2 Pedro 3:1-18 RIPV1996 - Bible AI

¹Gagayyemko, maikaduan daytoy a suratko kadakayo. Kadagitoy dua a surat, pinanggepko a patibkeren dagiti pakinakemyo babaen iti panangipalpalagipko kadagitoy a bambanag kadakayo.

²Laglagipenyo koma ti kinuna dagidi nasantoan a profeta ken ti imbilin ti Apo ken Mangisalakan nga impakaammo dagiti apostolesyo.

³Umunaⓖ unay, maawatanyo koma a kadagiti maudi nga aldaw, umayto kadakayo dagiti tattao nga awan sabali a panggepda no di ti mangtungpal iti dakes a tarigagayda. Pagang-angawandakayto

⁴a kunkunada, “Inkarina nga umay, saan kadi? Ayanna ngarud? Natayen dagiti ammami, ngem awan met nagbaliwan ti amin manipud pannakaparsua ti lubong!”

⁵Saandaⓗ a bigbigen ti kinapudno nga idi un-unana, nagbilin ti Dios ket timmaud ti langit ken ti daga. Naparsua ti daga manipud iti danum ken babaen iti danum.

⁶Ketⓘ ti danum met laeng, wen, daydi Layus, ti nangdadael iti daan a lubong.

⁷Ngem babaen iti isu met laeng a sao ti Dios, mataginayon ti agdama a langit ken daga tapno dadaelento ti apuy. Ta mapuorandanto inton dumteng dayta nga aldaw a pannakaukom ken pannakadadael dagiti awanan-dios.

⁸Ngem,ⓙ gagayyemko, diyo liplipatan ti maysa a banag! Iti imatang ti Apo, awan paggiddiatan ti maysa nga aldaw ken sangaribu a tawen. Agpadpada dagitoy kenkuana.

⁹Saan nga itantan ti Apo a tungpalen ti inkarina, kas ipagarup ti dadduma. Ngem an-anusannakayo ti Apo gapu ta dina kayat a madadael ti siasinoman, no di ket kayatna nga agbabawi ti amin a tattao kadagiti basbasolda.

¹⁰Dumtengtoⓚ ti Aldaw ti Apo a di mapakpakadaan, kas iti yaay ti mannanakaw. Iti dayta nga Aldaw, agpukawto dagiti langlangit a kagiddan ti napigsa a daranudor, ket matunaw iti apuy ti init, bulan ken dagiti bituen ket awanton ti daga ken amin a linaonna.

¹¹Yantangay ta kastoy ti pannakadadaelto dagitoy, ania ngarud a kita ti tao ti pagbalinanyo? Masapul nga idatonyo ti bagiyo iti Dios ket agbiagkay a nasantoan.

¹²Kabayatanna, urayenyo ti idadateng ti Aldaw ti Dios. Aramidenyo ti amin a kabaelanyo a mangpapardas iti yaayna—ti Aldaw a pannakauram ken pannakadadael dagiti langlangit ken pannakatunawto dagiti planeta.

¹³Ngemⓛ namnamaentayo ti inkari ti Dios: ti baro a langit ken ti baro a daga a pagnaedanto ti kinalinteg.

¹⁴Iti kasta, gagayyemko, bayat ti panagur-urayyo iti dayta nga Aldaw, makikappiakayo iti Dios ket ikagumaanyo ti agbalin a nadalus ken awan pakapilawanna iti imatangna.

¹⁵Naanus ti Dios ket ibilangyo ti kinaanusna a kas gundaway nga itedna tapno maisalakankayo. Kasta met ti insurat kadakayo ni Pablo nga ingungotentayo a kabsat babaen iti panangaramatna iti kinasirib nga inted ti Dios kenkuana.

¹⁶Iti amin a suratna maipapan iti daytoy, kasta ti ipalpalagipna. Adda sumagmamano a bambanag a narigat a maawatan kadagiti sursuratna, ket balballikugen dagiti nengneng ken nakapuy ti pammatina a tattao a kas ar-aramidenda kadagiti dadduma a paset ti Nasantoan a Surat. Iti kasta, yegda ti bukodda a pannakadadael.

¹⁷Ngem dakayo, gagayyemko, ammoyon daytoy. Agannadkayo ngarud tapno dikayo mayaw-awan kadagiti biddut dagiti dakes a tattao ket matnagkayo manipud kadagiti natalged a lugaryo.

¹⁸Dumur-askayo iti parabur ken pannakaammoyo ken ni Jesu-Cristo nga Apo ken Mangisalakan kadatayo. Itan-ok ken idaydayawtayo ni Cristo, ita agingga iti agnanayon! Amen.