2 Cronicas 20:1-37 RIPV1996 - Bible AI

¹Iti saan a nabayag, dimteng dagiti armada ti Moab ken Ammon agraman dagiti kakaduada a Meunita[18] ket rinautda ti Juda.

²Sumagmamano a tattao ti naibaon a mapan ken ni Jehosafat ket impakaammoda: “Adda dakkel nga armada a naggapu idiay Edom iti ballasiw ti Natay a Baybay tapno umaydaka rauten. Nasakupdan ti Hazazon Tamar.” (Daytoy ti sabali a nagan ti Engedi.)

³Iti danag ni Jehosafat, nagkararag ken ni Yahweh ket kiniddawna nga idalanna. Imbilinna ti panagayunar iti entero a pagilian.

⁴Manipud iti amin a siudad ti Juda, nagdardaras dagiti tattao a napan idiay Jerusalem tapno dawatenda ti panangidalan ni Yahweh.

⁵Nagtakder ni Ari Jehosafat iti sangoanan dagiti tattao ti Jerusalem ken Juda a naguummong iti baro a paraangan ti Templo,

⁶ket inkararagna iti napigsa: “O APO a Dios dagiti kapuonanmi, manipud iti langit nga ayanmo, iturayam amin a pagilian ditoy lubong. Mannakabalin ken nabilegka, ket awan ti makabael a bumusor kenka.

⁷Sika ⓘ ti Diosmi. Idi dumteng dagiti tattaom nga Israelita iti daytoy a daga, pinagtalawmo dagiti agnanaed ditoy samo inted ti daga kadagiti kaputotan ni Abraham a gayyemmo tapno tagikuaenda iti agnanayon.

⁸Nagnaedda ditoy ket binangonda ti Templo a pangdayawda kenka. Pagaammoda

⁹a no adda didigra a dumteng kadakuada a kas iti gubat, angol, wenno bisin—umayda agtakder iti sangoanan daytoy a Templo a pagdaydayawan kenka. Agkararagda kenka ket ipangagmo ida; isalakanmo ida iti panawen ti pannakadidigrada.

¹⁰“Ita,ⓙ rinautdakami dagiti Ammonita, Moabita ken Edomita. Dimo idi pinalubosan dagiti kapuonanmi a sumrek kadagiti dagada; iti kasta, idi nakapanawdan idiay Egipto, nanglikaw dagiti kapuonanmi ket dida inan-ano ida.

¹¹Ita, kastoy ketdin ti pagsupapakda kadakami. Umaydakami papanawen iti daytoy a daga nga intedmo kadakami.

¹²Sika ti Diosmi! Dusaem koma ida ta dimi kabaelan a sarangten ti kastoy a kadakkel nga armada a mangraut kadakami. Dimi ammo ti aramidenmi, ngem agpatulongkami kenka.”

¹³Adda amin a lallaki iti Juda, agraman dagiti assawa ken annakda; nakatakderda iti imatang ni Yahweh.

¹⁴Inturayan ti espiritu ni Yahweh ti maysa a Levita nga adda iti tallaong. Isu ni Jahaziel nga anak ni Zacarias ken kameng ti familia ni Asaf iti kapuonan da Mattanias, Jeiel ken Benaias.

¹⁵Kinunaⓚ ni Jahaziel, “Natan-ok nga Ari, ken dakayo a tattao ti Juda ken Jerusalem, kuna ti APO a dikay maupay wenno agbuteng a sumaranget iti daytoy dakkel nga armada. Saan a dakayo no di ket ti Dios ti makaammo iti pagbanagan ti gubat.

¹⁶Sarangtenyonto ida inton sumang-atda idiay Bessang ti Ziz inton bigat. Gubatenyonto ida iti ungto ti tanap nga agturong iti awan matagtagitao a lugar iti asideg ti Jeruel.

¹⁷Saantoⓛ a dakayo ti makigubat. Agyankayo latta iti lugaryo, ket aguraykayo. Maimatanganyonto ti panangipaay ti APO iti balligiyo. Tattao ti Juda ken Jerusalem, dikay agtukkiad wenno agbuteng. Inkay makigubat ket kuyogennakayto ti APO!”

¹⁸Kalpasanna, nagrukob ni Ari Jehosafat iti daga. Nagdumog met dagiti tattao ket nagdaydayawda amin ken ni Yahweh.

