2 Juan 1:1-13 RIPV1996 - Bible AI

¹Patgek nga Ina: Isuratko daytoy kenka ken kadagiti annakmo,[1] dakayo a pudno nga ay-ayatek. Saan la a sisiak ti agayat kadakayo, no di pay ket ti amin a makaammo iti pudno,

²agsipud ta agtalinaed kadatayo ti pudno, ket addanto nga agnanayon kadatayo.

³Sapay koma ta maaddaantayo iti parabur, asi ken talna nga aggapu iti Dios Ama ken ni Jesu-Cristo nga Anak ti Ama. Wen, magun-odtayo koma dagitoy babaen iti biag a napudno ken napnoan ayat. Siak a Panglakayen ti naggapuan daytoy a surat.

⁴Naragsakanak unay a nakaammo a sumagmamano kadagiti annakmo ket agbibiagda a mayannurot iti pudno, kas imbilin ti Ama kadatayo.

⁵Ketⓐ ita, dawatek kenka, patgek nga Ina: agiinnayattayo koma amin. Saan a baro a bilin daytoy isuratko kenka—isu met laeng daydi bilin nga addan kadatayo manipud idi damo.

⁶Ti kaipapanan ti ayat a sarsaritaek isu ti panagtungpal kadagiti bilbilin ti Dios. Ti bilin a nangngegyo amin manipud idi damo isu daytoy: Agbiagkayo iti ayat.

⁷Nagwarasen ditoy lubong ti adu a mangallilaw, tattao a di mangbigbig nga immay ni Jesu-Cristo iti lasag. Mangallilaw ken Kabusor ni Cristo dagiti kakasta a tattao.

⁸Agannadkayo ngarud, amangan no mapukawyo dagiti nagbannoganyo ket diyo maawat ti naan-anay a gunggona.

⁹Ti siasinoman a saan nga agtalinaed iti pannursuro ni Cristo, awan kenkuana ti Dios. Ti agtalinaed iti pannursuro, adda kenkuana ti Ama ken ti Anak.

¹⁰Ngarud, no adda umay a mangyeg kadakayo iti pannursuro a saan a ti pannursuro ni Cristo, diyo awaten iti balayyo, wenno uray kablaawan la koma.

¹¹Ta ti mangkablaaw kenkuana, agbalin a kaduana iti dakes nga aramidna.

¹²Adu pay koma ti ibagak kadakayo, ngem diak kayat nga isurat iti papel ken tinta. Uray ta panggepko ti sumarungkar kadakayo ket kasaokayto laengen a personal tapno naan-anay ti ragsaktayo.

¹³Pakomustaandaka dagiti annak ti patpatgem a kabsatmo a babai.[2]