1 Samuel 24:1-22 RIPV1996 - Bible AI

¹Idi agsubli ni Saul kalpasan iti pannakigubatna kadagiti Filisteo, naibaga kenkuana nga adda ni David iti let-ang iti asideg ti Engadi.

²Nangitugot ni Saul iti 3,000 a napili a mannakigubat iti Israel ket napanda binirbirok ni David ken dagiti tattaona iti dayaen ti Kabatoan dagiti Atap a Kalding.

³Dimtengⓟ iti maysa a kueba nga asideg iti sumagmamano a pagaponan ti karnero iti igid ti dalan, ket simrek tapno mapan umibleng.

³Nairana a ditoy ti paglemlemmengan ni David ken dagiti tattaona, iti kaunggan a paset ti rukib.

⁴Kinuna dagiti tattaona, “Daytoyen ti gundawaymo! Inyawaten ti APO ti kabusormo iti pannakabalinmo kas inkarina, ket mabalinmo nga aramiden kenkuana ti aniaman a kayatmo.”

⁴Nagar-arudok ni David a napan iti ayan ni Saul ket nangragas iti gayadan ti kagay ni Saul a di nadlaw ni Saul.

⁵Ngem kalpasanna, nariribuk ti konsensia ni David,

⁶ketⓠ kinunana kadagiti tattaona, “Yad-adayo koma ti APO a dangrak ti apok a pinilina a kas ari! Diak mabalin a dangran, agsipud ta isu ti ari a pinili ti APO!”

⁷Naallukoy ngarud ni David dagiti tattaona a dida darupen ni Saul. Timmakder ni Saul ket rimmuar iti rukib.

⁸Simmaruno met a rimmuar ni David ket inawaganna, “Natan-ok nga Ari!”

⁸Timmalliaw ni Saul. Nagkurno ni David a kas pammadayawna iti ari

⁹sana kinuna, “Apay a patiem dagiti tattao nga agkunkuna a kayatka a patayen?

¹⁰Itay laeng, mismo a sika ti nakakita nga inyawatnaka ti APO iti pannakabalinko dita uneg ti rukib. Adda dagiti tattaok a nangibaga kaniak a patayenka, ngem naasianak kenka ket imbagak kadakuada a pulos a saanka a dangran, agsipud ta sika ti ari a pinili ti APO.

¹¹Kitaem, ama. Kitaem daytoy ig-iggamak a gayadan ti kagaymo! Nalaka koma a pinatayka ngem rinagasko laeng daytoy. Daytoy koma ti mangipaneknek nga awan ti panggepko a mangsukir wenno mangranggas kenka. Uray no awan ti naaramidko a dakes kenka, kaskadi nga an-anupennak tapno patayennak.

¹²Ikeddeng koma ti APO no siasino kadata ti nagbiddut. Sapay koma ta dusaennaka gapu iti tignaymo a maibusor kaniak; ta pulos a dika dangran.

¹³Ammom ti pagsasao, ‘Dagiti laeng dakes a tattao ti agaramid iti dakes.’ Ket saanka ngarud a ranggasan.

¹⁴Kitaemⓡ ti panggep a patayen ti ari ti Israel! Kitaem ti an-anupenna! Maysa a natay nga aso! Maysa a timel!

¹⁵Ninto APO ti mangukom ket ikeddengna no sinno kadata ti nagbiddut. Usigenna koma daytoy a banag; salaknibannak ket isalakannak iti pannakabalinmo.”

¹⁶Idi nalpas a nagsao ni David, kinuna ni Saul, “Pudno kadi a sika dayta, anakko a David?” Ket nagsangit ni Saul.

¹⁷Kalpasanna, kinunana ken ni David, “Nalintegka idinto a nagbiddutak. Naimbagka la unay kaniak ngem dakes ti insubalitko kenka!

¹⁸Ita nga aldaw, impakitam ti kinaimbagmo kaniak agsipud ta dinak pinatay uray no inyawatnak ti APO iti pannakabalinmo.

¹⁹Manmano a mapasamak a no matiliw ti maysa a tao ti kabusorna, palubosanna met laeng nga awan ti pakaan-annoanna. Bendisionannaka koma ti APO gapu iti impaaymo kaniak ita nga aldaw.

²⁰Ita, kapkapnekakon nga agarikanto iti Israel, ket natalgedto ti pagarian iti panangituraymo.

²¹Ngem ikarim koma kaniak iti nagan ti APO nga ispalemto dagiti kaputotak tapno saan a malipatan ti naganko ken ti nagan ti familiak.”

²²Inkari ni David nga aramidenna ti dawat ni Saul. Nagawid ni Saul ket nagsubli met ni David ken dagiti tattaona iti paglemlemmenganda.