1Tattao ti Israel, denggenyo daytoy sao ti APO maipapan kadakayo, ti entero a nasion nga inruarna idiay Egipto:
2“Kadagiti amin a nasion ditoy daga, dakayo laeng ti binigbigko ken tinaripatok. Iti kasta, dusaenkayo gapu kadagiti amin a basolyo.”
3Agkuyog kadi ti dua a tao no dida agtulag nga umuna?
4Agngernger kadi ti leon iti bakir no awan makitana a tiliwenna?
5Matiliw kadi ti tumatayab iti palab-og nga awan appanna?
6No aguni ti trumpeta a mangipakaammo iti gubat, saan aya nga agbuteng dagiti tattao iti siudad?
7Saan nga aramiden ni Apo DIOS ti panggepna no dina ipakaammo nga umuna kadagiti babaonenna a profeta.
8No agngernger ti leon, adda aya saan a mabuteng?
9Ipakdaaryo kadagiti agnaed kadagiti palasio ti Asdod ken ti Egipto: “Aguummongkayo kadagiti bambantay iti lawlaw ti Samaria ket saksianyo ti dakkel a riribuk sadiay ken dagiti kinadakes a maar-aramid iti siudad.”
10Kuna ni Yahweh, “Saan nga ammo dagitoy a tattao ti agaramid iti nalinteg. Agipempenda kadagiti palasioda kadagiti tinaktakawda ken innalada babaen iti panagranggas.
11Ngarud, addanto kabusor a manglikmut kadakuada iti dagada. Rebbaendanto dagiti sarikedkedda ket agsamsamdanto kadagiti palasioda.”
12Kuna ni Yahweh, “Kas iti agpaspastor a ti laeng dua a saka wenno maysa a lapayag ti karnero ti maagawna iti ngiwat ti maysa a leon, kastanto met ti pannakaispal dagiti tattao ti Samaria nga agid-idda kadagiti agkakapintas a sofa. Manmanonto laeng kadakuada ti maisalakan.
13Dumngegkayo, ket ballaaganyo dagiti kaputotan ni Jacob,” kuna ni Apo DIOS a Mannakabalin-amin.
14“Iti
15Dadaelekto dagiti balay a taengda iti tiempo ti lam-ek ken dagiti balayda iti kalgaw. Marakrakto dagiti balay a marfil ket marbanto ti amin a dadakkel a balay.”