1 Taga-Corinto 16:1-24 RIPV1996 - Bible AI

¹Ita,ⓣ saritaek ti maipapan iti maur-or a tulong a maipaay kadagiti tattao ti Dios idiay Judea. Nasken nga aramidenyo ti bilinko kadagiti iglesia idiay Galacia.

²Kada umuna nga aldaw ti lawas, mangilasin ti tunggal maysa iti sagutna segun ti kabaelanna tapno saanton a masapul ti agur-or inton umayak.

³Kalpasan ti yaayko, ibaonkonto idiay Jerusalem dagiti piniliyo a lallaki tapno ipanda sadiay ti sagutyo. Ikuyogdanto dagiti surat a mangyam-ammo kadakuada.

⁴No masapul a mapanak, makikuyogdanto kaniak.

⁵Sarungkarankayoⓤ dita kalpasan ti ilalasatko idiay Macedonia—ta panggepko ti magna sadiay.

⁶Nalabit a makipagnaedakto kadakayo iti sumagmamano nga aldaw wenno iti tiempo ti lam-ek, tapno matulongandakto a mangituloy iti panagbiahek, iti sadinoman a papanak pay.

⁷Ta diak kayat nga apagbiit laeng a makitakayo. No ipalubos la ketdi ti Apo, agbayagak bassit iti dennayo.

⁸Agyanakⓥⓦ ditoy Efeso agingga iti aldaw ti Pentecostes.

⁹Nupay adu ti kabusor, adda napudpudno a gundaway nga agpaay iti naindaklan ken nabunga a trabaho.

¹⁰Noⓧ dumaw-as dita ni Timoteo, kitaenyo a di mabutbuteng iti kaaddana kadakayo, ta kas met kaniak nga agtartrabaho iti Apo.

¹¹Awan koma ti manglais kenkuana, ngem tulonganyo ketdi a mangituloy a sitatalna iti panagbiahena tapno agsublinto kaniak. Padpadaanak ni Timoteo agraman dagiti kakabsat.

¹²Maipapan ken ni kabsat nga Apolos: kanayon a dagdagek tapno bisitaennakayo a kakuyogna dagiti kakabsat, ngem dina maikeddeng no umay ita. Nupay kasta, umayto no adda gundawayna.

¹³Agsiputkayo. Agtalinaedkayo a natibker iti pammati ket tumured ket pumigsakayo.

¹⁴Aramidenyo a siaayat ti amin a trabahoyo.

¹⁵Malagipyoⓨ a ni Estefanas ken ti familiana ti immuna a nagkristiano idiay Grecia. Intedda ti bagida iti panagserbi kadagiti tattao ti Dios. Yunay-unayko kadakayo, kakabsatko,

¹⁶a paidalankayo kadagiti kakastoy a tattao ken uray siasinoman a makipagtrabaho ken makipagserbi kadakuada.

¹⁷Maragsakanak iti yaay da Estefanas, Fortunato ken Acaico. Isuda ti nangisaup kadakayo.

¹⁸Pinaragsakdak a kas iti panangparagsakda kadakayo. Rebbengna a mabigbig dagiti tattao a kas kadakuada.

¹⁹Pakomustaandakayoⓩ dagiti iglesia ti probinsia ti Asia. Nabara ken nakristianoan ti pakomusta kadakayo da Akila ken Priscila, ken dagiti kamkameng ti iglesia nga aggigimong iti balayda.

²⁰Pakomustaandakayo met dagiti amin a kakabsat ditoy.

²⁰Agkikinnablaawkayo iti nainkabsatan nga agek.

²¹Iti bukodko nga ima isuratko daytoy: Kablaaw nga aggapu ken ni Pablo.

²²Mailunod koma ti siasinoman a di agayat iti Apo! Maranatha[19]—Umayka, Apomi!

²³Sapay koma ta adda kadakayo ti parabur ni Apo Jesus.

²⁴Agtaeng koma ti ayatko kadakayo amin nga adda ken ni Cristo Jesus. Amen.