1 Samuel 21:1-15 RIPV1996 - Bible AI

¹Napanⓕ ni David idiay Nob iti ayan ni Ahimelec a padi. Agtigtigerger ti padi a simmabat kenkuana. Sinaludsodna ken ni David, “Apay a siksika nga immay? Apay nga awan ti kaduam?”

²Insungbat ni David, “Addaak ditoy ta adda nangibaonan kaniak ti ari. Imbagana nga awan ti pangipakaammoak iti nangibaonanna kaniak. No maipapan kadagiti tattaok, imbagak kadakuada nga agsasarakkami iti maysa a lugar.

³Ita, ania ti makan dita? Ikkannak man iti lima a tinapay wenno aniaman nga adda kenka.”

⁴Kinuna ti padi, “Awan ti gagangay a tinapay. Ti la nasagradoan a tinapay ti adda. Mabalinmo nga alaen no la ket saan a nakikaidda dagiti tattaom kadagiti babbai itay nabiit.”

⁵Kinuna ni David, “Awan duadua a dida pay nakikaidda iti babai. Tunggal adda pakaibaonan dagiti tattaok, ikagumaanda ti agtalinaed a nadalus, uray no gagangay a mision ti papananmi. Anianto la ketdin ita ta naisangsangayan ti nakaibaonanmi?”

⁶Ngarud,ⓖ inted ti padi ti nasagradoan a tinapay, ta awanen ti adda no di la dagiti tinapay a naidaton ken ni Yahweh. Naikkat dagitoy iti nasantoan a lamisaan ket nasuktanda iti kalutluto a tinapay.

⁷Iti dayta nga aldaw, nairana nga adda sadiay ni Doeg nga Edomita a pangulo dagiti agay-aywan kadagiti arban ni Saul, ta masapul a tungpalenna ti maysa nga annongna a nasantoan.

⁸“Adda kadi maitedmo kaniak a gayang wenno kampilan?” sinaludsod ni David ken ni Ahimelec. “Awan ti naitugotko nga armas; nagdardarasak a pimmanaw ta nasken unay ti bilin ti ari.”

⁹“Tiⓗ laeng kampilan ni Goliat a Filisteo a pinataymo idiay Tanap ti Lugo ti adda nga armas ditoy,” insungbat ni Ahimelec. “Nabungon iti lupot ket naidulin iti likudan ti efod. Alaem no kayatmo.” “Itedmo kaniak,” kinuna ni David. “Awanen ti kampilan a nasaysayaat ngem iti daytoy.”

¹⁰Pimmanaw ni David tapno itarayanna ni Saul. Nagkamang ken ni Akis nga ari ti Gat.

¹¹Ngemⓘ nabigbig dagiti ofisiales ni Akis ket kinunada iti ari, “Saan aya nga isu ni David nga ari iti pagilianna? Isu ti ikankanta dagiti babbai bayat ti panagsasalada:

¹¹‘Rinibu ti pinatay ni Saul, ngem pinullo ribu ti pinatay ni David.’”

¹²Naimulaⓙ ken ni David dagitoy a saoda, ket kasta unay ti panagbutengna ken ni Akis.

¹³Naginmamauyongⓚ ngarud ni David iti imatangda amin, aglalo no padasenda a tenglen. Suratsuratanna dagiti rikep ti ruangan ket bay-anna nga agayus ti katayna iti imingna.

¹⁴Kinuna ngarud ni Akis kadagiti ofisialesna, “Diyo kadi makita nga agmauyong dayta a tao? Apay nga inyegyo kaniak?

¹⁵Adu unayen ti agmauyong a lallaki nga adda kaniak! Apay aya a nangyegkayo ditoy balayko iti sabali pay a mangriribuk kaniak?”