2 Taga-Tesalonica 2:1-17 RIPV1996 - Bible AI

¹Noⓒ maipapan iti yaay ni Apotayo a Jesu-Cristo ken iti pannakaurnongtayo tapno addatayto iti sidongna, kakabsat, dawatenmi kadakayo

²a dikay koma mariribukan wenno madanagan iti maibagbaga a dimtengen ti Aldaw ti Apo. Kunkunada a kasta ti naibagami bayat ti panangaskasabami wenno panagsuratmi.

³Dikay paallilaw iti siasino man iti uray ania a wagas. Ta dinto dumteng dayta nga Aldaw no di mapasamak ti Yaalsa a maibusor iti Dios ken panagparang ti Managdakdakes a naituding a mapan idiay infierno.

⁴Kontraennantoⓓ amin a pagrukbaban dagiti tattao ken amin a bambanag nga ibilangda a nadiosan. Isaadnanto ti bagina iti ngatoenda amin ket sumrekto pay nga agtugaw iti Templo ti Dios, sananto ibaga nga isu ti Dios.

⁵Imbagakon amin dagitoy idi addaak iti dennayo. Diyo kadi malagip?

⁶Ngem adda mangigawgawid iti pannakapasamakna, ket ammoyo no ania dayta.

⁶Ngarud, iti naituding a tiempo, agparangto ti Managdakdakes.

⁷Madaman nga agtartrabaho ti Palimed ti Kinadakes, ngem santo la agsardeng inton maikkat ti manglaplapped.

⁸Kalpasanna,ⓔ agparangto ti Managdakdakes, ngem inton umay ti Apo Jesus papatayennanto babaen iti pug-awna ken dadaelennanto babaen iti makapurar a raniag ti panagparangna.

⁹Umaytoⓕ ti Managdakdakes nga addaan iti pannakabalin ni Satanas. Agaramidto kadagiti amin a kita ti milagro ken kadagiti makaallilaw a pagilasinan ken datdatlag.

¹⁰Aramatennanto ti amin a kita ti dakes a pangallilaw kadagiti mapukaw. Mapukawdanto ta dida inawat ken impatpateg ti kinapudno a makaisalakan koma kadakuada.

¹¹Daytoy ti gapuna a ti Dios ibaonna ti pannakabalin ti biddut nga agtrabaho kadakuada tapno patienda ti ulbod.

¹²Agbanagto a maukom dagiti amin a di namati iti kinapudno, ta ad-adda nga inayatda ti basol.

¹³Masapul a kanayon nga agyamankam iti Dios gapu kadakayo, kakabsat, dakayo nga ay-ayaten ti Apo. Ta dakayo ti pinili ti Dios kas umuna[2] a maisalakan babaen iti bileg ti Espiritu a mangpasanto kadakayo ken babaen iti pammatiyo iti kinapudno.

¹⁴Inayabannakayo ti Dios iti daytoy a kasasaad babaen iti Naimbag a Damag nga inkasabami kadakayo. Wen, inayabannakayo a makipagtagikua iti dayag ni Apotayo a Jesu-Cristo.

¹⁵Isut' gapuna, kakabsat, nga agtalinaedkayo a natibker ket salimetmetanyo dagiti kinapudno nga insuromi kadakayo babaen iti panangaskasabami ken iti suratmi.

¹⁶Sapay koma ta ni Apotayo a Jesu-Cristo a mismo ken ti Dios nga Amatayo, a nagayat ken mangted kadatayo iti agnanayon a tured ken nasayaat a namnama babaen iti paraburna,

¹⁷patureden ken papigsaennakayo a kanayon nga agaramid ken agsao iti naimbag.