1 Cronicas 20:1-8 RIPV1996 - Bible AI

¹Itiⓩ sumuno a kalgaw, iti tiempo a kadawyan a mapan makigubat dagiti ari, indauloan ni Joab ti armada ket rinautda ti daga ti Ammon. Linakubda ti siudad ti Rabba. Nupay kasta, nagbati ni David idiay Jerusalem. Rinaut ni Joab ti Rabba ket dinadaelna.

²Adda balitok a korona ni Milcom a dios[36] dagiti Ammonita; agdagsen iti 75 a libra ti korona ken natampokan iti napateg a bato. Innala ni David ti naitampok ket inkabilna iti koronana. Adu pay ti sinamsamna a sanikua iti siudad.

³Intalawna dagiti tattao ti siudad. Adda dagiti pinagtrabahona a kas kantero, mammanday ken karpintero. Kastoy pay ti inaramidna kadagiti tattao iti amin nga ili ti Ammon. Kalpasanna, nagsubli ni David agraman dagiti tattaona idiay Jerusalem.

⁴Iti saan a nabayag, naggugubat manen dagiti Filisteo ken dagiti tattao ni David idiay Gezer. Iti daytoy a ranget, pinatay ni Sibbecai a taga-Husa ti maysa a higante nga agnagan iti Sippai ket naparmek dagiti Filisteo.

⁵Itiⓐ sabali a pannakigubat kadagiti Filisteo, pinatay ni Elhanan nga anak ni Jair ti kabsat ni Goliat, a taga-Gat. Isu ni Lami nga addaan iti gayang a kasla kadakkel ti pudonan ti pagabelan ti putanna.

⁶Adda manen sabali a gubat idiay Gat a nakasarakanda iti maysa a higante nga innem ti ramay ti tunggal ima ken sakana. Kaputotan dagidi nagkauna a higante.

⁷Kinaritna dagiti Israelita, ket pinatay ni Jonatan nga anak ni Samma a kabsat ni David.

⁸Kaputotan dagiti higante idiay Gat dagitoy tallo a lallaki a pinatay ni David ken dagiti tattaona.