1 Cronicas 18:1-17 RIPV1996 - Bible AI

¹Iti saan a mabayag, rinaut manen ni David dagiti Filisteo ket pinarmekna ida. Sinakupna ti siudad ti Gat ken dagiti kabangibangna a barrio.

²Pinarmekna met dagiti Moabita. Inturayanna ida ket nagbaybayadda kenkuana iti buis.

³Insaruno ni David a rinaut ni Adadezer nga ari ti Soba, iti asideg ti Hamat, gapu ta kayat ni Adadezer a sakupen ti daga iti surong ti Karayan Eufrates.

⁴Innala ni David ti 1,000 a lugan a pakigubat, 7,000 a mannakigubat a nagsakay iti kabalio ken 20,000 a saan a nagkabalio. Nangibati iti umanay a bilang ti kabalio a pagguyod kadagiti 100 a lugan ket pinilayna dagiti dadduma.

⁵Idi dumteng ti armada nga imbaon dagiti taga-Siria nga adda idiay Damasco a tumulong ken ni Ari Adadezer, dinarup ni David ket pinatayna ti 22,000 a mannakigubat.

⁶Nangipasdek ni David kadagiti kampo ti militar iti masakupan dagiti taga-Siria. Inturayanna dagiti Siriano ket pinagbuisna ida. Pinagballigi ni Yahweh ni David iti amin a nakigubatanna.

⁷Innala ni David dagiti balitok a kalasag dagiti ofisiales ni Adadezer sana impan idiay Jerusalem.

⁸Nakaad-aduⓧ met a bronse ti innalana idiay Tibhat ken Cun, dagiti siudad nga inturayan ni Adadezer. Inaramat ni Solomon dagitoy a bronse iti pannakaaramid ti nakadakdakkel a palanggana, dagiti adigi ken dagiti alikamen iti Templo.

⁹Nadamag ni Toi nga ari ti Hamat a pinarmek ni David ti entero nga armada ni Adadezer.

¹⁰Imbaonna ngarud ni Joram nga anakna tapno kablaawanna ni Ari David ken yebkasna ti ragsakna iti panangparmekna ken ni Adadezer a namin-adun a kinagubgubat ni Toi. Nangitugot ni Joram kadagiti alikamen a naaramid iti balitok, pirak ken bronse nga insagutna ken ni David.

¹¹Indaton ni David dagitoy a maaramat iti pagdaydayaw agraman dagiti pirak ken balitok nga innalana kadagiti nasion a pinarmekna—Edom, Moab, Ammon, Filistia ken Amalec.

¹²Pinarmekⓨ ni Abisai nga anak ni Sarvia dagiti Edomita idiay Tanap ti Asin ket pinatayna ti 18,000 kadakuada.

¹³Nangipasdek kadagiti kampo ti militar iti entero nga Edom ket inturayan ni David dagiti taga-sadiay. Iti sadinoman a nakigubatan ni David, pinagballigi ni Yahweh.

¹⁴Inturayan ni David ti entero nga Israel. Impatungpalna ti linteg, ket inkagumaanna a maipakat ti hustisia iti amin nga iturayanna.

¹⁵Ni Joab nga anak ni Sarvia ti pangulo ti armada; ni Jehosafat nga anak ni Ahilud ti agay-aywan kadagiti papeles ti pagarian;

¹⁶ni Zadok nga anak ni Ahitub ken ni Ahimelec nga anak ni Abiatar dagiti papadi; ni Seraias[35] ti sekretario ti ari;

¹⁷ni Benaias nga anak ni Joyada ti pangulo dagiti guardia ti ari—dagiti Kereteo ken Feleteo; ket nangato ti akem dagiti annak ni David iti palasio.