2 Ar-ari 16:1-20 RIPV1996 - Bible AI

¹Iti maika-27 a tawen a panagturay ni Peka nga anak ni Remalias a kas ari ti Israel, naisaad ni Ahaz nga anak ni Jotam a kas ari ti Juda.

²Duapulo ti tawen ni Ahaz idi agari ket nagturay idiay Jerusalem iti 16 a tawen. Saanna a tinulad dagiti naimbag nga aramid ni Ari David a kapuonanna. Saan a naragsakan kenkuana ni Yahweh a Diosna

³taⓑ tinuladna ti aramid dagidi ari ti Israel. Tinuladna ti nakarimrimon nga aramid dagiti tattao a pinagtalaw ni Yahweh iti daga idi dumteng dagiti Israelita. Pinuoranna a sibibiag ti lalaki nga anakna a kas daton kadagiti didiosen.

⁴Nagidatag kadagiti sakrifisio ken nagpuor iti insenso kadagiti lugar a pagdaydayawan dagiti pagano, kadagiti turod ken iti sirok ti tunggal narukbos a kayo.

⁵Rinautⓒ ni Resin nga ari ti Siria ken ni Peka nga ari ti Israel ti Jerusalem. Linakubda ti siudad ngem dida maparmek ni Ahaz. (

⁶Iti dayta met la a tiempo, sinakup manen ti ari ti Edom[27] ti siudad ti Elat ket pinaksiatna dagiti taga-Juda nga agnaed sadiay. Nagnaed dagiti Edomita idiay Elat a naedda agpapan ita.)

⁷Nangibaon ni Ahaz kadagiti mapan ken ni Tiglat Pileser nga emperador ti Asiria. Kastoy ti pinaibagana: “Napudnoak nga adipenmo. Umaynak ispalen iti pannakabalin ti ari ti Siria ken ti ari ti Israel a mangraut kaniak.”

⁸Innala ni Ahaz dagiti pirak ken balitok iti Templo ken iti pagiduldulinan iti gameng ti palasio ket impatulodna a kas sagut iti emperador.

⁹Impangag ni Tiglat Pileser ti dawat ni Ahaz. Rinaut ken sinakup dagiti armadana ti Damasco. Pinatayna ni Resin ket impanna dagiti tattao a kas balud idiay Kir.

¹⁰Idi mapan ni Ari Ahaz idiay Damasco tapno makiuman ken ni Emperador Tiglat Pileser, nakitana sadiay ti altar. Nangaramid iti plano ti altar sana impatulod ken ni Urias a padi.

¹¹Ngarud, nangbangon ni Urias iti altar a kapadpada daytoy nga altar ket inleppasna sakbay a nagsubli ni Ahaz.

¹²Idi nagsubli ni Ahaz manipud idiay Damasco, nakitana a nalpasen ti altar

¹³isut' gapuna a nagpuor kadagiti daton nga animal ken daton a makan iti rabawna; nangibukbok iti daton nga arak ken dara a daton a pakikappia.

¹⁴Addaⓓ ti bronse nga altar a naidaton ken ni Yahweh iti nagbaetan ti baro nga altar ken ti Templo. Inyalisna daytoy ket pinaikabilna iti akin-amianan a bangir ti baro nga altar.

¹⁵Imbilinna ken ni Urias, “Usarem daytoy dakkel nga altar a pinaaramidko a pagidatagan kadagiti daton a mapuoran iti bigat ken ti daton a makan a maidatag iti rabii, kadagiti daton a makan ken daton a mapuoran nga idatag ti ari ken dagiti tattao, ken kadagiti daton nga arak nga idatag dagiti tattao. Ibuyatmo ditoy ti amin a dara ti animal a mapuoran a maidaton. No maipapan iti bronse nga altar, usarek iti panagpadles.”

¹⁶Tinungpal ni Urias ti bilin ti ari.

¹⁷Winarawaraⓔ ni Ari Ahaz dagiti bronse a batay a maar-aramat iti Templo ket inikkatna dagiti palanggana iti rabawda. Inikkatna met ti bronse a tangke kadagiti likud dagiti 12 a bronse a sinan-baka ket inkabilna iti bato a pagsaadan.

¹⁸Tapno maay-ayo ni Ahaz ti emperador ti Asiria, inikkatna met ti plataforma a nakaisaadan ti trono ti ari iti Templo ket sinerraanna ti ruangan ti ari a sumrek iti Templo.

¹⁹Nailanad iti Pakasaritaan dagiti Ari ti Juda ti dadduma a pasamak iti panagturay ni Ari Ahaz.

²⁰Natayⓕ ni Ahaz ket naitabon iti pagitaneman kadagiti ari iti Siudad ni David. Ni Hezekias nga anakna ti simmukat kenkuana a kas ari.