2 Cronicas 12:1-16 RIPV1996 - Bible AI

¹Idi natalgeden ti panagari ni Rehoboam, tinallikudanna agraman dagiti amin a tattaona ti Linteg ni Yahweh.

²Iti maikalima a tawen a panagturayna, rinaut ni Sisak nga ari ti Egipto ti Jerusalem kas dusada iti inaramidda.

³Buklen ti armada ni Sisak ti 1,200 a lugan a pakigubat, 60,000 a nagkabalio ken di mabilbilang a mannakigubat agraman dagiti Libiano, Sukio ken Etiopiano.

⁴Sinakup ni Sisak dagiti nasarikedkedan a siudad ti Juda ket dimmanon agingga idiay Jerusalem.

⁵Gapu iti butengda ken ni Sisak, naguummong da Ari Rehoboam ken dagiti papangulo ti Juda idiay Jerusalem. Napan ni profeta Semaias kadakuada ket imbagana, “Kastoy ti kuna ti APO kadakayo: ‘Binaybay-andak; ita, baybay-ankayo met ket yawatkayo iti pannakabalin ni Sisak.’”

⁶Inannugot ti ari ken dagiti papangulo a nagbasolda ket kinunada, “Nalinteg ti pangngeddeng ti APO.”

⁷Iti pannakakita ni Yahweh a nagpakumbabada, kinunana manen ken ni Semaias, “Gapu ta annugotenda ti basolda, saanko a pukawen ida. Ngem inton rumaut ni Sisak, agpakarigatdanto a makalasat ket dinto marikna unay ti Jerusalem ti naan-anay a panagdissuor ti pungtotko.

⁸Nupay kasta, parmekento ni Sisak ida ket maawatandanto ti pagdumaan ti panagserbi kaniak ken ti panagserbi kadagiti ari kadagiti sabali a daga.”

⁹Dimtengⓖ ni Ari Sisak iti Jerusalem ket innalana dagiti gameng ti Templo ken ti palasio. Innalana amin, agraman dagiti balitok a kalasag nga inaramid ni Ari Solomon.

¹⁰Nagaramid ni Rehoboam kadagiti kalasag a bronse a kasukat dagiti naitalaw a kalasag. Intalekna dagitoy kadagiti ofisiales a mangimaton iti pannakaguardia dagiti ruangan ti palasio.

¹¹Tunggal sumrek ni Rehoboam iti Templo, awiten dagiti guardia dagiti kalasag sadanto met la isubli iti kuarto dagiti guardia.

¹²Gapu ta nagpakumbaba ni Rehoboam, saan unay a nagpungtot ni Yahweh kenkuana. Saanna a dinadael a naminpinsan ket simmayaat ti kasasaad ti Juda.

¹³Nagturay ni Rehoboam idiay Jerusalem ket bimmileg ti pannakabalinna nga ari. Agtawen iti 41 idi agari ket nagturay iti 17 a tawen idiay Jerusalem, ti siudad a pinili ni Yahweh kadagiti amin a sakup ti Israel a kas lugar a pagdaydayawan kenkuana. Ni Naama a taga-Ammon ti ina ni Rehoboam.

¹⁴Dakes ti inar-aramidna ta dina inkagumaan a biroken ti pagayatan ni Yahweh.

¹⁵Nailanad iti Pakasaritaan ni Profeta Semaias ken iti Pakasaritaan ni Profeta Iddo dagiti gapuanan ni Rehoboam manipud rugi agingga iti maudi ken ti pakasaritaan ti kapuonanna. Kanayon idi nga agginnubat da Rehoboam ken Jeroboam.

¹⁶Natay ni Rehoboam ket naitabon iti tanem dagiti ari iti Siudad ni David. Ni anakna nga Abias ti simmukat kenkuana nga ari.