1 Samuel 1:1-28 RIPV1996 - Bible AI

¹Adda lalaki nga agnagan Elcana a nagtaud iti tribu ti Efraim ken agnaed iti ili ti Rama iti katurturodan ti Efraim. Isu ti anak ni Jeroham ken apoko ni Eliu iti familia ni Tohu iti kapuonan ni Suf.

²Dua ti assawa ni Elcana: da Ana ken Fenina. Adda annak ni Fenina ngem awan ti anak ni Ana.

³Tinawen a mapan ni Elcana idiay Silo tapno agdaydayaw ken agidaton ken ni Yahweh a Mannakabalin-amin. Da Ofni ken Finees nga annak ni Eli ti papadi idi ni Yahweh idiay Silo.

⁴Tunggal agidaton ni Elcana, ibingayanna ni Fenina iti karne. Ikkanna met dagiti annakna a lallaki ken babbai.

⁵Ket uray no ay-ayatenna unay ni Ana, maysa laeng ti itedna a bingay kenkuana gapu ta[1] saan a pinaraburan ni Yahweh iti anak.

⁶Gapu ta awan ti anak ni Ana, masansan a pagpulkoken ken umsien ni Fenina a kasalisalna.

⁷Tinawen a kastoy ti mapasamak. Tunggal mapanda iti balay ni Yahweh, masansan a ruroden ni Fenina ni Ana, ket uray la nga agsangsangit ket saan a mangan.

⁸Masansan a saludsoden ni Elcana, “Apay nga agsangsangitka, Ana? Apay a dika mangan? Apay a kanayon a nalidayka? Saanak aya a napatpateg kenka ngem iti sangapulo nga annak?”

⁹Iti naminsan, kalpasan ti pannanganda iti balay ni Yahweh idiay Silo, timmakder ni Ana a kasta unay ti pannakariribukna. Agsangsangit iti nasaem bayat ti panagkararagna ken ni Yahweh. Kabayatanna, agtugtugaw idi ni Eli a padi iti lugarna iti abay ti ruangan.

¹¹Addaⓐ kari a sinapataan ni Ana: “O APO a Mannakabalin-amin, ipangagnak kadi nga adipenmo. Kitaem ti parikutko ket lagipennak! Wen, dinak koma liplipatan! No ikkannak iti anak a lalaki, ikarik nga idaton kenka iti unos ti panagbiagna, ket pulos a dinanto papukisan ti buokna.”[2]

¹²Intuloy ni Ana ti nabayag a panagkararagna ken ni Yahweh ket kitkitaen ni Eli ti panagkuti dagiti bibigna.

¹³Naulimek ti panagkararag ni Ana. Agkutkuti dagiti bibigna ngem saan a sumngaw ti timekna. Daytoy ti gapuna nga impagarup ni Eli a nabartek ni Ana,

¹⁴ket kinunana kenkuana: “Nabartekka! Isardengmo daytoy binabartek nga aramidmo ket agpamunawka.”

¹⁵“Saanak a nabartek, apo,” insungbat ni Ana. “Saanak a nakainum! Maladingitanak, ket agkarkararagak. Yeb-ebkasko dagiti parikutko iti APO.

¹⁶Dimo koma ipagarup a dakesak a babai. Kastoy ti makitam a panagkararagko gapu ta nakaro ti ladingitko.”

¹⁷“Inka ngarud a sitatalna,” kinuna ni Eli. “Sapay koma ta ited ti Dios ti Israel ti dinawatmo kenkuana.”

¹⁸“Sapay koma ta kankanayon a nasayaat ti panangipapanmo kaniak,” kinuna ni Ana. Kalpasanna, pimmanaw, nangan ket saanen a naliday.

¹⁹Kabigatanna, nasapa a bimmangon ni Elcana ken ti familiana ket kalpasan ti panagdaydayawda ken ni Yahweh, nagawidda idiay Rama. Kinaidda ni Elcana ni Ana nga asawana, ket pinatgan ni Yahweh ti kararag ni Ana.

²⁰Nagsikog ngarud ni Ana ket impasngayna ti maysa a lalaki. Pinanagananna iti Samuel,[3] ta kas iti panangilawlawagna, “Nagdawatak iti APO nga ikkannak iti anak.”

²¹Dimteng manen ti tiempo nga ipapan ni Elcana ken ti familiana idiay Silo tapno idatagna ken ni Yahweh ti tinawen a daton ken tapno tungpalenna ti inkarina.

²²Ngem saan a napan ni Ana. Imbagana iti asawana, “Apaman a mapusot ti ubing, ipankonto iti balay ti APO a pagnaedannanto iti unos ti panagbiagna.”

²³“Aramidem ngarud ti ammom a kasayaatan,” insungbat ni Elcana. “Agbatika agingga iti panangpusotmo kenkuana. Sapay koma ta tungpalen ti APO ti karina.”[4] Nagbati ngarud ni Ana ket tinagibina ti ubing.

²⁴Kalpasan ti panangpusotna iti ubing, impanna idiay Silo. Nangitugot iti baka a tallo ti tawenna,[5] maysa nga efa[6] nga arina ken arak a naikarga iti supot a lalat. Impanna ni Samuel iti balay ni Yahweh idiay Silo uray no ubing pay laeng.

²⁵Pinartida ti baka ket kalpasanna, indatagda ti ubing ken ni Eli.

²⁶Kinuna ni Ana ken ni Eli, “Dispensarem, apo. Malagipnak pay kadi? Siak daydi babai a nakitam a sitatakder ditoy nga agkarkararag iti APO.

²⁷Dinawatko kenkuana nga itedna kaniak daytoy nga ubing ket pinatganna ti dawatko.

²⁸Ngarud, idatonko kenkuana daytoy nga ubing. Kukuan ti APO iti unos ti panagbiagna.”

²⁸Ket nagdaydayawda[7] ken ni Yahweh sadiay.