2 Taga-Tesalonica 1:1-12 RIPV1996 - Bible AI

¹Kadagitiⓐ kamkameng ti iglesia dita Tesalonica, isuda a tattao ti Dios nga Amatayo ken tattao met ni Apo Jesu-Cristo, Sapay koma ta parabur ken talna ti ited kadakayo ti Dios Ama, ken ni Apo Jesu-Cristo. Naggapu kadakami daytoy a surat—Pablo, Silas ken Timoteo.

³Kakabsat, masapul a kanayon nga agyamankam iti Dios gapu kadakayo. Tumutop a kastoy ti aramidenmi agsipud ta rumangrang-ay ti pammatiyo ken dumakdakkel ti panagayatyo iti tunggal maysa.

⁴Isut' gapuna a dakami a mismo ti mangipasindayaw kadakayo kadagiti iglesia ti Dios. Pagpannakkelmi ti panagibtur ken pamamatiyo nga adda kadakayo uray pay no maidaddadanes ken agsagabakayo.

⁵Ipaneknek amin dagitoy a nainkalintegan ti panangukom ti Dios ket kas pagbanaganna, maikarikayo iti Pagarianna, nga isu ti agdama a pagsagsagabaanyo.

⁶Ngamin, nalinteg ti aramiden ti Dios: Pagsagabaennanto dagiti mangparparigat kadakayo.

⁷Pagin-awaennakayto nga agsagsagaba, ket kastanto met kadakami. Aramidennanto daytoy inton agparang ni Apo Jesus nga aggapu sadi langit, a kaduana dagiti mannakabalin nga anghelesna.

⁸Babaen iti gumilgil-ayab nga apuy, dusaennanto dagiti di mangbigbig iti Dios ken dagiti di agtulnog iti Naimbag a Damag maipapan ken ni Apotayo a Jesus.

⁹Madusadantoⓑ iti agnanayon a pannakadadael, ket maisinadanto iti sangoanan ti Apo ken iti dayag ti pannakabalinna.

¹⁰Mapasamakto daytoy inton umay iti dayta nga Aldaw tapno awatenna ti pannakaitan-ok nga aggapu kadagiti amin a tattaona ken pammadayaw nga aggapu kadagiti amin a mamati. Mairamankayto met kadakuada agsipud ta pinatiyo ti mensahe nga impakaammomi kadakayo.

¹¹Daytoy ti gapuna a kanayon nga ikarkararagandakayo. Dawatenmi iti Diostayo a pagbalinennakayo koma a maikari iti biag a nangayabanna kadakayo. Sapay koma ta babaen iti pannakabalinna, matungpal ti amin a tarigagayyo iti kinaimbag ken ti aramidyo iti pammati.

¹²Iti kasta, itan-okyonto ti nagan ni Apotayo a Jesus, ket itan-oknakayto met babaen iti parabur ti Diostayo ken ni Apo[1] Jesu-Cristo.