1 Pedro 2:1-25 RIPV1996 - Bible AI

¹Iwaksiyo ngaruden ti amin a kinadakes. Awan koman ti panagulbod, panaginsisingpet, panagimon ken pammadpadakes.

²Kaskay la koma kayyanak a maladaga a kanayon a mawaw iti puro a gatas a naespirituan tapno iti yiinumyo, dumakkelkayo ket maisalakankayo.

³Kasⓒ kuna ti Nasantoan a Surat, “Babaen iti padasyo, natakuatanyo a manangngaasi ti Apo.”

⁴Umasidegkay iti Apo. Isu ti sibibiag a bato nga imbelleng dagiti agipatpatakder ta imbilangda nga awan serserbina, ngem pinili ken impateg ti Dios.

⁵Umasidegkayo a kas sibibiag a batbato a maaramat iti pannakabangon ti naespirituan a templo. Agserbikayo a kas nasantoan a papadi a mangipaay iti daton a naespirituan ken makaay-ayo iti Dios babaen ken Jesu-Cristo.

⁶Taⓓ kuna ti Nasantoan a Surat:

⁶“Pimmiliak iti napateg a bato a kas pasuli; ikabilko ita idiay Sion. Ket siasinoman a mamati kenkuana, pulos nga awanto pannakapaayna.”

⁷Napategⓔ unay daytoy a bato kadakayo a mamati. Ngem kadagiti saan a mamati, kunana pay: “Ti bato nga imbelleng dagiti agipatpatakder, nagbalin a kangrunaan unay a bato.”

⁸Kunaⓕ pay ti sabali a paset ti Nasantoan a Surat: “Daytoy ti bato a pakaitibkolan, ken pakaitublakan dagiti tattao.” Naitibkolda agsipud ta dida namati iti sao. Kasta ti intuding ti Dios a pagbanaganda.

⁹Ngemⓖ dakayo ti napili a puli. Papadikayo nga agserbi iti Dios nga Ari. Nasionkayo a nasantoan. Tattaonakayo ti Dios. Inruarnakayo iti kasipngetan ket impannakayo iti nakaskasdaaw a lawagna. Pinilinakayo a nangipakaammo kadagiti nakaskasdaaw nga aramidna.

¹⁰Saankayⓗ idi a tattao ti Dios, ngem ita tattaonakayon. Diyo ammo idi ti kaasi ti Dios, ngem ita inawatyon ti kaasina.

¹¹Kakabsatko, kas ganggannaet ken agdaldaliasat iti daytoy a lubong, agdawatak kadakayo. Dikay paiturayan kadagiti nailasagan a tarigagay a kanayon a makiranget iti kararua.

¹²Agbiagkayo koma a natakneng iti imatang dagiti Hentil. Uray no kunada a managdakdakeskayo, mabigbigdanto met laeng dagiti naimbag nga aramidyo ket idaydayawdanto ti Dios inton dumteng ti Aldaw a yaayna.

¹³Gapu iti Apo, masapul a paiturayankayo kadagiti agtuturay nga insaad ti tao: iti Emperador a kangatoan nga agturay,

¹⁴ken kadagiti gobernador nga imbaonna a mangdusa kadagiti managdakdakes ken mangidaydayaw kadagiti agaramid iti naimbag.

¹⁵Ta kayat ti Dios a, babaen kadagiti naimbag nga aramidyo, maawanan iti gundaway dagiti maag nga agsao iti ulbod ken awan serserbina.

¹⁶Agbiagkayo a kas tattao a nawayawayaan, ngem diyo aramaten ti wayawayayo a pangkalub iti aniaman a dakes. Agbiagkayo ketdi a kas tagabu ti Dios.

¹⁷Agraemkayo kadagiti amin a tattao. Ayatenyo dagiti kakabsatyo iti pammati. Agbutengkayo iti Dios ket padayawanyo ti Emperador.

¹⁸Dakayo a katulongan, paiturayankayo kadagiti amoyo. Ipakitayo kadakuada ti naan-anay a panagraem, saan laeng a kadagiti naasi ken mannakaawat, ngem uray pay kadagiti nauyong.

¹⁹Gunggonaannakayto ti Dios no maibturanyo ti agsagaba a saan a nainkalintegan ta ammoyo ti pagayatanna.

²⁰Maidaydayawkayo aya no ituredyo ti dusa a kaikarianyo gapu iti dakes nga inaramidyo? Ngem no ibturanyo ti agsagaba idinto a naimbag ti aramidyo, bendisionannakayto ti Dios.

²¹Daytoy ti nangayaban ti Dios kadakayo, agsipud ta nagsagaba ni Cristo gapu kadakayo ket nangibati iti pagulidanan tapno surotenyo ti tugotna.

²²Saanⓘ a nagbasol. Awan ti insawangna a kinaulbod.

²³Idiⓙ nalalais, saan a nanglais. Idi nagsagaba, saan a namutbuteng. Nagtalek ketdi iti Dios, ti nalinteg nga Ukom.

²⁴Inawitⓚ ni Cristo dagiti basbasoltayo iti krus tapno mawayawayaantay iti pannakabalin ti basol ket agbiagtay a nalinteg. Ta babaen kadagiti sugatna, naagasankayo.

²⁵Mayarigkay idi kadagiti karnero a nayaw-awan. Ngem ita, naisublikayon a sumurot iti Pastor ken Agaywan kadagiti kararuayo.