2 Ar-ari 1:1-18 RIPV1996 - Bible AI

¹Kalpasan ti ipapatay ni Ahab nga ari ti Israel, immalsa ti pagilian ti Moab a maibusor iti Israel.

²Natnag ni Ahazias nga ari ti Israel manipud iti balkon ti akingngato a kuarto ti palasiona idiay Samaria. Gapu ta nakaro dagiti sugatna, nangibaon kadagiti mapan makiuman ken ni Baalzebub a dios ti Ekron a siudad dagiti Filisteo, tapno ammoenda no maimbagan pay wenno saan.

³Ngem binilin ti maysa nga anghel ni Yahweh ni profeta Elias a taga-Tisbe a sabtenna dagiti imbaon ni Ari Ahazias ket saludsodenna, “Apay a mapankayo makiuman ken ni Baalzebub a dios ti Ekron? Gapu kadi ta ipagarupyo nga awan ti Dios iti Israel?

⁴Ibagayo iti ari a kastoy ti sao ni Yahweh, ‘Saanka a maimbagan kadagiti sugatmo, ipataymonto la ketdi dagita!’”

⁴Tinungpal ni Elias ti imbilin ti APO.

⁵Idi nagsubli dagiti naibaon, sinaludsod ti ari, “Apay a nagsublikayo?”

⁶Insungbatda, “Nasabatmi ti maysa a lalaki a nangibaga nga agsublikami ket sawenmi kenka ti sao ti APO, ‘Apay a mangibaonka kadagiti mapan makiuman ken ni Baalzebub a dios ti Ekron? Gapu kadi ta ipagarupmo nga awan Dios ti Israel? Saanka a maimbagan iti sugatmo; awan duadua a matayka!’”

⁷“Ania ti langa ti lalaki?” sinaludsod ti ari.

⁸“Dutdotanⓐ ti pagan-anayna ken[1] nagbarikes iti lalat,” insungbatda. “Isu ni Elias!” impukkaw ti ari.

⁹Nangibaon iti maysa a kapitan ken 50 a soldado a mangala ken ni Elias. Nasarakanda ni Elias nga agtugtugaw iti tapaw ti maysa a turod. Kinuna ti kapitan kenkuana, “Tao ti Dios, paayabannaka ti ari.”

¹⁰“Noⓑ taonak ti Dios,” kinuna ni Elias, “agtudo koma iti apuy ket puorannaka agraman dagiti tattaom!” Pagammoan, nagtudo iti apuy ket inkisapna ti kapitan ken dagiti soldadona.

¹¹Nangibaon manen ti ari iti maysa a kapitan ken 50 a soldado; napan[2] ken ni Elias ket kinunana kenkuana, “Tao ti Dios, imbilin ti ari nga umayka a dagus.”

¹²“No taonak ti Dios,” kinuna ni Elias, “agtudo koma iti apuy ket puorannakayo agraman dagiti tattaom!” Pagammoan, nagtudo iti apuy ket inkisapna ti kapitan ken dagiti soldadona.

¹³Nangibaon manen ti ari iti maysa a kapitan ken 50 a soldado. Simmang-at iti turod, sa nagparintumeng iti sangoanan ni Elias ket impakpakaasina, “Tao ti Dios, kaasiannak agraman dagiti tattaok. Dinakam papatayen!

¹⁴Natay ti dua a kapitan ken dagiti soldadoda iti apuy a naggapu iti langit; ngem pangngaasim ta kaasiannakami!”

¹⁵Kinuna ti anghel ni Yahweh ken ni Elias, “Kumuyogka kenkuana a bumaba ket dika agbuteng.” Kimmuyog ni Elias iti kapitan a napan iti ari.

¹⁶Kinuna ni Elias iti ari, “Kastoy ti sao ti APO: ‘Gapu ta nangibaonka kadagiti mapan makiuman ken ni Baalzebub a dios ti Ekron—a kasla ti Dios iti Israel a pakiumanam, saanka a maimbagan. Dikanto makabangon iti iddam ket ditanton ti pakatayam!’”

¹⁷Natay ni Ahazias kas kinuna ni Yahweh ken ni Elias. Gapu ta awan lalaki nga anak ni Ahazias, ni Joram a kabsatna[3] ti simmukat kenkuana nga ari. Nagturay iti maikadua a tawen a panagturay ni Jehoram nga anak ni Jehosafat nga ari ti Juda.

¹⁸Nailanad iti Pakasaritaan dagiti Ari ti Israel ti dadduma a pasamak iti panagturay ni Ari Ahazias.