¹⁹Timmakder dagiti Levita a nagtaud iti familia da Kohat ken Kora ket iti napigsa a timek, indaydayawda ni Yahweh a Dios ti Israel.

²⁰Kabigatanna, sinapa dagiti tattao ti napan iti lugar nga awan matagtagitao iti asideg ti Tekoa. Idi agrubbuatda, kinuna ni Jehosafat kadakuada, “Tattao ti Juda ken Jerusalem, agtalekkayo iti APO a Diosyo, ket sarangtenyonto ti kabusoryo. Patienyo ti ibagbaga dagiti profetana ket agballigikayto.”

²¹Kalpasan ti pannakiuman ti ari kadagiti tattao, binilinna ti sumagmamano a kumakanta nga agkawesda kadagiti pagan-anay nga us-usarenda kadagiti nasagradoan nga okasion ket magnada iti sangoanan ti armada. Kastoy ti kantaenda: “Madaydayaw ti APO! Agnanayon ti ayatna!”

²²Idi rugianda ti agkanta, winarawara ni Yahweh ti armada dagiti kabusor.

²³Ginubat dagiti Ammonita ken Moabita ti armada dagiti Edomita ket pinatayda amin ida. Kalpasanna, isudan ti nagraranget iti nadawel.

²⁴Idi makadanon ti armada dagiti Judio iti torre a pakatannawaganda iti let-ang, nakitada a naiwalang amin a kabusor iti lugar a yanda; awan ti nakalasat kadakuada.

²⁵Immasideg ni Jehosafat ken dagiti buyotna tapno agsamsamda. Nakasarakda iti adu a baka,[19] abasto, pagan-anay ken dadduma a napapateg nga alikamen. Uray no tallo nga aldawda a nagsamsamsam, dida naala amin gapu iti kaadu ti masamsamda.

²⁶Iti maikapat nga aldaw, naguummongda iti Tanap ti Beraca ket dinaydayawda ni Yahweh gapu kadagiti amin nga inaramidna. (Daytoy ti gapuna a napanaganan ti tanap iti “Beraca,” kayatna a sawen, “panagdayaw.”)

²⁷Impanguloan ni Jehosafat dagiti buyotna a nagsubli a sibaballigi idiay Jerusalem, agsipud ta pinarmek ni Yahweh dagiti kabusorda.

²⁸Idi makadanonda iti siudad, nagtarusda iti Templo a nabuyogan ti uni dagiti arpa ken trumpeta.

²⁹Nagbuteng dagiti amin a nasion a nakadamag iti panangparmek ni Yahweh kadagiti kabusor ti Israel.

³⁰Ket nagturay ti talna ken kappia iti pagarian bayat ti panagari ni Jehosafat, ta inikkan ti Dios iti talged iti aglawlaw.

³¹Agtawen ni Jehosafat iti 35 idi maisaad nga ari ti Juda ket nagturay idiay Jerusalem iti 25 a tawen. Ni Azuba nga anak ni Silhi ti inana.

³²Kas iti daydi amana nga Asa, nalinteg ti inaramidna iti imatang ni Yahweh.

³³Ngem dina pinadadael dagiti pagdaydayawan kadagiti nangato a lugar. Saan met a pimmasnek dagiti tattao iti panagdaydayawda iti Dios dagiti kapuonanda.

³⁴Nailanad iti Pakasaritaan ni Jehu nga Anak ni Hanani amin dagiti inaramid ni Jehosafat manipud iti panangrugi ti panagturayna agingga iti panagpatinggana. Paset daytoy ti Pakasaritaan dagiti Ari ti Israel.

³⁵Iti naminsan, nakitulag ni Jehosafat nga ari ti Juda ken ni Ahazias nga ari ti Israel. Adu ti dakes nga aramid ni Ari Ahazias.

³⁶Idiay sangladan ti Eziongeber, nagaramidda kadagiti barko nga aglayag idiay Tarsis.

³⁷Ngem naballaagan ni Jehosafat idi kinuna kenkuana ni Eliezer nga anak ni Dodavahu, “Gapu ta nakitulagka ken ni Ahazias, dadaelento ti APO dagiti inaramidyo.” Taga-Maresa ni Eliezer.

³⁷Narba dagiti barko, ket pulos a didan naglayag.