2 Cronicas 1:1-17 RIPV1996 - Bible AI

¹Natalged ti panagturay ni Solomon nga anak ni Ari David ta binendisionan ni Yahweh a Diosna, ket pinagbalinna a nabileg unay.

²Pinaayaban ni Ari Solomon dagiti amin nga ofisiales a pangulo dagiti buyot a rinibu ken buyot a ginasut, amin nga ofisiales ti gobierno, amin nga ulo ti familia ken amin a tattao.

³Imbilinna kadakuada a kumuyogda kenkuana a mapan iti lugar a pagdaydayawan idiay Gabaon, ta adda sadiay ti Tolda ti Dios nga inaramid ni Moises nga adipen ti Dios idi addada idiay let-ang. (

⁴Nupayⓐ kasta, adda ti Lakasa ti Tulag ti Dios idiay Jerusalem. Naikabil iti tolda a binangon ni Ari David idi innalana ti Lakasa manipud iti Siudad ti Jearim.)

⁵Addaⓑ met idiay Gabaon ti altar a bronse nga inaramid idi ni Bezalel nga anak ni Uri ken apoko ni Hur. Naikabil ti altar iti sangoanan ti Tolda ti Dios. Napan sadiay ni Solomon ken dagiti amin a tattao ket nagdaydayawda iti Dios.

⁶Iti sangoanan ti Tolda, nagdaydayaw ti ari ken ni Yahweh babaen iti panangidatagna kadagiti daton iti rabaw ti altar a bronse. Nangidaton iti 1,000 nga animal ket pinuoranna ida a sibubukel iti rabaw ti altar.

⁷Iti dayta a rabii, nagparang ti Dios ken ni Solomon ket sinaludsodna, “Ania ti kayatmo nga itedko kenka?”

⁸Simmungbat ni Solomon, “Naimbagkay unay iti daydi amak a David, ket ita, insaadnak nga ari a sukatna.

⁹Oⓒ APO a Dios, natungpalen ti inkarim kenkuana. Insaadnak nga ari dagiti nakaad-adu a tattao a di mabilang ti kaaduda.

¹⁰Itedmo ngarud kaniak ti sirib ken ti ammo a kasapulak iti panangiturayko kadagitoy a tattao. No saan, kasano a matarawidwidak daytoy dakkel a pagilian?”

¹¹Insungbat ti Dios ken ni Solomon, “Nasayaat ti pinilim. Dimo tinarigagayan ti sanikua, wenno kinabaknang ken dayaw. Dimo met dinawat ti ipapatay dagiti kabusormo, wenno ti napaut a panagbiag, ngem nagkiddawka iti sirib ken ammo tapno maiturayam dagitoy a tattao a nangisaadak kenka nga ari.

¹²Ikkanka iti sirib ken pannakaawat. Saan la a dayta. Paraburanka pay iti ad-adu a kinabaknang, sanikua ken dayaw nga awan pay ari a nakaitedanna wenno pakaitedannanto.”

¹³Pimmanaw[1] ni Solomon iti pagdaydayawan idiay Gabaon, nga ayan ti nasagradoan a Tolda, ket nagsubli idiay Jerusalem. Sadiay ti nangiturayanna iti Israel.

¹⁴Nangbuangayⓓ iti buyot a buklen ti 1,400 a lugan a pakigubat ken 12,000 a mannakigubat a nagkabalio. Inkabilna dagitoy idiay Jerusalem ken iti nadumaduma a siudad.

¹⁵Bayat ti panagturayna, nagbalin a gagangay a kas bato ti kaadu ti pirak ken balitok idiay Jerusalem. Adu ti kayo a sedro a kas iti kaadu dagiti sikamoro kadagiti katurturodan ti Juda.

¹⁶Naggatangⓔ dagiti tattaona kadagiti kabalio idiay Musri[2] ken Cilicia.[3]

¹⁷Naggatangda pay kadagiti lugan a pakigubat idiay Egipto sada ilako idi kadagiti ari dagiti Heteo ken Siriano; isuda pay ti paggapuan dagiti kabalioda. Agpateg iti 600 a bagi ti pirak ti tunggal lugan a pakigubat ken 150 a bagi ti pirak ti tunggal kabalio.