagiti tapi ket sangsangkanayon ti ehe ken ti kariton.

³³Kasla pilid ti lugan a pakigubat ti pilid ti kariton. Pasig a bronse ti ehe, basikaw, rayos ken palaupo.

³⁴Natukal amin dagiti uppat a suli ti kariton; sangsangkanayon dagiti tukal ken ti kariton.

³⁵Adda siam a pulgada ti kaakabana a barikes a naipulipol iti rabaw ti tunggal kariton; dagiti pagbatayanna ken dagiti tapi sangsangkanayonda iti kariton.

³⁶Naarkosan dagiti pagbatayan ken dagiti tapi kadagiti imahen ti kerubim, leon ken kayo a palma ket masarakanda no la ket adda pagyananda. Adda dagiti agkawikaw a ladawan iti aglikmut.

³⁷Kastoy ti pannakaaramid dagiti sangapulo a kariton. Agpapadada iti sukog ken rukod.

³⁸Nangaramidⓤ pay ni Hiram iti sangapulo a palanggana, maysa a palanggana iti tunggal kariton. Innem a kadapan ti ngarab ti tunggal palanggana ket malaonna ti 200 a galon a danum.

³⁹Inkabilna ti lima a kariton iti Templo iti bangirna ti abagatan ken ti sabali a lima iti amianan. Inkabilna ti tangke iti abagatan-a-daya a suli ti Templo.

⁴⁰Nangaramid pay ni Hiram kadagiti banga, pala, ken malukong. Nalpasna amin a trabahona nga agpaay iti Templo ni Yahweh, kas imbaga ni Ari Solomon. Dagitoy ti inaramidna: Dagiti dua nga adigi Dagiti dua a sinan-malukong a paratok iti tuktok dagiti adigi Dagiti aglilinnaga a kawar iti tunggal paratok Dagiti 400 a sinan-granada a naipalikmut kadagiti aglilinnaga a kawar iti tunggal paratok; dua nga intar a sagsasangagasut ti adda iti tunggal paratok Dagiti sangapulo a kariton Dagiti sangapulo a palanggana Ti tangke Dagiti 12 a sinan-baka a nakaisaadan ti tangke Dagiti banga, pala ken malmalukong Pasig a napasileng a bronse amin dagitoy nga alikamen ti Templo nga inaramid ni Hiram para ken ni Ari Solomon.

⁴⁶Pinaaramid ti ari amin dagitoy iti pagsukogan ti metal nga adda iti nagbaetan ti Succot ken Zaretan iti Tanap ti Jordan.

⁴⁷Saan a pinatimbang ni Solomon dagitoy bronse nga alikamen; aduda ket narigat nga ammoen ti dagsenda.

⁴⁸Nagpaaramidⓥ pay ni Solomon kadagiti balitok nga alikamen ti Templo: ti altar a balitok, ti lamisaan ti tinapay a maidaton iti Dios,

⁴⁹dagitiⓦ sangapulo a balitok a kandelero iti sangoanan ti Kasasantoan a Disso, lima iti akinkannawan ket lima met iti akinkannigid; dagiti sinan-sabong a balitok, dagiti balitok a pagsilawan ken sipit;

⁵⁰dagiti balitok a kopa, pagarsang, malukong, insensario ken dagiti pagikkan iti beggang; ken dagiti bisagra dagiti ridaw ti akin-uneg ken masungad a santuario.

⁵¹Idiⓧ malpas ni Ari Solomon ti amin a trabaho iti Templo, inkabilna kadagiti pagiduldulinan ti Templo dagiti amin nga alikamen nga indaton daydi amana a David ken ni Yahweh—ti pirak, ti balitok ken dadduma nga alikamen.