2 Ar-ari 20:1-21 RIPV1996 - Bible AI

¹Kadagita a tiempo, nagsakit ni Ari Hezekias ket nagistayan natay. Napan sinarungkaran ni profeta Isaias nga anak ni Amoz ket imbagana kenkuana, “Kuna ti APO a bilinemon dagiti mapanawam ta saanka a maimbaganen. Agsaganaka a matay.”

²Simmango ni Hezekias iti diding ket inkararagna:

³“Laglagipem, O APO, a nagserbiak kenka a sipupudno ken iti amin a pusok ket kanayon nga ikagumaak nga aramiden ti pagayatam.” Nagsangit ni Hezekias iti nasaem.

⁴Pimmanaw ni Isaias ngem dina pay nalasat ti akintengnga a paraangan ti palasio idi ibaga kenkuana ni Yahweh

⁵nga agsubli iti ari a mangituray kadagiti tattao ni Yahweh, ket ibagana kenkuana, “Siak, ni Yahweh a Dios ni David a kapuonam, nangngegko ti kararagmo ket nakitak dagiti luam. Paimbagenka ket tallo nga aldaw manipud ita, inka iti Templo.

⁶Agpaut pay ti biagmo iti 15 a tawen. Isalakanka ken daytoy a siudad a Jerusalem iti pannakabalin ti emperador ti Asiria. Salaknibak daytoy a siudad gapu iti dayawko ken gapu iti inkarik iti daydi David nga adipenko.”

⁷Nagpaala ni Isaias iti namekmek nga igos a maitapal iti letteg ti ari tapno umimbag.[31]

⁸Sinaludsod ni Ari Hezekias, “Ania ti pakakitaan a paimbagennak ti APO ket makapanak iti Templo kalpasan ti tallo nga aldaw?”

⁹Insungbat ni Isaias, “Ikkannaka ti APO iti pagilasinan. Ania ti kaykayatmo, bumaba ti anniniwan iti agdan[32] iti sangapulo a tukad wenno ngumato iti sangapulo a tukad?”

¹⁰Kinuna ni Hezekias, “Nalaka a bumaba ti anniniwan iti sangapulo a tukad! Pagpangatoem iti sangapulo a tukad.”

¹¹Nagkararag ni Isaias ken ni Yahweh ket ngimmato[33] iti sangapulo a tukad ti anniniwan iti agdan nga inaramid ni Ari Ahaz.

¹²Iti dayta a tiempo, nadamag ni Merodak Baladan nga ari ti Babilonia ken anak ni Baladan a nagsakit ni Ari Hezekias. Nangibaon ngarud kadagiti pannakabagina a sumarungkar kenkuana. Pinakuyoganna ida iti surat ken sagut.

¹³Siaayat ni Hezekias a nangawat kadagiti naibaon. Impakitana kadakuada ti kinabaknangna—ti pirak ken balitokna, dagiti rekado ken bangbanglo ken amin nga armasna a pakigubat. Impakitana amin a linaon dagiti pagiduldulinanna. Awan met lugar iti pagarianna a dina impakita kadakuada.

¹⁴Napan ni profeta Isaias ken ni Ari Hezekias ket sinaludsodna, “Naggapuan dagitoy a lallaki ken ania ti imbagada kenka?” “Naggapuda iti adayo a pagilian, idiay Babilonia,” insungbat ni Hezekias.

¹⁵“Ania ti nakitada iti palasio?” “Nakitada amin. Awan ti saanko nga impakita kadakuada nga adda kadagiti pagiduldulinan.”

¹⁶Ket imbaga ni Isaias iti ari, “Kuna ti APO a Mannakabalin-amin

¹⁷ngaⓞ addanto tiempo a maipan idiay Babilonia ti amin nga adda iti palasiom, amin nga indulin dagidi kapuonam agpapan ita. Awanto a pulos ti mabati.

¹⁸Maitalawtoⓟ met ti sumagmamano kadagiti annakmo; agbalindanto nga eunoko nga agserbi iti palasio ti ari ti Babilonia.”

¹⁹Impagarup ni Ari Hezekias a kaipapanan daytoy ti kaadda ti kappia ken talged bayat ti panagbiagna ket insungbatna, “Nasayaat ti imbagam a mensahe ti APO.”

²⁰Nailanad iti Pakasaritaan dagiti Ari ti Juda ti dadduma a pasamak iti panagturay ni Ari Hezekias, dagiti aramid a mangipakita iti kinamaingelna ken ti pakasaritaan ti panangaramidna iti maysa a tangke ti danum ken ti panangkalina iti maysa nga usok a pagayusan iti danum a mapan iti siudad.

²¹Natay ni Hezekias ket ni Manases nga anakna ti simmukat kenkuana nga ari.