1 Taga-Tesalonica 3:1-13 RIPV1996 - Bible AI

¹Kamaudianna,ⓕ pulos a saankam idin a makaibtur. Nagnunumoanmi ngarud nga agbatikami a dua idiay Atenas,

²idinto nga imbaonmi nga umay kadakayo ti kabsattayo ni Timoteo. Katrabahoanmi ni Timoteo iti Dios iti pannakaikasaba ti Naimbag a Damag maipapan ken ni Cristo. Imbaonmi a mangpatibker iti pammatiyo ken mangpapigsa iti pakinakemyo

³tapno awan ti sumina gapu kadagitoy a pannakaparigat. Ammoyo a naituding a sagabaentayo dagitoy a pannakaidadanes.

⁴Kinapudnona, idi addakami iti dennayo, imbagbagami a maidadanestayto. Ket kas pagaammoyo, dayta ti napasamak.

⁵Daytoy ti gapuna nga idi saanakon a makaibtur, imbaonko ni Timoteo tapno ammoenna ti sasaaden ti pammatiyo. Madanaganak amangan no sinulisognakayon ti Diablo. No kasta ti mapasamak, awanen ti serserbi dagiti amin a nagbannoganmi.

⁶Ngemⓖ ita ta nagsublin ni Timoteo, impadamagna ti makaparagsak a sasaaden ti pammati ken ayatyo. Nasaona pay a silalagipkayo ken mailiwkayo a makakita kadakami a kas iti iliwmi met a makakita kadakayo.

⁷Isut' gapuna, kakabsat, a dakayo ti nangparegta kadakami iti amin a pannakariribuk ken panagsagabami. Ti pammatiyo ti nangpapigsa kadakami

⁸agsipud ta itan, pudno nga agbiagkami no agtalinaedkayo a natibker iti panagbiagyo iti Apo.

⁹Mabalinmin ti agyaman iti Dios gapu iti rag-o nga impaayyo kadakami.

¹⁰Aldaw-rabii a sipapasnek ti panagdawatmi iti Dios tapno makitadakayo iti rupanrupa, ket punnoanmi ti pagkurangan ti pammatiyo.

¹¹Sapay koma ta ti mismo a Dios ken Amatayo, ken ni Apotayo a Jesus ti mangiturong iti dalanmi nga umay kadakayo!

¹²Padakkelen koma ti Dios ti panagayatyo iti tunggal maysa ken kadagiti amin a tattao, ket dumakkel koma a kas iti panagayatmi kadakayo.

¹³Iti kasta, papigsaennanto dagiti puspusoyo, ket naan-anay ken nasantoankayto iti imatang ti Dios ken Amatayo inton umay ni Apo Jesus agraman dagiti tattaona.[3]