2 Samuel 12:1-31 RIPV1996 - Bible AI

¹Imbaonⓧ ni Yahweh ni profeta Natan ken ni David. Napan ni Natan ken ni David ket imbagana, “Adda dua a lallaki nga agnaed iti maymaysa nga ili. Ti maysa nabaknang ket ti maysa napanglaw.

²Adu ti baka ken karnero ti baknang,

³idinto ta maymaysa nga urbon ti karnero ti napanglaw, a ginatangna. Tinarakenna ti karnero ket dimmakkel iti balayna a kadua dagiti annakna. Imbilangna ti karnero a kas anakna a babai. Pakanenna iti bukodna a taraon, painumenna iti bukodna a kopa ken masansan a saklotenna.

⁴Iti naminsan, adda dimteng a sangaili ti baknang ngem dina kayat a partien ti maysa kadagiti animalna nga ipasango iti sangailina. Innalana ketdi ti karnero ti napanglaw ket pinartina nga impasango iti sangailina.”

⁵Kasta unay ti pungtot ni David iti nabaknang ket kinunana, “Isapatak iti nagan ti APO a sibibiag a masapul a mapapatay ti kasta a tao!

⁶Masapul a bayadanna iti mamimpat ti kaadu ti innalana gapu iti dakes nga inaramidna.”

⁷Kinuna ni Natan ken ni David: “Sika dayta a tao! Kastoy ti kuna ti APO a Dios ti Israel, ‘Pinagbalinka nga ari ti Israel, ket inispalka iti pannakabalin ni Saul.

⁸Intedko kenka ti pagarianna ken dagiti assawana. Pinagbalinka nga ari ti Israel ken Juda. No saan pay a makaanay daytoy, dinoblek pay koma ti itedko kenka.

⁹Apay a sinukirmo dagiti bilinko? Apay nga inaramidmo daytoy a kinadakes? Pinapapataymo ni Urias iti paggugubatan. Impalubosmo a papatayen dagiti Ammonita, ket kalpasanna, innalam ti asawana!

¹⁰Ita, gapu ta sinukirnak ket innalam ti asawa ni Urias, kanayonto nga adda matay iti kampilan nga agtaud iti kaputotam.

¹¹Isapatakⓨ kenka a pataudekto ti maysa iti bukodmo a familia a mangyeg iti riribuk kenka. Alaekto dagiti assawam ket itedko ida iti sabali a tao. Kaiddaennanto ida uray iti tengnga ti aldaw.

¹²Nagbasolka iti nalimed, ngem ipalubosko a maaramid daytoy iti tengnga ti aldaw tapno makita dagiti amin nga Israelita.’”

¹³Kinuna ni David, “Nagbasolak iti APO.” Simmungbat ni Natan, “Pakawanennaka ti APO iti basolmo; saanka a matay.

¹⁴Ngem gapu ta sinukirmo ti APO, matayto ti agbalin nga anakmo.”

¹⁵Kalpasanna, nagawid ni Natan.

¹⁵Kas kinuna ni Yahweh, nagsakit iti nakaro ti anak ni David nga impasngay ni Batseba nga asawa ni Urias.

¹⁶Nagkararag ni David iti Dios tapno umimbag ti ubing. Saan a nangan iti uray ania, ket tunggal rabii mapan iti kuartona ket agpatpatnag nga agid-idda iti datar.

¹⁷Napan dagiti ofisiales iti palasiona ket pinadasda a pabangonen ngem dina kinayat. Saanna a kayat ti makilanglang kadakuada.

¹⁸Kalpasan ti makadomingo, natay ti ubing, ket mabuteng dagiti ofisiales a mangipadamag kenkuana. Kinunada, “Idi sibibiag pay ti ubing, dinatay impangag ni David no kasaotayo. Kasano ti panangibagatayo kenkuana a natayen ti ubing? Amangan no makapanunot nga agaramid iti dakes.”

¹⁹Idi madlaw ni David nga agiinnarasaasda, ammona a natayen ti ubing. Iti kasta, sinaludsodna kadakuada, “Natay kadin ti ubing?” “Wen, apo, natayen,” insungbatda.

²⁰Bimmangon ni David, nagdigos, nagsagaysay ken sinukatanna ti pagan-anayna. Napan iti balay ni Yahweh ket nagdaydayaw sadiay. Nagsubli iti palasio, dimmawat iti taraon, ket nangan.

²¹Kinuna dagiti ofisialesna, “Dimi maawatan daytoy. Idi sibibiag pay ti ubing, sinangsangitam ket dika nangnangan. Ngem apaman a natay, bimmangonka ket nanganka.”

²²“Wen,” kinuna ni David. “Idi sibibiag pay ti ubing, nagayunarak ket nagsangsangitak idi bareng no kaasiannak ti APO ket paimbagenna ti anakko.

²³Ngem ita ta natayen ti ubing, apay pay la nga agayunarak? Mapagbiagko pay kadi ti ubing? Addanto aldaw a sumarunoak kenkuana iti ayanna ngem pulos a dinton agsubli kaniak.”

²⁴Liniwliwa ni David ni Batseba ket nagkaiddada nga agassawa. Nagpasngay ni Batseba iti lalaki a pinanaganan ni David iti Solomon. Inay-ayat ni Yahweh ti ubing,

²⁵ket binilinna ni profeta Natan a panagananna ti ubing iti Jedidia,[19] agsipud ta inay-ayat ni Yahweh ti ubing.

²⁶Kabayatanna, intultuloy ni Joab ti pananggubatna iti Rabba, ti kangrunaan a siudad ti Ammon. Idi dandanina masakup ti Rabba,

²⁷nangibaon kadagiti mapan mangibaga ken ni David iti daytoy, “Dinarupko ti Rabba ket sinakupko ti paggapuan ti danum ti siudad.

²⁸Ummongem ngarud dagiti amin a soldadom, darupenyo ti siudad ket sakupenyo. Diak kayat a siak ti maidayaw iti pannakasakupna.”

²⁹Inummong ngarud ni David dagiti amin a soldadona. Napan idiay Rabba, dinarupna ket nagballigi a nangparmek iti siudad.

³⁰Adda balitok a korona ni Molec a dios dagiti Ammonita. Agdagsen iti 75 a libra ti korona, ken napattokan iti napateg a bato. Innala ni David ti napateg a bato ket inkabilna iti koronana. Adu ti sinamsamna iti siudad.

³¹Pinagtalawna dagiti umili iti siudad; adda dagiti pinagtrabahona a kas kantero, mammanday ken karpintero, ket adda met dagiti pinilitna nga agaramid[20] iti ladrilio. Kastoy ti inaramidna kadagiti tattao iti amin nga ili ti Ammon. Kalpasanna, nagsubli ni David ken dagiti amin a soldadona idiay Jerusalem.