2 Pedro 1:1-21 RIPV1996 - Bible AI

¹Patgek a Kakabsat: Kablaawankayo, dakayo a naaddaan iti pammati a napateg kas iti pammati nga adda kadakami. Naawattayo ti maymaysa a pammati gapu ta nalinteg ti Dios ken ni Jesu-Cristo a Mangisalakan kadatayo. Sapay koma ta umad-adu ti paraburyo ken maikkankay iti talna iti pannakaammoyo iti Dios ken ni Jesus nga Apotayo. Naggapu kaniak daytoy a surat—ni Simon Pedro nga adipen ken apostol ni Jesu-Cristo.

³Babaen iti nadiosan a pannakabalinna, naited ti amin a kasapulantayo tapno masursurotayo ti agbiag a kas pudno a Kristiano. Maigapu daytoy iti pannakaammotayo ken ni Cristo a nangayab kadatayo tapno mairanudtay iti bukodna a[1] dayag ken kinaimbag.

⁴Kastoy ti pannangtedna kadatayo kadagiti naindaklan ken napapateg a sagut nga inkarina tapno malisianyo ti pannakadadael a pinarnuay dagiti nailubongan a tarigagay ket nairanudkayo iti nadiosan a kasasaadna.

⁵Gapu iti daytoy, ikagumaanyo nga inayon ti kinaimbag iti pammatiyo; iti kinaimbag, inayonyo ti pannakaammo;

⁶iti pannakaammo, inayonyo ti panagteppel; iti panagteppel, ti panagibtur; iti panagibtur, ti panagbuteng iti Dios;

⁷iti panagbuteng iti Dios, ti ayat a nainkabsatan; ket iti ayat a nainkabsatan, ti nadiosan nga ayat.

⁸Dagitoy ti kababalin a masapulyo, ket no nawadwadda kadakayo, aggagetkayto ket agbunganto ti pannakaammoyo ken ni Apotayo a Jesu-Cristo.

⁹Ngem ti siasinoman nga awanan kadagitoy, arrap ken nalipatanna a naugasanen kadagiti basbasolna iti napalabas.

¹⁰Isut' gapuna, kakabsatko, nga ikagumaanyo ti mangpatalged iti panangayab ken panangpili kadakayo ti Dios tapno saankayto a sumina iti pammatiyo.[2]

¹¹Iti kasta, mapalubosankayto a sumrek a siwawayawaya iti agnanayon a Pagarian ni Jesu-Cristo nga Apo ken Mangisalakan kadatayo.

¹²Daytoy ti gapuna a kanayon nga ipalagipko dagitoy kadakayo uray no ammoyon ida ken natibkerkayon iti naawatyo a kinapudno.

¹³Pagarupek a rebbengko nga ipalagip kadakayo dagitoy a bambanag bayat ti panagbiagko.

¹⁴Ammok a panawakton daytoy matay a bagi a kas imbaga kaniak ni Apotayo a Jesu-Cristo.

¹⁵Ngarud, aramidek ti amin a kabaelak tapno kanayon a malagipyo dagitoy a bambanag kalpasan ti ipupusayko.

¹⁶Dikami nagusar kadagiti naparbo a sarsarita idi impakaammomi kadakayo ti mannakabalin a yaay ni Apotayo a Jesu-Cristo. Ammomi ti sarsaritaenmi ta nakitami a mismo ti nadiosan a kinadayagna.

¹⁷Addakamⓐ idi iti sibayna idi maited kenkuana ti dayaw ken dayag a naggapu iti Dios Ama, idi kuna ti timek manipud iti Katan-okan a Dayag, “Daytoy ti Anakko a dungdungngoek a pakaragsakak unay!”

¹⁸Nangngegmi daytoy a timek a naggapu sadi langit idi naikuyogkami kenkuana iti nasantoan a bantay.

¹⁹Iti kasta, ad-adda manen ti panagtalekmi iti impakaammo dagiti profeta. Pagsayaatanyo no ipangagyo daytoy a kasla maysa a pagsilawan nga agranraniag iti nasipnget a lugar agingga iti agbannawag, ket agraniag kadagiti pusoyo ti lawag ti bituen ti agsapa.

²⁰Nangnangruna unay, laglagipenyo nga awan ti makailawlawag iti uray ania a padto iti Nasantoan a Surat iti bukodna a panunot.

²¹Ta awan a pulos ti padto a nagtaud iti nakem ti tao. Indalan ketdi ti Espiritu Santo dagiti tattao nga agsao iti mensahe ti Dios.