2 Timoteo 1:1-18 RIPV1996 - Bible AI

¹Kenka,ⓐ Timoteo a patgek nga anak, Sapay koma ta ti Dios Ama ken ni Cristo Jesus nga Apotayo ti mangted kenka iti parabur, asi ken talna. Siak, ni Pablo nga apostol ni Cristo Jesus gapu iti pagayatan ti Dios, ti naggapuan daytoy a surat. Naibaonak a mangipakaammo iti naikari a biag a magun-odtayo babaen iti pannakikaysatayo ken ni Cristo Jesus.

³Agyamanak iti Dios a pagserbiak iti nadalus a konsensia, kas iti panagserbi met idi dagiti kapuonak. Wen, agyamanak kenkuana iti pannakalagipko kenka kadagiti kararagko iti aldaw ken rabii.

⁴Malagipko dagiti luluam ket mailiwak unay a makakita kenka tapno mapnoak iti rag-o.

⁵Malagipkoⓑ ti napudno a pammatim, ti pammati a nagtalinaed nga immuna kada apongmo a Loida ken nanangmo a Eunice. Kapkapnekak nga adda met kenka daytoy.

⁶Isut' gapuna nga ipalagipko a parangrangem ti sagut nga inted ti Dios idi ipatayko dagiti imak kenka.[1]

⁷Ta saan nga espiritu ti kinatakrot ti inted kadatayo ti Dios, no di ti Espiritu a mangted kadatayo iti pannakabalin, ayat ken kinamanagteppel.

⁸Ngarud, dika agbain a mangsaksi iti Apotayo. Saannak met nga ibain a sibabalud ita gapu ken ni Cristo. Makipagsagabaka ketdi gapu iti Naimbag a Damag, kas mayannurot iti pigsa nga ited ti Dios.

⁹Insalakan ken inayabannatayo nga agbalin a tattaona, saan a gapu iti naaramidantayo, no di ket gapu iti bukodna a panggep ken parabur. Intedna kadatayo daytoy a parabur babaen ken ni Cristo Jesus sakbay ti pannakaparsua ti lubong.

¹⁰Ngem naiparangarangen kadatayo ti parabur babaen iti yaay ti Mangisalakan kadatayo, ni Cristo Jesus. Babaen iti Naimbag a Damag, ammotayo a ginibusan ni Cristo ti panagturay ti patay ken impakitana ti biag nga agnanayon.

¹¹Dinutokannakⓒ ti Dios a kas apostol ken maestro a mangikasaba iti Naimbag a Damag.

¹²Daytoy ti gapuna a sagsagabaek dagitoy. Ngem saanak a maupay, agsipud ta ammok no siasino ti pinatik ket awan duaduak a kabaelanna nga aywanan ti intalekna kaniak[2] agingga iti dayta nga Aldaw.

¹³Surotem a kas pagwadan dagiti insurok kenka, ket agtaengka iti pammati ken ayat a kukuatayo iti pannakikaysatayo ken ni Cristo Jesus.

¹⁴Babaen iti bileg ti Espiritu Santo nga agtaeng kadatayo, salluadam a naimbag dagiti natan-ok a banag a naitalek kenka.

¹⁵Kas pagaammom, binaybay-andak dagiti amin a taga-probinsia ti Asia, agraman da Figelo ken Hermogenes.

¹⁶Sapay koma ta kaasian ti Apo ti familia ni Onesiforo. Namin-adu a liniwliwanak ni Onesiforo. Saanna nga imbain ti kaaddak iti pagbaludan,

¹⁷ngem apaman a simmangpet ditoy Roma, sinapulnak a dagus agingga a nasarakannak.

¹⁸Sapay koma ta kaasian ti Apo iti dayta nga Aldaw! Ad-adu ti ammom maipapan iti amin a panagserbina kaniak idiay Efeso.