2 Taga-Corinto 3:1-18 RIPV1996 - Bible AI

¹Iti panagsaomi kadagitoy, ipagarupyo kadi nga idaydayawmi manen ti bagbagimi? Wenno, kas iti ar-aramiden ti dadduma, kasapulanmi kadi ti surat a mangyam-ammo kadagiti bagbagimi kadakayo wenno adda surat nga aggapu kadakayo a mangyam-ammo kadakami kadagiti sabali?

²Dakayo a mismo ti suratmi a nailanad iti pusomi tapno maammoan ken mabasa ti siasinoman.

³Nalawagⓕ a ni Cristo ti nangisurat iti daytoy ket pinaitulodna kadakami. Naisurat daytoy, saan nga iti tinta no di ket iti Espiritu ti sibibiag a Dios ket saan a kadagiti tapi a bato no di ket iti puso ti tao.

⁴Sawenmi daytoy ta agtalekkami iti Dios babaen ken ni Cristo.

⁵Awan ti panggapuanmi nga agkuna a kabaelanmi daytoy a trabaho. Aggapu iti Dios ti kabaelanmi.

⁶Isuⓖ ngamin ti nangted iti kabaelanmi a kas adipen ti baro a tulag a saan a buklen ti naisurat a linteg, no di ket ti Espiritu. Patay ti yeg ti naisurat a linteg, ngem biag ti ited ti Espiritu.

⁷Naikitikitⓗ ti Linteg kadagiti tapi a bato, ket idi maited, nagparang ti dayag ti Dios. Nupay agpukpukaw idi ti raniag iti rupa ni Moises, nagpaiduma latta ti raniagna ket saan a maiperreng dagiti Israelita ti matada kenkuana. No ti Linteg a pannakatay ti ibunga ti pannakaipatungpalna ket dimteng a nabuyogan iti kasta a kinadayag,

⁸saan aya a dakdakkel pay ti dayag ti aramid ti Espiritu?

⁹No nadayag ti Linteg a pakaukoman ti tao, ad-adda pay ti dayag a mangyeg iti pakaisalakanan!

¹⁰Mabalin a kunatayo a gapu ta naranraniag nga adayo ti dayag ita, napukawen ti nagpaiduma a dayag ti napalabas.

¹¹Ta no adda dayag ti banag a limmabas laeng, ad-adda pay ti dayag dayta agpaut iti agnanayon.

¹²Naturedkami gapu ta adda daytoy a namnamami.

¹³Saankamiⓘ a kas ken ni Moises a nangabbong iti rupana tapno di makita dagiti Israelita ti panagpukaw ti raniag.

¹⁴Pudno a nakullaapan ti panunotda. Agingga ita, no basaenda dagiti libro ti daan a tulag, adda pay laeng daydi abbong a nangkumot iti panunotda. Maikkat laeng ti abbong no adda ti tao ken ni Cristo.

¹⁵Uray kadagitoy nga aldaw, tunggal basaenda ti Linteg ni Moises, naabbongan pay laeng ti panunotda.

¹⁶Ngemⓙ maikkat ti abbong, kas kuna ti Nasantoan a Surat, “Naikkat ti abbong ni Moises idi sumango iti Apo.”[4]

¹⁷“Ti Apo” iti daytoy a paset, isu ti Espiritu, ket iti sadinoman a yan ti Espiritu ti Apo, adda wayawaya.

¹⁸Ngarud, datayo amin nga awan abbong ti rupana, ipakitatayo ti dayag ti Apo. Balbaliwannatayo dayta met laeng a dayag nga aggapu iti Apo nga isu ti Espiritu tapno umaspingtayo kenkuana iti naranraniag pay a dayag.