2 Ar-ari 25:1-30 RIPV1996 - Bible AI

¹Binusorⓚ ni Zedekias ni Nebucadnesar nga ari ti Babilonia. Iti kasta, dimteng ni Nebucadnesar ken ti entero nga armada ket rinautda ti Jerusalem iti maika-10 nga aldaw ti maika-10 a bulan iti maikasiam a tawen a panagturay ni Zedekias. Nagkampoda iti ruar ti siudad, binangenanda iti aglikmut

²ket linakubda ti siudad agingga iti maika-11 a tawen ti panagturay ni Zedekias.

³Iti maikasiam nga aldaw iti maikapat a bulan iti isu met la a tawen, idi nakaro ti bisin ket awanen ti makan dagiti tattao,

⁴narakrakⓛ ti maysa a paset ti bakud ti siudad. Uray no linakub dagiti taga-Babilonia, nakalibas amin a soldado ni Zedekias iti rabii. Nagnada iti hardin ti palasio, linasatda ti ruangan a namagsilpo kadagiti dua a bakud sada nagtataray a nagturong iti Tanap ti Jordan.

⁵Ngem kinamat ti armada ti Babilonia ni Ari Zedekias ket tiniliwda iti tanap iti asideg ti Jerico. Nawarawara dagiti tattaona.

⁶Naipan ni Zedekias ken ni Ari Nebucadnesar nga adda idi idiay Ribla ket sadiay ti nangsentensiaan ti ari.

⁷Itiⓜ imatang ni Zedekias, napapatay dagiti lallaki nga annakna ket nasuat met dagiti matana, kas imbilin ni Nebucadnesar. Kinawaranda ti ari sada impan idiay Babilonia.

⁸Iti maikapito nga aldaw iti maikalima a bulan iti maika-19 a tawen a panagturay ni Ari Nebucadnesar iti Babilonia, sinerrek ni Nebuzaradan a mammagbaga iti ari ken pangulo ti armada, ti Jerusalem.

⁹Pinuorannaⓝ ti Templo, ti palasio ken dagiti balbalay dagiti amin a nalatak a tattao ti Jerusalem.

¹⁰Rinebba dagiti soldadona ti bakud ti siudad.

¹¹Kalpasanna, impanna idiay Babilonia dagiti tattao a nagtalinaed iti siudad, dagiti nabati a karpintero[36] ken dagiti simmuko iti ari ti Babilonia.

¹²Ngem imbatina idiay Juda dagiti kapanglawan a tattao nga awan sanikuana ket pinagtrabahona ida kadagiti kaubasan ken taltalon.

¹³Binurakburakⓞ dagiti taga-Babilonia dagiti bronse nga adigi ken dagiti batay nga adda iti Templo, agraman ti dakkel a bronse a tangke. Impanda amin a bronse idiay Babilonia.

¹⁴Impanawdaⓟ met dagiti pala, dagiti pagikabilan iti dapu a mausar iti pannakadalus ti altar, dagiti maus-usar iti pannakataripato dagiti pagsilawan, dagiti malukong a mausar a pagtaya kadagiti dara dagiti maidatag a daton, dagiti malukong a pagpuoran iti insenso ken amin a bronse nga alikamen.

¹⁵Impanawda amin nga alikamen a balitok wenno pirak, agraman dagiti babassit a malukong ken dagiti palanggana a pagkargaan iti beggang.

¹⁶Nadagsen ket saan a matimbang dagiti dua a bronse nga adigi, dagiti batay ken ti dakkel a tangke a pinaaramid idi ni Ari Solomon nga agpaay iti Templo.

¹⁷Agpada dagiti dua nga adigi: 27 a kadapan ti tunggal maysa; adda met bronse a paratok ti tunggal maysa nga uppat ket gudua a kadapan ti kangatona. Iniket a bronse a naarkosan iti bronse a granada ti naipalikmut iti tunggal paratok.

¹⁸Kadagiti tiniliw ni Nebuzaradan, mairaman ni Seraias a Nangato a Padi, ni Sefanias, ti padi a sumaruno a kangatoan, ken dagiti tallo a kangrunaan nga ofisiales ti Templo.

¹⁹Tiniliwna met ti nangipangulo kadagiti soldado iti gubat, lima kadagiti mammagbaga iti ari nga adda pay laeng iti siudad, ti katulongan ti pangulo a mangay-aywan kadagiti papeles dagiti soldado ken 60 a nalatak a tattao.

²⁰Indatag ida ni Nebuzaradan iti ari ti Babilonia nga adda idi iti siudad ti Ribla

²¹iti daga ti Hamat. Sadiay, pinarparigat ida ti ari ket kalpasanna, pinapapatayna ida.

²¹Iti kasta, naitalaw dagiti tattao ti Juda ket naipanda iti sabali a pagilian.

²²Insaadⓠ ni Ari Nebucadnesar ni Gedalias nga anak ni Ahikam ken apoko ni Safan a kas gobernador ti Juda. Dinutokanna a mangaywan kadagiti saan a naipan idiay Babilonia.

²³Idi madamag daytoy dagiti ofisiales ken mannakigubat a taga-Juda a saan a simmuko, napanda timmipon ken ni Gedalias idiay Mizpa. Dagitoy dagiti ofisiales: Ismael nga anak ni Netanias, Johanan nga anak ni Karea, Seraias nga anak ni Tanhumet a taga-Netofa ken Jezanias a Maacatita.

²⁴Kinuna ni Gedalias kadakuada, “Awanto ti pakaan-anoanyo. Dikay agbuteng kadagiti ofisiales a taga-Babilonia. Agnaedkayo ditoy ket agserbikayo iti ari ti Babilonia.”

²⁵Ngemⓡ iti maikapito a bulan iti dayta a tawen, dimteng idiay Mizpa ni Ismael nga anak ni Netanias ken apoko ni Elisama a nagtaud iti naarian a familia. Kaduana ti sangapulo a lallaki, dinarupda ni Gedalias ket pinapatayda agraman dagiti Israelita ken taga-Babilonia a kaduana sadiay.

²⁶Gapuⓢ iti buteng dagiti Israelita kadagiti taga-Babilonia, pimmanawda amin, napanglaw man wenno saan, agraman dagiti ofisiales ti armada ket napanda nagkamang idiay Egipto.

²⁷Iti tawen a pannakaisaad ni Evilmerodac nga ari ti Babilonia, impakitana ti panangngaasina ken ni Ari Jehoyakin babaen iti panangwayawayana kenkuana iti pagbaludan. Napasamak daytoy iti maika-27 nga aldaw iti maika-12 a bulan iti maika-37 a tawen a pannakaitalaw ni Jehoyakin a kas balud.

²⁸Naasi unay ni Evilmerodac kenkuana ket insaadna iti natantan-ok a pagsaadan ngem kadagiti dadduma nga ari a naipan a balud idiay Babilonia.

²⁹Ngarud, napalubosan ni Jehoyakin a mangsukat iti pagan-anayna a kas balud ken makipangan iti lamisaan iti ari iti unos ti panagbiagna.

³⁰Inaldaw a naikkan kadagiti kasapulanna.