2 Ar-ari 6:1-33 RIPV1996 - Bible AI

¹Iti maysa nga aldaw, napan ti bunggoy dagiti profeta ken ni Eliseo ket kinunada kenkuana, “Nailet unay ti lugar a pagyanantayo!

²Palubosannakam a mapan idiay Jordan ket agpukankami kadagiti kayo tapno adda pagaramidtay iti pagnaedantayo.”

²“Ala wen,” kinuna ni Eliseo.

³Impakpakaasi ti maysa kadakuada a kumuyog ni Eliseo. Immanamong ti profeta ket

⁴nagkukuyogda a napan. Idi dumtengda iti Jordan, rinugianda ti agpukan.

⁵Idi agpukpukan ti maysa kadakuada, pagammoan la ta nasukto ti ulo ti wasay ket natnag iti karayan. “Ania ti aramidek, apo?” kinunana ken ni Eliseo. “Binulodko ti wasay!”

⁶“Nakatnaganna?” sinaludsod ni Eliseo. Intudo ti lalaki ti nakatnagan ti wasay. Nangputed ni Eliseo iti bassit a sanga sana impurruak iti danum. Timpaw ti ulo ti wasay.

⁷“Alaem,” imbilinna ket ginaw-at ti lalaki ti ulo ti wasay.

⁸Aggubgubat ti ari ti Siria ken ti Israel. Nakiuman ti ari kadagiti ofisialesna ket nangpili iti lugar a pagkampoanna.

⁹Ngem pinakaammoan ni Eliseo ti ari ti Israel ket binallaaganna a saan a mapan iti dayta a lugar gapu ta saneben dagiti taga-Siria.

¹⁰Ngarud, pinakdaaran ti ari ti Israel dagiti lallaki nga agnaed iti dayta a disso ket nagguardiada. Masansan a mapasamak daytoy.

¹¹Kasta unay ti pannakariribuk ti ari ti Siria gapu iti daytoy. Inayabanna dagiti ofisialesna ket sinaludsodna kadakuada, “Siasino kadakayo ti mangliliput? Siasino ti agipulpulong iti ari ti Israel?”

¹²Insungbat ti maysa kadakuada, “Awan, Natan-ok nga Ari. Ngem ibagbaga ni profeta Eliseo iti ari ti Israel ti amin a sasawem, uray dagiti sawem iti uneg ti kuartom.”

¹³“Inkay sapulen ti ayanna, ket patiliwko,” imbilin ti ari. Naipakaammo iti ari nga adda ni Eliseo idiay Dotan.

¹⁴Nangibaon ngarud ti ari iti dakkel a bunggoy dagiti mannakigubat a nagsakay kadagiti kabalio ken lugan a pakigubat. Rabiin idi dumtengda iti Dotan ket linakubda ti ili.

¹⁵Kabigatanna, nasapa a nakariing ti adipen ni Eliseo. Idi rimmuar iti balay, nakitana ti armada ti Siria agraman dagiti kabalio ken dagiti lugan a pakigubat iti lawlaw ti ili. Napan ken ni Eliseo ket kinunana, “Mataytayon, apo! Ania ti aramidentayo?”

¹⁶“Dika agbuteng, gapu ta ad-adutayo ngem isuda,” kinuna ni Eliseo.

¹⁷Ket inkararagna, “O APO, luktam ti mata ti babaonek tapno makakita.” Impangag ti APO ti dawatna ket nakita ti adipen a nasaknapan ti bakras ti turod kadagiti kabalio ken umap-apuy a lugan a pakigubat a nanglikmut ken ni Eliseo.

¹⁸Idi dumarup dagiti Siriano, inkararag ni Eliseo: “O APO, pagbulsekem koma dagitoy a tattao!” Impangag ni Yahweh ti kararagna ket nagbulsek dagiti lallaki.

¹⁹Napan ni Eliseo kadakuada ket kinunana, “Nayaw-awankayo; saan a daytoy nga ili ti birbirokenyo. Surotendak ket ipankay iti tao a sapsapulenyo.” Inturongna ida idiay Samaria.

²⁰Apaman a nakastrekda iti siudad, inkararag ni Eliseo: “O APO, luktam dagiti matada tapno makakitada.” Impangag ni Yahweh ti kararagna. Insublina ti panagkitada ket nakitada nga addada iti uneg ti Samaria.

²¹Idi makita ti ari ti Israel dagiti mannakigubat ti Siria, sinaludsodna ken ni Eliseo, “Papatayek kadi ida, apo? Papatayek kadi ida?”

²²“Saan,” insungbat ni Eliseo. “Uray dagiti tiniliwmo iti paggugubatan, dimo mabalin a patayen ida. Ikkam ida iti kanen ken inumen ket palubosam ida nga agsubli iti arida.”

²³Iti kasta, insaganaan ti ari ti Israel ida iti dakkel a padaya. Kalpasan ti pannangan ken yiinumda, nagsublida iti ari ti Siria. Manipud idin, simmardengen ti panangraut dagiti taga-Siria iti daga ti Israel.

²⁴Iti saan a mabayag, impanguloan ni Ben-hadad nga ari ti Siria ti entero nga armadana a nangraut iti Israel; linakubna ti Samaria.

²⁵Gapu iti daytoy, nagsaknap ti bisin iti siudad. Iti kinakirang ti makan, nailako ti ulo ti asno iti 80 a bagi ti pirak ket lima a bagi ti pirak ti gatad ti kagudua ti litro a balang a lasona.

²⁶Iti maysa nga aldaw a magmagna ti ari ti Israel iti rabaw ti bakud ti siudad, adda babai a nangipukkaw, “Tulongannak koma, Natan-ok nga Ari!”

²⁷Insungbatna, “No dinaka tulongan ti APO, ania koma ti maitulongko kenka? Adda kadi trigok wenno arakko?

²⁸Ania ti parikutmo?”

²⁸Kinuna ti babai, “Idi kalman, imbaga daytoy a babai a kanenmi ti anakko ket kanenminto met ti anakna iti sumuno nga aldaw.

²⁹Linutomiⓗ ngarud ti anakko ket sindami. Iti sumuno nga aldaw, imbagak kenkuana a lutoenmi ti anakna ngem inlemmengna ket dina kayat nga iruar.”

³⁰Rinay-ab ti ari ti pagan-anayna idi mangngegna daytoy. Ket nakita dagiti tattao nga asideg iti bakud a siaarruat gayam ti ari iti nakersang a lupot a pagilasinan iti nakaro a panagladingitna.

³¹Kinuna ti ari, “Uray patayennak ti Dios no diak paputolan ni Eliseo ita nga aldaw!”

³²Nangibaon iti mapan mangala iti profeta.

³²Kabayatanna, adda ni Eliseo iti balayna agraman dagiti panglakayen a napan bimmisita kenkuana. Sakbay a simmangpet ti imbaon ti ari, kinuna ni Eliseo kadagiti panglakayen, “Nangibaon dayta a mammapatay iti umay mangputol kaniak! Ita, siputanyo ta apaman a makadanon ditoy, irikepyo ti ruangan ket diyo pastreken. Sumarsaruno kenkuana ti mismo nga ari.”

³³Madama pay laeng nga agsasao idi dumteng ti ari[10] ket kinunana, “Ti APO ti nangyeg iti daytoy a didigra. Apay nga urayek pay laeng ti tulongna?”