1 Cronicas 23:1-32 RIPV1996 - Bible AI

¹Idiⓓ lakay unayen ni David, insaadna ni Solomon nga agari iti Israel.

²Inummong ni Ari David dagiti amin a papangulo dagiti Israelita, agraman dagiti papadi ken dagiti Levita.

³Binilangna dagiti lallaki a Levita nga agtawen iti 30 wenno nasursurok: 38,000 ti bilangda.

⁴Dinutokanna ti 24,000 a mangimaton iti trabaho iti Templo, ken 6,000 ti agidulin iti rekord ken mangrisut kadagiti riri,

⁵4,000 nga agguardia ken 4,000 nga agdaydayaw iti Dios babaen iti panangusarda kadagiti instrumento a pagtokaran nga insaganana nga agpaay iti daytoy a panggep.

⁶Biningay ni David dagiti Levita iti tallo a grupo segun iti familiada: Gerson, Coat ken Merari.

⁷Dua ti annak ni Gerson, da Ladan ken Simei.

⁸Tallo ti annak ni Ladan, da Jehiel, Zetam ken Joel.

⁹Papangulo ida dagiti familia a nagtaud ken ni Ladan. (Adda tallo a lallaki nga annak ni Simei: da Selomot, Haziel ken Haron.)[38]

¹⁰Uppat ti lallaki nga annak ni Simei: da Jahat, Zina, Jeus ken Berias, manipud inauna agingga iti inaudi. Gapu ta bassit ti bilang ti kaputotan da Jeus ken Berias, naibilangda a maysa a familia.

¹²Uppat ti annak ni Coat: da Amram, Isar, Hebron ken Uzziel.

¹³Niⓔ Amram nga inauna nga anakna ti ama da Aaron ken Moises. (Ni Aaron ken dagiti kaputotanna ti natudingan a mangimaton iti agnanayon kadagiti nasagradoan nga alikamen. Isuda ti mangpuor iti insenso a pagdaydayaw ken ni Yahweh, agserbi kenkuana ken mangbendision kadagiti tattao iti naganna.

¹⁴No maipapan ken ni Moises a tao ti Dios, mairaman dagiti annakna iti bunggoy dagiti Levita.)

¹⁵Dua ti annak ni Moises: da Gersom ken Eliezer.

¹⁶Kadagiti lallaki nga annak ni Gersom, ni Sebuel ti pangulo.

¹⁷Maymaysa ti anak ni Eliezer, ni Rehabia, ngem adu ti kaputotanna.

¹⁸Adda anak ni Isar a maikadua nga anak ni Coat. Isu ni Selomit a pangulo ti kapuonan.

¹⁹Uppat ti annak ni Hebron a maikatlo nga anak ni Coat: da Jerias, Amarias, Jehaziel ken Jecameam.

²⁰Dua ti annak ni Uzziel a maikapat nga anak ni Coat: da Mica ken Issias.

²¹Dua ti annak ni Merari: da Mali ken Musi. Dua met ti annak ni Mali: Eleazar ken Kis.

²²Natay ni Eleazar nga awan anakna a lalaki. Pasig a babbai. Nakiasawa dagiti annakna kadagiti kakasinsinda nga annak ni Kis.

²³Tallo ti annak ni Musi a maikadua nga anak ni Merari, da Mali, Eder ken Jeremot.

²⁴Dagitoy dagiti kaputotan ni Levi. Nailista ti naganda iti sensus segun iti kapuonan ken familiada. Tumulong amin a kaputotanna a 20 ti tawenna wenno nasursurok pay iti trabaho iti templo ni Yahweh.

²⁵Kinuna ni David: “Inted ti Dios ti Israel ti talna kadagiti tattaona ket pinagbalinna ti Jerusalem a pagtaenganna nga agnanayon.

²⁶Ngarud,ⓕ saanen a masapul nga awiten dagiti Levita ti nasagradoan a Tolda ken dagiti amin nga alikamen a mausar iti panagdaydayaw.”

²⁷Kas mayannurot iti maudi a bilin ni David, mailista dagiti amin a Levita nga agtawen iti 20 tapno agserbida iti Templo.

²⁸Annongdaⓖ ti tumulong kadagiti papadi a kaputotan ni Aaron iti panagdaydayaw iti Templo. Aywananda met dagiti paraangan ken kuarto ti templo ken kitaenda a saan a matulawan dagiti amin a nasagradoan a banag.

²⁹Isuda ti makaammo iti tinapay a maidaton iti Dios, iti arina a maaramat kadagiti daton, kadagiti tinapay nga awan lebadurana, kadagiti bibingka a daton, ken iti arina a nagamay iti lana. Isuda ti mangtimbang ken mangsukat kadagiti maidaton iti Templo.

³⁰Annongda pay ti agdaydayaw ken mangitan-ok ken ni Yahweh tunggal bigat ken tunggal rabii,

³¹ken tunggal mapuoran dagiti daton ken ni Yahweh kadagiti Aldaw a Panaginana, Fiesta ti Lutuad ken dadduma a fiesta. Adda pagannurotan a mangikeddeng no mano a Levita ti mangannong iti daytoy a trabaho tunggal adda pakasapulanna. Annongda iti agnanayon ti agdaydayaw ken ni Yahweh.

³²Naipaannong kadakuada ti pannakaaywan ti Tolda ti Dios ken iti Templo, ken tumulong kadagiti kakabagianda, dagiti papadi a kaputotan ni Aaron iti panagdaydayaw iti Templo.