2 Ar-ari 24:1-20 RIPV1996 - Bible AI

¹Bayatⓔ ti panagturay ni Joakim, rinaut ni Ari Nebucadnesar ti Juda. Tallo a tawen a naipapilit a pinaiturayan ken ni Nebucadnesar ngem kalpasanna immalsa.

²Nangibaon ni Yahweh kadagiti nakaarmas a bunggoy a taga-Babilonia, Siria, Moab ken Ammon a mangraut ken ni Joakim tapno dadaelenda ti Juda kas imbaga ni Yahweh kadagiti adipenna a profeta.

³Imbilin ni Yahweh daytoy tapno mapukaw dagiti tattao ti Juda iti imatangna gapu kadagiti amin a basol ni Ari Manases

⁴ken nangnangruna ti panangpapatayna kadagiti tattao nga awan basolna. Saan a mapakawan ni Yahweh ni Manases gapu iti dayta nga inaramidna.

⁵Nailanad iti Pakasaritaan dagiti Ari ti Juda ti dadduma a pasamak iti panagturay ni Joakim.

⁶Natay ni Joakim ket ni Jehoyakin nga anakna ti simmukat kenkuana a kas ari.

⁷Saanen a rimmuar iti ilina ti ari ti Egipto ken ti armadana. Ngamin, sinakup ti ari ti Babilonia ti amin a daga ti Egipto, manipud Karayan Eufrates agingga iti akin-amianan a beddeng ti Egipto.

⁸Sangapulo ket walo ti tawen ni Jehoyakin idi agari idiay Juda. Tallo a bulan a nagturay idiay Jerusalem. Ni Nehusta nga anak ni Elnatan a taga-Jerusalem ti inana.

⁹Kas kadagiti kapuonanna, dakes ti inar-aramid ni Jehoyakin iti imatang ni Yahweh.

¹⁰Bayat ti panagturayna, rimmaut ti armada ti Babilonia nga impanguloan dagiti ofisiales ni Ari Nebucadnesar. Linakubda ti Jerusalem.

¹¹Bayat ti pannakalakub ti siudad, dimteng ni Ari Nebucadnesar iti siudad

¹²ketⓕ simmuko ni Ari Jehoyakin, agraman ti inana, dagiti annakna, dagiti ofisialesna ken dagiti ofisiales ti palasio. Iti maikawalo a tawen a panagturay ni Nebucadnesar, innalana a balud ni Jehoyakin.

¹³Innala ni Nebucadnesar ti amin a gameng iti Templo ken iti palasio ket impanna dagitoy idiay Babilonia. Kas impakaammo ni Yahweh, binurburak ni Nebucadnesar dagiti balitok nga alikamen nga inaramid ni Ari Solomon a maar-aramat iti Templo.

¹⁴Intalaw ni Nebucadnesar dagiti tattao ti Jerusalem a kas balud. Impanawna dagiti amin a prinsipe, dagiti amin a nalatak a tattao—10,000 amin. Impanawna pay dagiti karpintero, agraman dagiti mammanday. Dagiti laeng kapanglawan a tattao ti imbatina idiay Juda.

¹⁵Intalawⓖ ni Nebucadnesar ni Jehoyakin ket imbaludna idiay Babilonia, agraman ti ina ni Jehoyakin, dagiti assawana, dagiti ofisialesna ken dagiti nalatak a tattao ti Juda.

¹⁶Impan ni Nebucadnesar dagiti kangrunaan a tattao idiay Babilonia—7,000 ti dagupda ken 1,000 a karpintero, agraman dagiti mammanday, isuda amin a makabael nga agsoldado.

¹⁷Insaadⓗ ni Nebucadnesar ti uliteg ni Jehoyakin, ni Matanias, nga ari ti Juda. Sinuktanna ti naganna iti Zedekias.

¹⁸Agtawenⓘ ni Zedekias iti 21 idi agari, ket 11 a tawen a nagturay idiay Jerusalem. Ni Hamutal nga anak ni Jeremias a taga-siudad ti Libna ti inana.

¹⁹Dakes ti inar-aramid ni Zedekias iti imatang ni Yahweh a kas ken ni Ari Joakim.

²⁰Nakapungtotⓙ ni Yahweh kadagiti tattao ti Jerusalem ken Juda isut' gapuna a linaksidna ida iti imatangna.