2 Ar-ari 8:1-29 RIPV1996 - Bible AI

¹Imbagaⓘ idi ni Eliseo iti Sunamita nga ina ti ubing a pinagungarna, “Pumanawkayo ket inkay agnaed a sangafamiliaan iti sabali a lugar, ta mangyeg ti APO iti panagbisin iti daytoy a pagilian nga agpaut iti pito a tawen.”

²Tinungpal ti babai ti bilin ni Eliseo ket napanda nagnaed idiay Filistia iti pito a tawen.

³Kalpasan ti pito a tawen, nagsubli ti babai idiay Israel. Napan iti ari tapno dawatenna a maisubli kenkuana ti balay ken talonna.

⁴Nadanonna ti ari a makisarsarita ken ni Gehazi nga adipen ni Eliseo. Kayat ti ari a maammoan ti maipapan kadagiti milagro nga inar-aramid ni Eliseo.

⁵Idi madama nga es-estoriaen ni Gehazi no kasano ti panangpagungar ni Eliseo iti natay a tao, indatag ti babai ti dawatna iti ari. Kinuna ni Gehazi iti ari, “Natan-ok nga Ari, daytoy ti ina ket daytoy met ti anakna a pinagungar ni Eliseo!”

⁶Nagsaludsod ti ari ket pinatalgedan ti babai ti imbaga ni Gehazi. Daytoy ti gapuna a nangayab ti ari iti maysa nga ofisial ket imbilinna, “Kitaem a maisubli ti amin a sanikuana, agraman ti pateg ti amin a naapit kadagiti talonna iti las-ud ti pito a tawen a kaawanna.”

⁷Napan ni Eliseo idiay Damasco. Nairana a masakit ni Ben-hadad nga ari ti Siria. Idi maipadamag iti ari nga adda ni Eliseo,

⁸kinunana ken ni Hazael, maysa kadagiti ofisialesna, “Mangalaka iti sagut ket ipanmo iti profeta. Kiddawem kenkuana a makiuman iti APO ta damagenna no umimbagak pay wenno saan.”

⁹Nangisagana ni Hazael iti amin a kita ti kasayaatan a produkto ti Damasco; naikarga dagitoy iti 40 a kamelio nga intugotna a napan ken ni Eliseo. Idi dumteng, kinunana, “Imbaonnak ni adipenmo nga Ari Ben-hadad tapno damagek kenka no umimbag wenno saan iti sakitna.”

¹⁰Insungbat ni Eliseo, “Impakaammo kaniak ti APO a matay ti ari, ngem inka ibaga kenkuana nga aglaingto.”

¹¹Pinerrengna ni Hazael. Nailadawan ti kasta unay a buteng iti rupa ni Eliseo agingga a saan a makatalna ni Hazael. Pagammoan, nagsangit ni Eliseo.

¹²“Apay nga agsangsangitka, apo?” sinaludsod ni Hazael.

¹²“Gapu ta ammok dagiti kinaranggas nga ipalak-ammonto kadagiti Israelita,” insungbat ni Eliseo. “Puoramto dagiti sarikedkedda, papatayemto dagiti lallaki nga agtutubo, pangpang-oremto dagiti annakda agingga a matayda ken butiakamto dagiti masikog.”

¹³“Kasanoⓙ nga agbalinak a mannakabalin unay?” insungbat ni Hazael. “Awan serserbik a tao.” “Impakita kaniak ti APO nga agbalinkanto nga ari ti Siria,” insungbat ni Eliseo.

¹⁴Nagsubli ni Hazael iti ayan ni Ben-hadad. Sinaludsod ti ari, “Ania ti kuna ni Eliseo?” “Imbagana kaniak nga awan duadua nga umimbagka,” insungbat ni Hazael.

¹⁵Ngem iti sumuno nga aldaw, nangala iti ules, binabasana sana linungnguop ti ari agingga a natay.

¹⁵Ket sinuktan ni Hazael ni Ben-hadad a kas ari ti Siria.

¹⁶Iti maikalima a tawen a panagturay ni Joram nga anak ni Ahab a kas ari ti Israel,[12] nagari iti Juda ni Jehoram nga anak ni Jehosafat.

¹⁷Agtawen iti 32 idi ni Jehoram. Nagturay idiay Jerusalem iti walo a tawen.

¹⁸Anak ni Ahab ti asawana ket kas iti familia ni Ahab, tinuladna dagiti dakes nga aramid dagiti ari ti Israel. Nagbasol ken ni Yahweh

¹⁹ngemⓚ saan a kayat a dadaelen ni Yahweh ti Juda agsipud ta inkarina idi iti daydi adipenna a David nga agturayto iti agnanayon dagiti kaputotanna.

²⁰Bayatⓛ ti panagturay ni Jehoram, immalsa ti Edom a maibusor iti Juda ket nagbalin a siwawaya a pagarian.

²¹Ngarud, nagrubbuat ni Jehoram agraman amin a luganna a pakigubat a mapan idiay Zair a nanglawlawan ti armada dagiti Edomita kadakuada. Iti rabii, nakalibas ni Jehoram a kaduana dagiti pangulo dagiti luganna a pakigubat. Nawaraswarasda dagiti soldadona, ket nagawidda kadagiti balbalayda.

²²Manipud idin, simmina ti Edom iti panangituray iti Juda ket siwawaya pay laeng agpapan ita. Immalsa met ti siudad ti Libna iti dayta a tiempo.

²³Nailanad iti Pakasaritaan dagiti Ari ti Juda ti dadduma a pasamak iti panagturay ni Jehoram.

²⁴Idi matay, naitabon kadagiti tanem dagiti ari iti Siudad ni David, ti daan a paset ti Jerusalem. Ni Ahazias nga anakna ti simmukat kenkuana nga ari.

²⁵Iti maika-12 a tawen a panagturay ni Joram nga anak ni Ahab kas ari ti Israel, naisaad nga ari iti Juda ni Ahazias nga anak ni Jehoram.

²⁶Duapulo ket dua ti tawen ni Ahazias idi agari ket makatawen a nagturay idiay Jerusalem. Ni Atalia nga apoko ni Omri nga ari ti Israel ti inana.

²⁷Gapu ta naikamang ni Ahazias ken ni Ari Ahab, nagbasol ken ni Yahweh a kas iti inaramid ti familia ni Ahab.

²⁸Kimmappon ni Ari Ahazias ken ni Joram nga ari ti Israel ket ginubatda ni Hazael nga ari ti Siria. Nagranget dagiti dua nga armada iti siudad ti Ramot idiay Galaad ket nasugatan ni Joram.

²⁹Nagsubli iti siudad ti Jezreel tapno agpaimbag. Napan sinarungkaran ni Ahazias sadiay.