Dagiti Aramid 13:1-52 RIPV1996 - Bible AI

¹Iti iglesia idiay Antiokia, adda idi sumagmamano a profeta ken mamaestro: isuda da Bernabe, Simeon (a maaw-awagan Negro), Lucio (a taga-Cirene), Manaen (a kinaubingan ni Herodes a gobernador) ken Saulo.

²Kabayatan ti panagdaydayawda iti Apo ken panagay-ayunarda, kinuna ti Espiritu Santo kadakuada, “Ilasinyo da Bernabe ken Saulo. Isuda ti pinilik a mangaramid iti trabaho a naituding kadakuada.”

³Kalpasan ti panagayunar ken panagkararagda, impatayda dagiti imada kada Bernabe ken Saulo sada imbaon ida.

⁴Iti kasta, simmalog idiay Seleucia da Bernabe ken Saulo nga imbaon ti Espiritu Santo. Manipud sadiay, nagbarkoda a nagturong iti isla ti Chipre.

⁵Idi dumtengda idiay Salamina, inkasabada ti sao ti Dios kadagiti sinagoga dagiti Judio. Inkuyogda ni Juan Marcos a tumulong kadakuada iti trabaho.

⁶Sinursorda ti puro agingga idiay Pafo a nakasarakanda iti maysa a salamangkero nga agnagan iti Bar-Jesus. Judio ni Bar-Jesus ket imbilangna ti bagina a profeta uray no saan.

⁷Aggayyemda iti gobernador iti dayta a puro, ni Sergio Paulo, maysa a nasaririt a tao. Kayat a denggen ti gobernador ti sao ti Dios, isu a pinaayabanna da Bernabe ken Saulo.

⁸Ngem linapdan ida ti salamangkero (Elimas ti naganna iti Griego), ta kayatna a mayadayo ti gobernador iti pammati.

⁹Iti kasta, ni Saulo a maaw-awagan pay iti Pablo, isu a napno ti Espiritu Santo, pinerrengna ti salamangkero

¹⁰sana kinuna: “Sika nga anak ti Diablo! Sika ti kabusor ti amin a kinalinteg. Nasikapka la unay. Apay a kankanayonmo a balballikugen ti kinapudno maipapan iti Apo?

¹¹Ita, dissoannaka ti ima ti Apo: Agbulsekka ket dimo makita ti lawag ti init iti sumagmamano nga aldaw.” Dagus a narikna ni Elimas a kinullaapan ti sipnget dagiti matana, ket nagar-arikap a nangsapul iti mangkibin kenkuana.

¹²Namati ti gobernador idi maimatanganna ti napasamak. Napalalo ti siddaawna iti sursuro maipapan iti Apo.

¹³Manipud Pafo, nagbarko ni Pablo ken dagiti kinakuyogna. Dimtengda idiay Perge, maysa nga ili iti Pamfilia. Ngem pinanawan ni Juan Marcos ida sadiay ket nagsubli idiay Jerusalem.

¹⁴Manipud Perge, dimtengda iti ili ti Antiokia, idiay Pisidia. Iti Aldaw a Panaginana, simrekda iti sinagoga ket nagtugawda.

¹⁵Kalpasan ti pannakaibasa ti maysa a paset ti Linteg ni Moises ken Dagiti Sursurat dagiti Profeta,[25] adda pinaibaga kadakuada dagiti pangulo ti sinagoga. “Kakabsat,” kinunada, “kayatmi nga agsaokayo kadagiti tattao, no adda mensaheyo a pammaregta kadakuada.”

¹⁶Timmakder ni Pablo, sineniasanna ida nga agulimekda ket nagsao: “Padak nga Israelita ken dakayo nga agdaydayaw iti Dios, dumngegkayo!

¹⁷Tiⓤ Dios dagiti Israelita ti nangpili kadagidi kapuonantayo ket pinagbalinna ida a naindaklan a pagilian bayat ti panagnaedda a kas ganggannaet idiay Egipto. Inruarna ida sadiay babaen iti naindaklan a pannakabalinna.

¹⁸Itiⓥ aguppat a pulo a tawen, inanusanna[26] ida idiay let-ang.

¹⁹Pinarmeknaⓦ ti pito a nasion iti daga ti Canaan. Intedna dayta a daga a tagikuaen dagiti tattaona.

²⁰Naaramidⓧ amin dagitoy iti uneg ti ag-450 a tawen.

²⁰“Kalpasanna, inikkanna ida kadagiti ukom agingga iti tiempo a dimteng ni profeta Samuel.

²¹Idiⓨ dimmawatda iti ari, intedna nga arida ni Saulo nga anak ni Kis a nagtaud iti tribu ni Benjamin. Nagturay ni Saulo iti uppat a pulo a tawen.

²²Kalpasanⓩ ti panangikkat ti Dios kenkuana, insaadna ni David a kas arida. Kastoy ti kinuna ti Dios maipapan kenkuana, ‘Nasarakak a ni David nga anak ni Jesse ti lalaki a makatungpal iti amin a pagayatak!’

²³“Kas inkari ti Dios, pinagbalinna a Mangisalakan iti Israel ti maysa kadagiti kaputotan ni David. Isu ni Jesus.

²⁴Sakbayⓐ nga inrugi ni Jesus ti trabahona, inkasaba ni Juan kadagiti amin nga Israelita a masapul nga agbabawida kadagiti basbasolda ken pabuniaganda.

²⁵Idiⓑ dandanin malpas ni Juan ti nakaibaonanna, kinunana kadagiti tattao, ‘Siasinoak iti panagkunayo? Saan a siak ti ur-urayenyo no di ket ti sumaruno kaniak. Saanak pay a maikari a mangikkat iti sandaliasna.’

