1 Cronicas 13:1-14 RIPV1996 - Bible AI

¹Nakiuman ni David kadagiti amin nga ofisiales a pangulo dagiti mannakigubat a sagsasangaribu ken sagsasangagasut.

²Kalpasanna, impakaammona kadagiti amin nga Israelita, “No mayatkayo ken no pagayatan ti APO a Diostayo, paayabantayo dagiti kailiantayo, dagiti papadi ken Levita kadagiti il-ilida ket makitaripnongda kadatayo ditoy.

³Intay alaen ti Lakasa ti Tulag ti Dios a nabaybay-an idi ari ni Saul.”

⁴Naragsakan dagiti tattao iti singasing ni David ket inanamonganda.

⁵Itiⓜ kasta, pinaayaban ni David dagiti amin nga Israelita iti entero a pagilian manipud iti beddeng ti Egipto iti abagatan agingga idiay Bessang ti Hamat iti amianan. Naummongda tapno alaenda ti Lakasa ti Tulag nga adda iti Siudad ti Jearim ket ipanda idiay Jerusalem.

⁶Napanⓝ ni David ken dagiti Israelita idiay Baala, kayatna a sawen, iti Siudad ti Jearim iti sakup ti Juda, tapno alaenda ti Lakasa ti Tulag ti Dios a mangipakita iti nailangitan a trono ni Yahweh.

⁷Innalada ti Lakasa ti Tulag iti balay ni Abinadab sada inlugan iti baro a kariton. Iturturong da Uzza ken Ahio ti kariton

⁸kabayatan ti panagsala ni David ken dagiti amin nga Israelita a pammadayaw iti Dios. Nagkakantada a dinanggayan dagiti arpa ken lira, pandereta, piangpiang ken trumpeta.

⁹Idi dumtengda iti pagtaltagan idiay Kidon, naitibkol dagiti baka isut' gapuna a tinengngel ni Uzza ti Lakasa ti Tulag.

¹⁰Simgiab ti pungtot ni Yahweh ket pinatayna ni Uzza gapu ta sinagidna ti Lakasa. Natay sadiay ni Uzza iti imatang ti Dios ket

¹¹manipud idin, maaw-awagan dayta a lugar iti Perez Uzza.[29] Nakaunget ni David gapu ta iti pungtot ni Yahweh, dinusana ni Uzza.

¹²Nagbuteng ni David iti Dios ket kinunana, “Kasano nga alaek itan ti Lakasa ti Tulag?”

¹³Dina inyawid ti Lakasa ti Tulag idiay Jerusalem; imbatina ketdi iti balay ti maysa a tao nga agnagan iti Obed Edom a taga-siudad ti Gat.

¹⁴Talloⓞ a bulan a nagyan sadiay ti Lakasa ti Tulag ket binendisionan ti APO ti familia ni Obed Edom ken ti amin a sanikuana.