1 Taga-Corinto 12:1-31 RIPV1996 - Bible AI

¹Ita, kakabsatko, kayatko ti agsao maipapan iti insuratyo a sagsagut nga aggapu iti Espiritu Santo. Kayatko a maammoanyo ti pudno.

²Ammoyo nga idi paganokayo pay laeng, naisungsongkayo nga agrukbab kadagiti didiosen. Awan biagda dagitoy a didiosen a kanayon a nangyaw-awan kadakayo.

³Kayatko a maammoanyo a ti tao nga idalan ti Espiritu ti Dios, dina mabalin a kuna, “Mailunod ni Jesus!” Awan ti makabalin nga agsao, “Ni Jesus ket Apo,” malaksid no idalan ti Espiritu Santo.

⁴Nadumadumaⓑ a kita dagiti naespirituan a sagut, ngem isu met la nga Espiritu ti mangted kadagitoy.

⁵Adu a kita ti panagserbi, ngem isu met la nga Apo ti pagserbian.

⁶Nadumaduma ti kabaelan nga agserbi, ngem isu met la a Dios ti mangted iti kabaelan ti tunggal maysa.

⁷Maipakita a pagimbagan ti amin ti kaadda ti Espiritu iti tunggal maysa.

⁸Iti maysa a tao, ited ti Espiritu ti nainsiriban a panagsao; iti sabali, ti pannakaawat iti mensahe.

⁹Ti Espiritu a mangted iti pammati iti maysa a tao, isu met laeng ti mangted iti kabaelan a mangpaimbag iti masakit.

¹⁰Babaen iti Espiritu, maikkan ti maysa a tao iti kabaelan nga agaramid iti milagro. Iti sabali, ti kinalaing a mangiwaragawag iti mensahe ti Dios. Ket iti sabali pay, ti kabaelan a mangigiddiat no ania dagiti sagut nga aggapu iti Espiritu ken dagiti saan. Itedna iti maysa a tao ti kabaelan nga agsao kadagiti datdatlag a pagsasao. Iti sabali, ti kabaelan a mangipatarus iti naisao.

¹¹Ngem maymaysa nga Espiritu ti mangar-aramid amin kadagitoy; kas pagayatanna, nadumaduma a sagut ti itedna kadagiti tattao.

¹²Mayarigⓒ ni Cristo iti maysa a bagi nga adu ti pasetna. Maysa latta a bagi uray no buklen ti nadumaduma a paset.

¹³Kasta met kadatayo amin—Judio man wenno Hentil, tagabu man wenno siwawayawaya—nabuniagantayo[16] a naikamang iti maymaysa a bagi babaen iti maymaysa nga Espiritu nga isu met laeng ti naited nga inumentayo.

¹⁴Ta saan la a maymaysa no di ket adu ti paset ti bagi.

¹⁵No kuna ti saka, “Saanak a parte ti bagi, ta saanak met nga ima,” dina kayat a sawen a saanen a paset ti bagi.

¹⁶No kuna ti lapayag, “Saanak a parte ti bagi, ta saanak met a mata,” dina kayat a sawen a saanen a paset ti bagi.

¹⁷No mata laeng ti mangbukel iti entero a bagi, kasano a makangngeg? No lapayag laeng, kasano a makaangot?

¹⁸Ngem iti kinaagpaysona, inurnos ti Dios dagiti amin a parte ti bagi, segun ti nagayatanna.

¹⁹No maymaysa laeng a kita ti amin a paset, kasano nga adda bagi?

²⁰Kinapudnona, adu dagiti paset ngem maymaysa a bagi.

²¹Ngarud, di mabalin a kuna ti mata iti ima, “Saanka a masapul!” Wenno ti ulo kadagiti saka, “Saankayo a masapul!”

²²Saan koma a kasta! Awan ti maaramidtayo no awan dagiti paset a kasla nakapkapsut.

²³Ad-adda ketdi a taripatoen dagiti paset nga ipagaruptayo nga awan serserbina. Ipangpangrunatayo met a taripatoen dagiti naalas a paset,

²⁴panangtaripato a di masapul dagiti napimpintas a paset. Ti Dios a mismo ti nangbukel iti bagi tapno maikkan iti dakdakkel a pammadayaw dagiti nanumo a paset.

²⁵Iti kasta, awan panagsisina iti bagi ngem agsisinnakit ketdi dagiti amin a paset.

²⁶No agsagaba ti maysa a paset, makipagsagaba met dagiti dadduma. No maidayaw ti maysa, makipagragsak met dagiti dadduma.

²⁷Ngarud, baginakayo ni Cristo ket kamengna ti tunggal maysa kadakayo.

²⁸Itiⓓ iglesia, insaad ti Dios ti tunggal maysa iti lugarna: umuna, dagiti apostoles; maikadua, dagiti profeta; maikatlo, dagiti mamaestro; sumarsaruno, dagiti agaramid iti milagro sa dagiti naikkan iti pannakabalin a mangpaimbag wenno tumulong kadagiti sabali wenno mangidalan kadakuada wenno agsao iti datdatlag a pagsasao.

²⁹Saanda nga apostoles amin wenno profeta wenno maestro. Saan nga amin ket addaan iti pannakabalin nga agaramid iti milagro

³⁰wenno mangpaimbag iti masakit wenno makapagsao iti datdatlag a pagsasao wenno makailawlawag iti kaipapanan dagiti naisao.

³¹Ngarud, tarigagayanyo koma dagiti nasaysayaat a sagut.

³¹Nupay kasta, ipakitak kadakayo ti nasaysayaat pay a dalan.