²⁶“Kakabsatko, dakayo a nagtaud iti kaputotan ni Abraham ken dakayo a Hentil nga adda ditoy nga agdaydayaw iti Dios: datayo ti nakaitedan ti mensahe ti pannakaisalakan!

²⁷Ta saan a nabigbig dagiti agnaed idiay Jerusalem ken dagiti panguloda a ni Jesus ti Mangisalakan. Dida met naawatan ti sao dagiti profeta a maibasbasa iti tunggal Aldaw a Panaginana. Ngem isuda met laeng ti nangipatungpal iti sao dagiti profeta idi inukomda ni Jesus.

²⁸Ketⓒ uray no awan nasarakanda a pakaigapuan a makedngan a matay, dinawatda ken Pilato a papapatayna.

²⁹Idiⓓ naaramiddan ti amin a nailanad iti Nasantoan a Surat maipapan kenkuana, imbabada iti krus sada intanem.

³⁰“Ngem pinagungar ti Dios.

³¹Aduⓔ nga aldaw a nagparparang kadagidi kinadkaduana manipud Galilea agingga idiay Jerusalem. Isuda itan dagiti saksina kadagiti tattao.

³²Ket addakami ditoy a mangyeg kadakayo iti Naimbag a Damag nga inkari ti Dios nga aramidenna kadagiti kapuonantayo.

³³Tinungpalnanⓕ ita kadatayo a kaputotanda babaen iti panangpagungarna ken ni Jesus. Kas nailanad iti maikadua a Salmo:

³³‘Sika ti Anakko; Ita nga aldaw, nagbalinak nga Amam.’

³⁴Noⓖ maipapan iti panangpagungar ti Dios ken ni Jesus a ni kaanoman dinto agsublin iti panagrupsa, kastoy ti kinunana: ‘Itedkonto kenka ti nasantoan ken di pagduaduaan a bendision nga inkarik ken David.’

³⁵Isut'ⓗ gapuna a kinunana pay iti sabali a salmo: ‘Dimonto ipalubos nga agrupsa ti nasantoan nga adipenmo.’

³⁶Ta idi panawen ni David, kalpasan ti panangipatungpalna iti pagayatan ti Dios, natay ken naikali iti denna dagiti kapuonanna, ket nagrupsa ti bangkayna.

³⁷Ngem saan a nagrupsa daytoy a pinagungar ti Dios.

³⁸Rebbengyo ngarud nga ammoen, kakabsat, a babaen ken ni Jesus, maipakaammo kadakayo ti pannakapakawan dagiti basbasol.

³⁹Rebbengyo pay nga ammoen a ti siasinoman a mamati kenkuana mapakawan iti amin a basol a saan a mapakawan segun ti Linteg ni Moises.

⁴⁰Agannadkayo ngarud tapno saan a mapasamak kadakayo ti kinuna dagiti profeta:

⁴¹‘Kitaenyo,ⓘ dakayo a nauyaw! Agsiddaaw ken mataykayo! Ta ti ar-aramidek iti panawenyo, Pulos a diyonto patien, Uray no adda mangilawlawag kadakayo.’”

⁴²Idi rummuar da Pablo ken Bernabe iti sinagoga, inawis dagiti tattao ida nga agsubli iti sumuno nga Aldaw a Panaginana tapno agsaoda pay maipapan kadagitoy a bambanag.

⁴³Idi nakapanawen dagiti tattao iti sinagoga, simmurot kada Pablo ken Bernabe dagiti adu a Judio ken dagiti Hentil a napasurot iti Judaismo. Iti kasta, binalakadanda ida tapno agtalinaedda nga agbiag iti parabur ti Dios.

⁴⁴Iti sumuno nga Aldaw a Panaginana, dimteng ti dandani amin a tattao iti dayta nga ili tapno dumngegda iti sao ti Apo.[27]

⁴⁵Idi makita dagiti Judio dagiti adu a tattao, napalalo ti apasda ket imbagada nga ulbod ti sasawen ni Pablo. Pinagsasaoanda pay ni Pablo.

⁴⁶Ngem situtured a nagsao da Pablo ken Bernabe. “Rebbengna a dakayo ti umuna a pakaipalawagan ti sao ti Dios,” kinunada, “ngem agsipud ta laksidenyo ken diyo ibilang a maikarikayo iti biag nga agnanayon, panawandakayo ket inkami kadagiti Hentil.

⁴⁷Taⓙ daytoy ti bilin ti Apo kadakami:

⁴⁷‘Insaadka a mangsilaw kadagiti Hentil, Tapno maisalakan ti entero a lubong.’”

⁴⁸Idi mangngeg daytoy dagiti Hentil, nagrag-oda ket dinaydayawda ti mensahe ti Apo. Ket nagbalin a mamati dagiti naituding iti biag nga agnanayon.

⁴⁹Nagsaknap ti sao ti Apo iti amin a disso iti dayta a lugar.

⁵⁰Ngem sinulbog dagiti Judio dagiti nalatak a lallaki iti ili, kasta met dagiti babaknang a babbai nga agdaydayaw iti Dios. Inrugida ti pannakaidadanes da Pablo ken Bernabe ket kapilitan a nagtalawda iti lugarda.

⁵¹Pinampagdaⓚ ngarud ti tapok kadagiti sakada a maibusor kadakuada ket nagturongda idiay Iconio.

⁵²Idiay Antiokia, kasta unay ti rag-o dagiti adalan ket naan-anay ti panangituray kadakuada ti Espiritu Santo.